Ester 1

1Rey Asueron India suyumanta Etiopía suyukama kamachirqan, kamachisqan suyupiqa pachak iskay chunka qanchisniyoq provinciakunan karqan. 2Chaykunatan kamachirqan suyuq hatun llaqtan Susamanta. 3Kinsakaq watapi kamachikushaspanmi rey Asueroqa hatun fiestata wakichirqan, chaymanmi waqyachirqan oficialninkunata, yuyaychaqninkunata, Mediamanta Persiamantawan ejército umallikunata, provinciakunapi kamachikuqkunatawan. 4Payqa munarqanmi qhapaq kayninta, suyuq ancha hatun kasqanta, atiyninpas ancha musphana kasqantawan paykunaman rikuchiyta. Chay fiestaqa soqta killantinmi karqan. 5Chaymantapas huk fiestatawanraqmi wakichirqan reypa kamachikunan wasi huerta patiopi, hinaspan hatun Susa llaqtapi llapan tiyaqkunata, qhapaqkunata, wakchakunatapas waqyachirqan. Chay fiestan qanchis p'unchaynintin karqan. 6Chay patiopin yuraq qespi rumi tusakuna karqan, tusakuna patapitaq qolqe argollakuna kanichisqa karqan, chay argollakunamanmi yuraqniyoq llawlli-puka algodón cortinakuna linomanta sani ñañu waskhapi warkusqa karqan. Pampantaq yuraq k'anchaq rumiwan, yuraq qespi rumiwan, perlawan, siwar umiñapiwan mast'aspa llusk'achasqa karqan. Chaypitaq qorimanta qolqemanta ruwasqa puñunakuna churasqa karqan. 7Allin runa rey kaqtinmi vinoqa unu hinaraq karqan, tukuy rikch'aq qori vasokunapin haywachirqan. 8Reymi vino haywaqnin umallikunata kamachirqan pipas mana munaqtaqa ama ukyachinanpaq, aswanpas sapanka ima munasqankuta ukyanankupaq. 9Hinallataq reina Vastipas rey Asueroq wasinpi warmikunapaq fiestata ruwallarqantaq. 10Fiesta tukukuy qanchiskaq p'unchaytaq reyqa vinota ukyaykuspa sonqopas-sonqo karqan. Chaymi sapaq kamachinpi kaq eunuco qharikunata Mehumanta, Biztata, Harbonata, Bigtata, Abagtata, Zetarta, Carcastawan kamachirqan 11reina Vastita qayllanman umanpi sumaq coronayoqta pusamunankupaq. Reyqa munarqan oficialninkunaman llapa runakunamanwan reinaq sumaq rikch'ayninta rikuchiyta, pay sumaq rikch'ayniyoq kasqanrayku. 12Reina Vastitaq ichaqa mana kasurqanchu eunuco qharikunawan reypa kamachisqanta. Chaymi reyqa sinchita phiñakuspa rawrarirqan. 13Yachasqañan karqan reypa sasachakuyninkunata kamachikuy simi allin yachaqkunaq chaninchanankuqa. Chaymi payqa chaninchay yachaqkunata waqyachimurqan. 14Reyta aswan yuyaychaqkunan karqan: Carsena, Setar, Admata, Tarsis, Meres, Marsena, Memucanpiwan. Paykunan karqan Persiapi Mediapi kamachikuqkuna. Reypa qayllanman haykunankutaqa manan pipas hark'aqchu, suyupipas ancha chaniyoq runakunan karqanku. 15Huñuykusqa kashaqtinkun reyqa tapurqan: –Kamachikuyman hina, ¿imatan ruwasunman reina Vastita eunucokunawan kamachisqayta mana kasuwasqanmanta? nispa. 16Hinan kamachikuqkunaq qayllanpi Memucanqa reyta nirqan: –Reina Vastiqa manan rey contrallachu huchallikun, payqa suyuykipi tukuy runakuna contran huchallikun, hinallataq llapa kamachikuqkuna contrapas. 17Chay hinaqa, llapan warmikunan reinaq ruwasqanta yachaspa kasqallantataq qosankuta pisichaspa ninqaku: Reina Vastipas manan kasurqanchu rey Asueroq kamachisqanta, ¿chaychu ñoqanchis kasusunman qosanchista? nispa. 18Reinaq ruwasqanta yachaspaqa Mediapi Persiapi oficialniykikunaq warminkunaqa kunanpachan qosankuta rimapakunqaku, ahinapitaq pisichaypas mana allin kawsaypas kanqa. 19Chay hinaqa, reyníy, allin rikch'akusunki chayqa, kay hina unanchayta willachiy, hinallataq Persia suyuqpas Media suyuqpas kamachikuynin qelqapi qelqay ama yanqayachisqa kananpaq: Reina Vastiqa manan hayk'aqpas rey Asueroman qayllaykunqañachu, nisqata. Chaymantapas paypa rantinpi huk aswan allin warmita reinata churanki. 20Ahinapin ancha hatun suyuntinpi qanpa unanchasqayki willasqa kaqtin, llapan warmikuna qhapaqkunapas wakchakunapas qosankuta respetanqaku, nispa. 21Hinan reymanpas yuyaychaqkunamanpas Memucanpa yuyaychasqan allinpuni rikch'akurqan, chaymi reyqa nisqanta hina ruwarqan. 22Suyupi llapan provinciakunamantaq qelqakunata apachirqan, sapankaq rimayninku rimaypi, qelqayninku qelqapi, llapan qharikuna wasinkupi kamachikunankupaq kamachispa.

will be added

X\