Eclesiastés 9

1Tukuy chaykunata allinta yuyaykuspaymi, sut'ita repararqani chaninkaqkunaqpas yachayniyoqkunaqpas ruwasqankuqa Diospa makinpi kasqanta. Chaypas runaqa manan yachanchu munakuychus cheqnikuychus payta suyashasqanta. Pitapas imapas sucedellanmanmi. 2Chaymi llapatapas kaqtakama suceden: chanin runatapas mana chanin runatapas, allin runatapas millay runatapas, ch'uya runatapas mana ch'uya runatapas, sacrificiokuna haywaqtapas sacrificiokuna mana haywaqtapas, allin runatapas huchallikuqtapas, juraqtapas jurayta manchakuqtapas. 3Kay pachapi tukuy imaymana ruwaykuna ukhupin kay mana allin kan: kaqtakaman llapa runata suceden. Runakunaq sonqonpas mana allinkaqwan hunt'aykusqan kashan, hinallataq sonqonpas tukuy kawsasqan p'unchaykuna waq'ayaywan hunt'a kashan, chaymantataq aya p'ampanaman apapunku. 4Kawsaqkunapaqqa kanraqmi suyakuy, aswan allinmi kawsashaq alqo, wañusqa leonmantaqa. 5Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu, manañataq imatapas chaskinkuñachu, paykunaqa qonqasqañan kapunku. 6Munakuyninkupas cheqnikuyninkupas envidiakuyninkupas tukukapunñan, manañan astawanpas kay pachapi ima ruwanatapas ruwaysikunkuñachu. 7Phaway, t'antaykita kusisqa mikhuykamuy, kusisqallataq vinoykitapas ukyaykamuy, Diosqa ruwashasqaykikunatan: “Allinmi”, ninña. 8Yuraq p'achallawanpuni p'achakuy, umaykitapas q'apaq aceitewan hawikullaypuni. 9Munakusqayki warmiwan kusisqa kawsakuy, kay pachapi Diospa qosqasuyki sapa p'unchay yanqalla kawsayniykipi. Chayllan kay pachapi sayk'uywan llank'asqaykimanta tupaqniykiqa. 10Imapas ruwanaykipaq kaqtaqa k'uchilla ruway, maymanchus rishanki chay Wañuy-pachapiqa manan ima llank'anapas yuyanapas reqsinapas yachanapas kanchu. 11Kay pachapiqa rikullarqanitaqmi: Manan allin phawaqkunachu phawaspaqa llallinku, manan kallpasapakunachu awqa-tinkuypiqa atipan, manan yachayniyoqkunachu t'antayoqpas, manan allin yuyayniyoqkunachu qhapaqkunapas, manan allin yachaqkunachu sumaq chaskisqapas, aswanpas sapankan imaynapipas rikukunku. 12Manan runaqa imayna tiempochus tupamunanta yachakunchu. Imaynan challwakunapas millay llikapi hap'ichikunku, imaynan phalaq animalkunapas toqllapi hap'ichikunku, ahinatan runapas qonqaylla payman chayaqtin millay tiempopi hap'isqa rikukunqa. 13Kay pachapiqa kay yachaytapas rikullarqanitaqmi, chaymi hatuntaraq qhawarichiwarqan: 14Huk huch'uy llaqtallan karqan, chaypitaq pisi runalla karqan. Chay llaqta contrataq atiyniyoq rey hamurqan, hinaspan muyuykuspa haykunanpaq hatun seqanakunata sayarichirqan. 15Chay llaqtapitaq huk wakcha runa tiyarqan, ichaqa yachayniyoqmi karqan, paymi llaqtata yachayninwan qespichirqan, manataqmi pipas chay wakcha runata yuyarirqanchu. 16Chaymi ñoqa nirqani: Aswan allinmi yachayniyoq-kay kallpasapa kaymantaqa, nispa. Chaywanpas, wakcha runaq yachayninqa pisicharparisqan karqan, rimasqankunapas mana uyarisqan karqan. 17Aswan uyarisqan yachayniyoqkunaq samp'alla rimasqan mana yuyayniyoqkuna ukhupi kamachikuqpa qaparkachasqanmantaqa. 18Aswan allinmi yachayqa maqanakuna armakunamantapas, ichaqa huk runaq pantasqallanmi ancha allinkaqta waqllichin.

will be added

X\