Eclesiastés 6

1Huk mana allintan kay pachapi rikurqani, runakunapaq sasa kasqanta: 2Diosmi runaman qon qhapaq kaykunata, kaqniyoq kayta, respetasqa kaytapas, paypaqqa tukuy ima munasqanmi kan, ichaqa Diosmi mana munanchu chaykunawan paypa q'ochukunanta, aswanpas wak runan chaykunawanqa q'ochukun. Chaypas yanqan, khuyay llakikuymi. 3Runaqa pachak wawayoqña kanman chaypas, askha watataña kawsanman chaypas, unay watayoqña kanman chaypas, manataq allinkaqwan q'ochukunmanchu, manataq allin p'ampasqapaschu kanman chayqa, ñoqan nini: Sullusqa wawan chay runamantaqa aswan kusisamiyoq, nispa. 4Chay wawaqa yanqapaqmi hamun, tutayaqpitaq ripun, sutinpas laqhayaqpa pakasqanmi kapun. 5Manan intitapas rikurqanchu, imatapas yacharqanchu, chaywanpas chay runamantaqa sullusqa wawan aswan allintaraq samakunqa. 6Chay runaña iskay waranqa watata kawsanman manataq kaqninkunawanpas q'ochukunmanchu chayqa. ¿Manachu llapapas kaq cheqasllamantaq ripunku? 7Runaq tukuy llank'asqanqa mikhunallanpaqmi, chaypas manan yarqayninqa thasnukunchu. 8¿Imapitaq yachayniyoqqa mana yuyayniyoqmanta aswan allin? ¿Imatataq wakcha runaqa tarin, runamasinkunaq qayllanpi allintaña purin chaypas? 9Aswan allinmi ñawiwan rikuyqa yuyayllapi munapakuymantaqa. Chaypas yanqan, wayra hap'iykuy hinallan. 10Kunan kaqqa sutiyoqñan karqan, yachakuntaqmi imachus runaqa kasqanpas. Manan mayqen runapas paymanta aswan atiyniyoqwanqa churanakuyta atinchu. 11Cheqaqtapunin askha rimasqapiqa yanqa askha thawtiykuna kallantaq. Chaywanpas, ¿imatan runaqa tarin? 12Chay hinaqa, manan pipas yachanchu imachus yanqa kawsaynin p'unchaykunapi runaq allinninpaq kasqanta, chaykunapin payqa llanthu hinalla kawsan. Chayri, ¿pitaq runaman willanqa imachus wañusqan qhepata kay pachapi kananta?

will be added

X\