Ester 3

1Chaymantataq rey Asueroqa Agagpa miraynin Hamedataq churin Amanta anchata hatuncharqan, hinaspan yuyaychaqninkunaq qollananta churarqan. 2Reypa llapa punku qhawaqninkunan Amanta rikuspa qonqorikurqanku k'umuykukurqanku, ahinata reypa kamachikusqanrayku. Mardoqueotaq ichaqa chay kamachikuyta mana kasurqanchu. 3Hinan reypa kamachikunan wasi punku qhawaqninkuna Mardoqueota tapurqanku: –¿Imanaqtinmi reypa kamachikusqanta mana kasunkichu? nispanku. 4Sapa p'unchaymi ahinata tapupayarqanku, paytaq ichaqa mana uyariqpas tukurqanchu. Chaymi Mardoqueoq chay hina ruwasqanta Amanman willarqanku, Mardoqueoqa kaqllatapunichus rimanqa chayta yachanankupaq, Mardoqueoqa judío runa kasqanta willakurqanmi. 5Hinan cheqaqtapuni Mardoqueoq mana k'umuykukusqantapas mana qonqorikusqantapas rikuspa, Amanqa sinchita phiñakurqan. 6Mardoqueoq judío runa kasqanta yachaspataq mana payllatachu wañuchiyta yuyaykurqan, aswanpas Asueroq suyunpi tiyaq llapan judío runakunatawanmi wañuchiyta yuyaykurqan. 7Chunka iskayniyoqkaq watapi rey Asuero kamachikushaqtintaq, ñawpaqkaq Nisán killapi Amanpa qayllanpi suerteta qhawarqanku, ima killapichus ima p'unchaypichus yuyaykusqanman hina ruwananta yachananpaq. Hinan suerteqa lloqsirqan chunka iskayniyoqkaq Adar killaq chunka kinsayoq p'unchayninpaq. 8Rey Asueroman rispataq Amanqa nirqan: –Suyuq llapa provincianpin ch'eqeykusqa wak llaqta runakuna kashan, paykunaq kamachikuyninqa sapaqmi, manan wak llaqtakunaqwanpas tupanchu, manataqmi kamachikusqaykitapas kasukunkuchu. Manan allinchu hinallata kawsachinayki. 9Munanki chayqa, huk kamachikuyta unanchay llapan chay runakuna wañuchisqa kanankupaq. Chhayna kaqtinqa, ñoqa qosaq kinsa pachak kinsa chunka waranqa kilo qolqeta qolqe waqaychanaykiman oficialniykikunapaq, nispa. 10Hinan reyqa selloyoq sortijanta dedonmanta horqokuspa judío runakunaq awqan Amanman qoykuspa 11nirqan: –Qolqeykitaqa waqaychakullay, chay runakunatapas ima munasqaykita ruway, nispa. 12Wata qallariy killaq chunka kinsayoq p'unchayninpin reypa qelqaqninkunaqa waqyasqa karqanku, hinan Amanpa tukuy kamachikuyninta qelqarqanku umillikunaman llapa provinciakunapi kamachikuqkunaman, llaqta kamachikuqkunamanwan. Chay kamachikuytaqa reypa sutinpin qelqarqanku, sapanka llaqtakunamanpas provinciakunamanpas rimayninku rimaypi, qelqayninku qelqapi, reypa selloyoq sortijanwantaq ñit'iykurqanku. 13Chaskikunataq chay kamachikuyta suyupi sapanka provinciakunaman aparqanku. Chay qelqapin kamachikurqan llapan judío runakunata, waynakunatapas, yuyaqkunatapas, wawakunatapas, warmikunatapas huk p'unchayllapi hukpaqkama wañuchinankuta, hinaspa llapa kaqninkutapas hap'ikapunankuta. Chaytaqa ruwananku karqan chunka iskayniyoqkaq Adar killaq chunka kinsayoq p'unchayninpin. 14Ahinatan chay kamachikuy qelqaqa sapanka provinciakunapi llapa runaman willasqa kanan karqan, chay p'unchaypi wakichisqa kanankupaq. 15Hinan chay kamachikuyqa suyuq hatun Susa llaqtanpi willasqa karqan, chaskikunapas kaqraton lloqsirqanku reypa kamachisqan kaspanku. Hinan Susapi tiyaq runakuna llakikuymanta muspharqanku. Reytaq ichaqa Amanpiwan mikhuq ukyaq tiyaykurqanku.

will be added

X\