Ester 8

1Chay kikin p'unchaymi rey Asueroqa judío runakunaq awqan Amanpa tukuy kaqninkunata reina Esterman qopurqan. Estertaq reyman willarqan Mardoqueoqa ayllun kasqanta, chaymi Mardoqueoqa reyman qayllaykurqan. 2Hinan reyqa Amanmanta qechuspa churakusqan selloyoq sortijanta horqokuspa Mardoqueoman qorqan, Estertaq Amanpa tukuy kaqninkunaman Mardoqueota mayordomo kananpaq churarqan. 3Chaymantataq Esterqa wakmanta reyta rimapayarqan, ñawpaqenman k'umuykukuspataq waqakuspa valekurqan mana chanin Amanpa judío runakunata wañuchinanpaq kamachikusqan qelqa amaña hunt'akunanpaq, ahinapi judío runakuna contra yuyaykusqan mana hunt'akunanpaq. 4Qori varanta rey haywariqtintaq, Esterqa sayarispa reyta nirqan: 5–Reyníy, sumaqta qhawariwanki, munakuwanki, chanintaq rikch'akusunkipas chayqa, valekuykin huk kamachikuyta qelqanaykita Amanpa kamachikusqan qelqa amaña hunt'akunanpaq, payqa suyupi llapan provinciakunamanmi qelqata apachirqan llapan judío runakuna ch'usaqyachisqa kananpaq. 6¿Imaynataq llakhi kashayman llaqta-masiyman kay ñak'ariy aypaykushaqtinri? ¿Imaynataq aylluyta wañuchishaqta hinallata qhawashayman? nispa. 7Hinan reyqa reina Esterman judío runa Mardoqueomanwan kutichirqan: –Amanpa tukuy kaqninkunataqa reina Estermanñan qopuni, Amantapas seq'onapin wañuchiniña, judío runakunata ch'usaqyachiyta munasqanmanta. 8Chhaynaqa, sutiypi qelqaychis imachus judío runakunarayku allin rikch'akusunkichis chayta, sortijaywantaq ñit'iykuychis. Reypa sutinpi qelqasqa sortijanwan ñit'isqa kamachikuyqa manan p'akisqa kanmanchu, nispa. 9Hinan kinsakaq Siván killaq iskay chunka kinsayoq p'unchayninpi reypa qelqaqninkuna waqyasqa karqanku. Paykunan Mardoqueoq tukuy kamachisqanta qelqarqanku judío runakunaman, provinciakunapi kamachikuqkunaman, llaqta kamachikuqkunaman, hinallataq Indiamanta Etiopiakama pachak iskay chunka qanchisniyoq provinciakunapi llapan oficialkunamanpas. Sapanka provinciakunaman qelqayninku qelqapi, rimayninku rimaypi qelqarqanku, hinallataq judío runakunaman qelqayninku qelqapi, rimayninku rimaypi. 10Chay qelqakunatan rey Asueroq sutinpi qelqarqanku, hinaspan selloyoq sortijanwan ñit'iykurqanku, chaskikunataq reypa phawaq caballonkunapi sillaykusqa aparqanku. 11Chay qelqapin reyqa judío runakunata kamachirqan tiyasqanku llaqtakunapi huñukuspanku kawsayninkumanta tupapakunankupaq, may llaqtapas may provinciapas armayoq paykunaman phawaykuqtinqa. Chay hinapin judío runakunaqa atirqanku tukuy kaqninkuta hap'ikapuyta, hinallataq paykunata muchuchiyta, wañuchiyta, ch'usaqyachiyta, warminkutapas wawankutapas mana khuyapayaspa. 12Chayta ruwanankupaqqa huk p'unchaymi yuyaykusqa karqan, rey Asueroq kamachikusqan llapan provinciakunapi, chunka iskayniyoq Adar killaq chunka kinsayoq p'unchayninpi. 13Chay kamachikuy qelqaqa sapanka llaqtakunapin provinciakunapin kamachikuy hina willasqa kanan karqan, chay p'unchaypi judío runakuna awqankuta vengakunankupaq wakichisqa kashanankupaq. 14Chaymi chaskikunaqa reypa kamachisqanta kasukuspa, paypa phawaq caballonpi sillaykusqa usqhaylla phawarqanku. Chay kamachikuyqa hatun Susa llaqtapipas willasqallataqmi karqan. 15Chaymantataq reypa wasinmanta Mardoqueoqa lloqsirqan azulniyoq yuraqniyoq rey p'achawan p'achasqa, hatun qori coronayoq, linomanta sani-puka capayoq. 16Chay p'unchaykunaqa judío runakunapaqqa ancha allinmi karqan, chaymi q'ochukurqanku kusikurqanku. 17Tukuy llaqtakunaman, provinciakunaman, cheqaskunaman reypa kamachikuynin qelqa chayaqtinmi, judío runakunaqa anchata kusikurqanku q'ochukurqanku, hinaspa hatun mikhuyta wakichispa fiestata ruwarqanku. Askha runakunataq suyupi llaqta-llaqtamanta judío runaman tukupurqanku, paykunata manchakuspanku.

will be added

X\