Ester 9

1Chunka iskayniyoqkaq Adar killaq chunka kinsayoq p'unchayninpin reypa kamachikusqan hunt'akunan karqan. Chay p'unchaypin judío runakunata awqanku munaychakuyta yuyarqanku, ichaqa manan hinachu karqan, judío runakunan paykunata munaychakurqanku. 2Rey Asueroq suyun llapan llaqtakunapi tiyaq judío runakunan huñukurqanku, paykunata wañuchiy munaq awqanku contra phawaykunankupaq. Manataq awqankuqa tupapakuyta atirqanchu, llapan runakuna judío runakunata manchakusqanrayku. 3Llapan umallikunapas, provinciakunapi kamachikuqkunapas, llaqta kamachikuqkunapas, oficialkunapas Mardoqueota manchakuspankun judío runakunata yanaparqanku. 4Mardoqueoqa reypa wasinpi ancha atiyniyoqmi karqan, llapan suyupitaq allin mentasqa kasqanta yacharqanku, sapa p'unchaytaq aswan-aswan atiyniyoq kapurqan. 5Chaymi judío runakunaqa llapan awqankuta espadawan wañuchispa ch'usaqyachirqanku, ima munasqankutan ruwarqanku. 6Suyuq hatun Susa llaqtallanpiraqmi wañuchirqanku phisqa pachak qharikunata, 7hinallataq wañuchirqanku Parsandatata, Dalfonta, Aspatata, 8Poratata, Adaliata, Aridatata, 9Parmastata, Arisaita, Aridaita, Vaizatatawan. 10Chaykunan karqan judío runakunaq awqan Hamedataq churin Amanpa chunkantin churinkuna, judío runakunan ichaqa paykunaq kaqninkuta mana hap'ikapurqankuchu. 11Chay kikin p'unchaymi rey Asueroman willarqanku Susa llaqtapi hayk'achus wañusqanta. 12Hinan reyqa Esterta nirqan: –Kay Susa llaqtallapiraq phisqa pachak qharikunata Amanpa churinkunatawan wañuchinku chayqa, ¿wakin provinciakunapiqa hayk'ataraqchá wañuchinku? ¿Astawanraqchu munanki imatapas? Mañakullaway, qosqaykipunin, nispa. 13Estertaq kutichirqan: –Allin rikch'akusunki chayqa, valekuykin paqarintawan Susa llaqtapi judío runakuna kaqlla kamachisqaykiman hina wañuchinankupaq, Amanpa chunkantin churinkunaq ayanpas seq'onaman warkusqa kananpaq, nispa. 14Reyqa mañakusqanman hinan hunt'akunanpaq kamachikurqan, hinan chay kamachikuyqa Susapi willasqa karqan. Amanpa chunkantin churinpa ayankunataq warkusqa karqan. 15Hinan Susa llaqtapi kashaq judío runakunaqa Adar killaq chunka tawayoq p'unchayninpi huñukuspanku, kinsa pachak qharikunata wañuchirqanku, ichaqa manan kaqninkutaqa hap'ikapurqankuchu. 16Suyuq provinciankunapi tiyaq wakin judío runakunapas Adar killaq chunka kinsayoq p'unchayninpin huñukullarqankutaq kawsayninkumanta tupapakunankupaq. Hinaspan awqankuta vengakuspa qanchis chunka phisqayoq waranqa runata wañuchirqanku, ichaqa manan kaqninkutaqa hap'ikapurqankuchu. 17Qhepantin p'unchaytaq samarqanku, hinaspan kusisqa hatun mikhuywan q'ochukurqanku. 18Susapi kaq judío runakunaqa iskay p'unchaymi maqanakurqanku, chaymi paykunaqa chunka phisqayoq p'unchaypi samaspanku kusisqa hatun mikhuywan q'ochukurqanku. 19Chayraykun campopi, ayllukunapi tiyaq judío runakunaqa Adar killaq chunka tawayoq p'unchayninpi kusikuspa fiestata ruwallankupuni, mikhunatapas apachinakuspanku. 20Mardoqueoqa lliwtan chay ruwasqakunata qelqarqan, hinaspa suyuq provinciankunapi tiyaq llapan judío runakunaman qelqakunata apachirqan, karupiña qayllapiña karqanku chaypas. 21Paykunatan kamachirqan sapa wata Adar killaq chunka tawayoq p'unchayninpi chunka phisqayoq p'unchayninpiwan fiestata ruwanankupaq. 22Chay p'unchaykunapin judío runakunaqa awqankuta vengakuqtinku, llakikuyninku, waqayninku, anchiyninkupas kusikuyman q'ochukuyman tukupurqan. Chaymi chay p'unchaykunapiqa kusisqa hatun mikhuywan fiestata ruwananku karqan, mikhunata apachinakuspanku wakchakunamanpas regalokunata qospanku ima. 23Hinan judío runakunaqa Mardoqueoq qelqapi kamachisqanman hina chay fiestata watan-watan ruwanankupaq yuyaykurqanku. 24Llapan judío runakunaq awqan Agag runa Hamedataq churin Amanqa paykunata wañuchiyta yuyaspanmi Purta sorteasqa wañuchinanta ch'usaqyachinanta yachananpaq. 25Reyman Ester willaqtintaq ichaqa, reyqa kamachikuspa unancharqan judío runakuna contra chay mana chanin yuyaykusqanmanta kikin Amán wañuchisqa kananpaq. Ahinapin Amantapas churinkunatapas seq'onapi wañuchirqanku. 26Chaymi chay p'unchaykunata “Purim” nispa suticharqanku, Pur simimanta kasqanrayku. Hinan judío runakunaqa Mardoqueoq qelqanman hina, paykunaq rikusqanman kawsayninkupi yachasqankuman hina, 27yuyaykurqanku watan-watan fiestata ruwanankupaq paykunapas mirayninkupas, hinallataq judío runaman tukuqkunapas. Sapa wata hina fiestata ruwanankupaq yuyakurqanku chay iskay p'unchaypi, kamachisqa kasqankuman hina. 28Ahinapin paykunaqa chay p'unchaykunata yuyarispanku waqaychananku karqan sapanka mirayninkupi, ayllukunapi, llaqtakunapi, provinciakunapiwan, judío runakunapas mirayninkupas fiestata ruwashanallankupaq. 29Abihailpa ususin reina Estertaq Mardoqueopiwan atiyninkuman hina Purim fiestamanta iskaykaq qelqata qelqarqanku ñawpaqkaq qelqata cheqaqchananpaq. 30Chaytan sumaq simikunawan munakuywan apachirqanku suyupi pachak iskay chunka qanchisniyoq provinciakunapi kashaq llapan judío runakunaman. 31Chay qelqapin ñawpaqkaq kamachisqanku p'unchayman hina Purim fiestata ruwanankupaq paykunata kamachirqanku, hinallataq kamachirqan chay fiestapi ayunanankupaq llakikunankupaqwan. 32Chay hinatan reina Esterqa cheqaqcharqan Purim fiestapaq kamachikuyta. Tukuy chay ruwaykunaqa huk qelqapi qelqasqan karqan.

will be added

X\