Ester 5

1Kinsa p'unchaymantataq Esterqa reina p'achanwan churaykukuspa reypa kamachikunan wasi ukhu pationman haykurqan. Chaypitaq sayaykurqan reypa tiyasqan wasi ukhu qhawantin, patio qhawarisqa tiyananpin reyqa tiyasharqan. 2Chaymi reina Esterta rikurqospa sumaqta qhawarirqan, hinaspan hap'isqan qori varanta haywarirqan, Estertaq asuykuspa varaq puntanta llamiykurqan. 3Reytaq tapuykurqan: –Reina Ester, ¿iman karqon? Willaway, ¿imatan mañakuyta munanki? Suyuq kuskannintaña mañakuwanki chaypas, qosqaykin, nispa. 4Paytaq kutichirqan: –Allin rikch'akusunki chayqa, valekuykin kunan p'unchay wasiyman Amanpiwan hamunaykita, hatun mikhuytan qanpaq wakichini, nispa. 5Hinan reyqa nirqan: –Kunanpacha Amanta waqyachimuychis reina Esterpa munasqanta ruwanaykupaq, nispa. Chaymi reyqa Amanpiwan reina Esterpa wakichisqan hatun mikhuyman rirqanku. 6Vinota ukyashaspankutaq reyqa Esterta nirqan: –Ima munasqaykita mañakuway, suyuq kuskannintaña mañakuwanki chaypas, qosqaykin, nispa. 7Hinan Esterqa kutichirqan: –Kayllatan mañakuyta munani: 8Qanpa sumaq qhawarisqayki kani, mañakusqaytapas qowayta munanki chayqa, valekuykin paqarin hatun mikhuyman Amanpiwan kutimunaykita. Chaypiña nisqayki imatachus munasqayta, nispa. 9Amanqa chay p'unchay ancha kusisqa sonqoyoqmi lloqsipurqan, ichaqa reypa kamachikunan wasi punkupi Mardoqueota tiyashaqta rikuspanmi sinchita phiñakurqan, payta rikushaspa Mardoqueoq mana sayarisqanmanta mana kuyurisqanmantawan, 10chaywanpas sonqon ukhullapi phiñakuspa upallakurqan. Wasinman haykupuspataq amigonkunata warmin Zerestawan waqyachispa 11paykunaman willarqan tukuy qhapaq kayninmanta, askha churiyoq kasqanmanta, payta hatunchaspa reypa tukuy ruwasqantapas, llapa oficialninkunamanta yuyaychaqninkunamantapas qollana qhawarisqa kasqantawan. 12Nillarqantaq: –Qhawariychis, reina Esterpas kunan p'unchay ñoqallatan waqyachiwan reypaq wakichisqan hatun mikhuyman. Kaqllataq paqarinpas reytawan ñoqallatawan hatun mikhuyman waqyashawanku. 13Ichaqa chay judío runa Mardoqueota reypa kamachikunan wasi punkupi tiyashaqta rikushallasaq chayqa, yanqapaqmi tukuy chaykunaqa kanqa, nispa. 14Hinan warmin Zeresqa llapan amigonkunapas nirqanku: –Seq'onata ruwachimuy iskay chunka iskayniyoq metro sayayniyoqta, hinaspa paqarin tutallamanta reyta valekamunki Mardoqueota seq'ochinanpaq. Ahinapi hatun mikhuyman reypiwan kusisqa haykunki, nispa. Hinan chay yuyaychasqan simikuna Amanman allin rikch'akurqan, chaymi seq'onata ruwachimurqan.

will be added

X\