Eclesiastés 4

1Rikullarqanitaqmi kay pachapi tukuy sarunchaykunatapas. Ñak'arishaqkunan waqasharqanku, manataq pipas paykunata sonqochaykuq karqanchu, muchuchiqninkutaqmi atiyniyoq kasharqanku, manataqmi pipas paykunamanta sayarikuq karqanchu. 2Chaymi ñoqaqa wañukapuqkunamanta nirqani: Paykunaqa aswan kusisqan kawsaqkunamantaqa. 3Iskayninkumantapas aswan kusisamiyoqqa kunankama manaraq naceqkunan, manan rikunkuraqchu kay pachapi millay ruwaykunata. 4Rikullarqanitaqmi envidianakuyqa tukuy llank'ayta tukuy ima tariyta paqarichisqanta. Chaypas yanqan, wayra hap'iykuy hinallan. 5Mana yuyayniyoqqa makintan oqllaykukun, payllatataq mana allinta ruwakun. 6Aswan allinmi pisi kaqllawan kusisqa kawsay askha kaqniyoq kaspa llakipakushaymantaqa. 7Kay pachapin huk yanqa kaytawan rikurqani: 8Kanmi mana piniyoq sapallan runa, manan churinpas wawqenpas kanchu. Manan hayk'aqpas chhikallantapas samarinchu, manataqmi qhapaq kayninkunata qhawaspanpas amikunchu. Manataq tapurikunchu: ¿Pipaqmi sayk'usqallaña llank'ashani? ¿Imanaqtintaq allinkaqtari mana usachinichu? nispaqa. Chaypas yanqan, sayk'uytaqmi kanpas. 9Aswan allinmi iskay runa huk runallamantaqa, aswan allintan llank'asqankumanta chaskinqaku. 10Hukkaqchus urman chayqa hukkaqninmi sayarichin. Ichaqa, ¡ay sapallan runamanta! Urmaqtinqa manan pipas aysariqnin kanqachu. 11Iskay puñuspaqa q'oñichinakunkun. Chayri, ¿imaynatan ch'ullallaqa q'oñirinman? 12Ch'ullallaqa atipachikunmanmi, iskayqa manan atipachikunqachu. Kinsanpasqa q'aytupas sasatan p'itikun. 13Aswan allinmi yachayniyoq wakcha wayna, yuyaychaykunatapas mana uyarikuq, mana yuyayniyoq machu reymantaqa. 14Waynaqa carcelmanta lloqsispa rey kayta atinmanmi, kamachikusqan suyupi wakchaña nacemurqan chaypas. 15Ichaqa kay pachapin rikurqani reypa rantinpi wak wayna kamachikunanpaq kashaqwan tukuy runa purishaqta. 16Mana yupay atinan kamachisqan runakunaqa karqan, ichaqa paykunaq wawankunaqa manan reywan kusisqachu kanqaku. Chaypas yanqan, wayra hap'iykuy hinallan.

will be added

X\