Ester 7

1Reymi Amanpiwan reina Esterpa wakichisqan hatun mikhuyman wakmanta rirqanku. 2Hinan chay iskaykaq p'unchaypi vinota ukyashaspanku reyqa Esterta tapuykullarqantaq: –Reina Ester, ima munasqaykita mañakuway, suyuq kuskannintaña mañakuwanki chaypas, qosqaykin, nispa. 3Chaymi reina Esterqa nirqan: –Reyníy, sumaqta qhawariwanki chayqa, allintaq rikch'akusunkipas chayqa, khuyapayaykuwayku ñoqatapas llaqtaytapas ama wañuchiwanankupaq. Chayllatan valekuyki. 4Ñoqapas llaqtaypas llapayku ch'usaqyachisqa kanaykupaqmi vendesqa kashayku. Kamachipaq vendesqalla kaykuman chayqa, ch'inllachá kakuyman, manachá umayki nanachiq hamushaymanchu, nispa. 5Reytaq Esterta tapuykurqan: –¡Pitaq chayri! ¡Maypitaq kashan hatunchakuspa chay hina mana chanin ruwayta munaqri! nispa. 6Hinan Esterqa kutichirqan: –¡Awqaykuqa kay millay Amanmi! nispa. Amantaq chayta uyarispa, mancharikuymanta chiriyarqanraq. 7Reytaq hatun mikhuymanta sinchi phiñasqa sayarispa huertaman lloqsirqan. Amantaq reypa wañuchinanta repararqokuspa, reina Esterpa qayllanpi qhepakurqan ama wañuchinanpaq rogakuq. 8Huertamanta kutiykamuspataq reyqa rikurqorqan, Esterqa puñunanpi k'iraykusqa kashaqta, Amantataq chakinpi thallashaqta. Chaymi reyqa phiñarikuspa nirqan: –¿Wasiypi kashaspachu qayllaypiraqtaq reinata violayta munanki? nispa. Chayta rey rimarqoqtin hinan wakin eunucokunaqa Amanpa uyanta pakarqanku. 9Paykunamanta huknin Harbona sutiyoq runataq nirqan: –Kashanmi Amanpa wasinpi huk seq'ona iskay chunka iskayniyoq metro sayayniyoq, chaytan pay ruwachirqan reyman willaq Mardoqueota seq'ochinanpaq, nispa. Hinan reyqa kamachirqan: –¡Chay seq'onapi Amanta seq'omuychis! nispa. 10Ahinatan Amanta seq'opurqanku, pay kikinpa Mardoqueopaq ruwachisqan seq'onapi. Chaymi reypa phiñakuynin thaniykurqan.

will be added

X\