Eclesiastés 5

1Dios yupaychana wasita rispaykiqa qhawarikuy maypichus kashasqaykita. Aswan allinqa makilla uyarinaykipaq asuykuymi mana yuyayniyoqkuna hina sacrificiota haywanapaq asuykuymantaqa, paykunaqa manan yachankuchu mana allin ruwashasqankuta. 2Ama hawan-ukhuntaqa rimaychu, ama sonqoykipipas Diosmanqa usqhayllata prometekuychu. Diosqa hanaq pachapin kashan, qantaq kay pachapi kashanki. Chayrayku, rimasqaykiqa pisilla kachun. 3Sinchi llakipakuywanmi mosqopakuypas kan, askha rimasqakunapin mana yuyaywan rimaypas kan. 4Diosman prometekuspaykiqa usqhayllata hunt'ay, Diostaqa manapunin mana yuyayniyoqkunaqa kusichinchu. Hunt'ay prometekusqaykitaqa. 5Aswan allinmi kanman mana prometekuyniyki, prometekushaspa mana hunt'anaykimantaqa. 6Ama simiykiwan huchaman tanqaykachikuychu, aman sacerdotetapas: Prometekusqayqa pantasqan karqan, ninkichu. ¿Imapaqtaq Diosta simiykiwan phiñachiwaq? Paymi makiykiq ruwasqanta waqllichinman. 7Ancha mosqopakuylla kan chayqa, askhayanmi yanqa rimasqakunapas. Qan ichaqa Diosta manchakuy. 8Mayqen llaqtapipas wakchakuna ñak'arishaqta rikunki, hinallataq chaninchaytapas kuskachaytapas waqllichisqata rikunki chayqa, aman chaywan musphankichu. Hatun kamachikuqtaqa huk aswan hatun kamachikuqmi qhawamushan, chay iskay hatun kamachikuqkunatapas aswan hatun kamachikuqraqmi qhawamushan. 9Chaywanpas hallp'aqa tukuypaqmi allin, kikin reypas hallp'aq rurunwantaqmi kawsan. 10Qolqeman sonqollikuqqa, astawanpunin munan, imaymanayoq kayta munaqpas, astawanraqmi tariyta munan. Chaypas yanqallataqmi. 11Imaymanapas askhayaqtinqa gastaqkunapas askhayallantaqmi. ¿Ima allinninpaqtaq dueñopaqqa kanqa chaykunata qhawariqtin? 12Llank'aqqa misk'itan puñun, askhataña pisitaña mikhun chaypas, qhapaqtan ichaqa askha kaqninkuna mana puñuchinchu. 13Huk sinchi mana allintan kay pachapi rikurqani: Huk runan qhapaq kaykunata waqaychan, chaykunan mana allinninpaq kapun. 14Chay qhapaq kaykunaqa mana allin ruwaykunapin usupun, churiyasqan wawanpaqpas manan imapas qhepanchu. 15Imaynan mamanpa wiksanmanta q'alalla paqarimurqan, ahinallataqmi q'alalla kutipunqa. Manataqmi ima llank'asqantapas apanqachu, mana imallantinmi ripunqa. 16Kaypas sinchi mana allinmi: Imaynan kay pachaman hamurqan, ahinan kutipunqa. ¿Ima allinninpaqtaq may sasawan yanqapaq llank'asqanri? 17Hinaspapas, tukuy kawsasqan p'unchaykunapin laqhayaqpi kashan, sinchi llakikuywan, onqoywan, phiñakuywan ima. 18Kaytan ñoqa repararqani: Runaq kusikuyninqa, q'ochukuyninqa llank'asqanmanta mikhuyninmi, ukyayninmi. Diosmi chayta qorqan pisillata kawsasqan p'unchaykunapi ruwananpaq. Chaymi runaq tupaqninqa. 19Pi runamanchus Diosqa qon qhapaq kaykunatapas ima kawsaykunatapas chayqa, qollantaqmi chaykunamanta mikhunanpaq, tupaqninta chaskinanpaq, may sasawan llank'asqanmanta kusikunanpaq. Chayqa Diospa qosqanmi. 20Sonqonta Dios kusichiqtinmi, runaqa mana anchatachu yuyarin kawsasqan p'unchaykunata.

will be added

X\