Eclesiastés 7

1Aswan allinmi sumaqpaq hap'isqa kay, q'apaq hawinamantaqa. Aswan allinmi wañukapuy p'unchay nacemuy p'unchaymantaqa. 2Aswan allinmi wañuqpa wasinman riy q'ochukuna wasiman riymantaqa, wañuyqa llapa runaq p'uchukaynin kasqanrayku. Kawsashaqqa chaytan yuyarinan. 3Aswan allinmi waqay asikuymantaqa, llakisqa uyaña kan chaypas sonqonqa kusikunmi. 4Yachayniyoqqa wañuypin yuyan, mana yuyayniyoqmi ichaqa kusikuyllapi yuyan. 5Aswan allinmi yachayniyoqpa anyaykuyninta uyariy, mana yuyayniyoqkunaq alabasqanta uyariymantaqa. 6Mana yuyayniyoqpa asisqanqa q'onchapi p'arararaspa rawraq khiska hinan. Chaypas yanqallataqmi. 7Yachayniyoq hukkunata sarunchan chayqa, pisi yuyayniyoqmanmi tukupun, lluk'iykuypas sonqontan waqllichin. 8Aswan allinmi imakunaqpas tukukuynin qallariyninmantaqa. Aswan allinmi muchukuq sonqo kay, hatunchakuq sonqo kaymantaqa. 9Ama sonqoykipi usqhaylla phiñakuychu, phiñakuyqa mana yuyayniyoqkunaqmi. 10Aman hayk'aqpas ninkichu: ¿Imanaqtintaq ñawpa p'unchaykunaqa kay p'unchaykunamanta aswan allin karqan? nispaykiqa. Manan chayqa yachaywan tapukuychu. 11Yachayniyoq qhapaq kayqa allinmi, allintaqmi kay pachapi tiyaqkunapaqpas. 12Yachayniyoq kaypas qolqeyoq kaypas runatan waqaychan, yachayniyoq kaymi ichaqa runata allinta kawsachin. 13Qhawariy Diospa ruwasqanta. ¿Pitaq paypa q'ewisqanta cheqanyachinman? 14Allinkaq p'unchaypi allinkaqwan q'ochukuy, mana allin p'unchaypitaq allinta qhawariy, Diosmi iskaynintapas paqarichin. Chay hinaqa manan pipas yachanchu qhepaman imapas kanantaqa. 15Yanqa kawsasqay p'unchaykunapin kay iskayta rikurqani: Kanmi chanin runa, allin kaqkunata ruwashaspa wañupuq, kallantaqmi mana chanin runa, mana chanin kaqkunata ruwashaspa unayta kawsaq. 16Ama sinchi chanin kasqaykita yuyaychu, ama sinchi yachayniyoqman tukuychu, ¿imanaqtintaq waqllipuwaqrí? 17Ama sinchi mana allinta ruwaqchu kay, ama mana yuyayniyoqpaschu kay. ¿Imanaqtintaq manaraq wañunaykipi wañupuwaq? 18Allinmi chanin-kayta hap'iyqa, mana allin kaqtapas mana kachariyqa. Ichaqa Diosta manchakuqpaqmi tukuy imapas allillan kanqa. 19Yachayqa hamawt'atan aswan atiyniyoqman tukuchin huk llaqtapi chunka kamachikuqkunamantapas astawanraq. 20Kay pachapiqa manan allinkaqllatapuni ruwaq runaqa kanchu, mana hayk'aq huchallikuq chanin runapas manan kanchu. 21Ama tukuy imaymana rimasqatapas uyariychu, paqtan kamachiykiq mana allin nisqasuykita uyariwaq. 22Qanpas allintan yachakunki may askha kutita hukkunamanta mana allin rimasqaykita. 23Lliw kaykunatan yachaywan t'aqwirqani: Yachayniyoqmi kasaq, nispa. Yachaymanmi ichaqa mana aypayta atirqanichu. 24Imachus kawsay kasqanqa mana entiendey atiymi. Sinchi sasan aypanapaq, manan pipas taripayta atinmanchu. 25Chay hinaqa, entiendeyta munaspaymi tukuy sonqo t'aqwispa maskharqani yachaytapas, imaynachus imakunaq kasqantapas. Hinan yacharqani mana yuyayniyoq-kayqa mana allin kasqanta, millay kawsaypas waq'ayay kasqanta. 26Wañuymantapas aswan millaytaqa waqllichiq warmitan tarirqani, payqa llika hinan, sonqonpas toqlla hinan, makinpas cadena hinan. Diospa sonqonpaq hina allin kawsaqqa manan chay warmiq makinman chayanqachu, huchallapi kaqmi ichaqa llikanwan hap'ichikunqa. 27Predicadormi nin, kaytan tarini: Imaynachus imakunaq kasqantapas yachanaypaqmi sapankata ch'ulla-ch'ullamanta t'aqwirqani. 28Maskhaspaymi manaraq tarinichu, waranqa qharikuna ukhupin huk qharillata tarirqani. Llapa warmikuna ukhupin ichaqa manapuni huk warmillatapas tarirqanichu. 29Kayllatan tarirqani: Diosqa runataqa chanintan ruwarqan, runataq ichaqa askha sasachakuykunata paqarichirqan.

will be added

X\