Ester 6

1Reyqa chay kikin tutan mana puñuy aysaqtin, suyuq willakuy qelqanta mañakurqan apamuspa qayllanpi leenankupaq. 2Hinan tarirqanku reypa wasin punku qhawaq eunuco Bigtanwan Terespiwan reyta wañuchinankupaq yuyaykusqankuta, hinallataq Mardoqueoq willasqantapas. 3Chaymi reyqa nirqan: –Mardoqueomanri, ¿chay ruwasqanmanta imata qospataq payta hatuncharqanchis? nispa. Oficialninkunataq kutichirqanku: –Manan imatapas qonchischu, nispa. 4Amantaq chay rato reypa wasin patioman haykusharqan ruwachisqan seq'onapi Mardoqueota seq'ochinanpaq reyta valekuq. Reytaq nirqan: –¿Pin patiopi kashan? nispa. 5Oficialninkunataq: –Amanmi, nirqanku. Hinan reyqa: –Haykumuchun, nirqan. 6Amán haykuqtintaq reyqa nirqan: –Ñoqan huk qharita hatunchayta munani, ¿imayna hatunchasqataq kanman? nispa. Amantaq sonqonpi yuyaykurqan: ¿Pitaq kanmanri? Ñoqatachá hatunchayta munawan, nispa. 7Hinan kutichirqan: –Mayqen qharitapas hatunchayta munanki chayqa, 8qanpa p'achaykiwan p'achakuchun, sillakunayki caballopi sillakuchun, caballoq mat'inman coronayki hina seq'esqawan churakuchun. 9Chay p'achata caballotawantaq suyupi qollana oficial hap'ichun, hinaspa hatunchay munasqayki qharita p'achachichun, caballomanpas sillachichun. Caballo aysantintaq llaqta plazapi muyurimuchun: ¡Ahinatan reyqa hatunchay munasqan qharitaqa ruwan! nispa, waqyakuspa. 10Chaymi reyqa Amanta nirqan: –Allinmi, usqhaylla rispa p'achata horqomuy, caballotapas aysamuy, hinaspa imaynan nisqaykiman hina kamachikunay wasi punkupi tiyaq Mardoqueo judío runata ruwamuy. Paqtataq nisqaykikunata qonqawaq, nispa. 11Hinan Amanqa rispa Mardoqueota p'achachimurqan, caballoman sillachispataq llaqta plazapi caballo aysantin muyurimurqan: ¡Ahinatan reyqa hatunchay munasqan qharitaqa ruwan! nispa, waqyakuspa. 12Chaymantataq Mardoqueoqa reypa kamachikunan wasi punkuman kutimpurqan. Amantaq ichaqa usqhaylla wasinta kutiripurqan sinchi p'enqasqa uyanta pakaykukuspa. 13Wasinman haykuspataq warmin Zeresman yuyaychaqninkunamanwan willakurqan tukuy llakiq qatisqanta. Hinan paykunaqa nirqanku: –Chay Mardoqueo judío runa kashaqtin, ñawpaqenpi atiyniyki pisichasqa chayqa, manan atipawaqñachu, aswanpas hukpaqkaman urmanki, nispa. 14Chayta rimashallaqtinkuraqmi, reypa eunucon qharikunaqa usqhaylla hamurqanku Amanta waqyaq, Esterpa wakichisqan hatun mikhuyman rinanpaq.

will be added

X\