Eclesiastés 3

1Kay pachapiqa imaymanapaqmi tiempo kan, tukuypas maychus kananpin suceden: 2Kanmi nacena tiempo, wañuna tiempopas. Kanmi plantana tiempo, kallantaqmi t'irana tiempopas. 3Kanmi wañuchina tiempo, hampina tiempopas. Kanmi thunina tiempo, perqana tiempopas. 4Kanmi waqana tiempo, asikuna tiempopas. Kanmi lutokuna tiempo, tusuna tiempopas. 5Kanmi rumi ch'eqechina tiempo, rumi huñuna tiempopas. Kanmi abrazana tiempo, mana abrazana tiempopas. 6Kanmi maskhana tiempo, chinkachina tiempopas. Kanmi waqaychana tiempo, wikch'una tiempopas. 7Kanmi llik'ina tiempo, sirana tiempopas. Kanmi upallakuna tiempo, rimana tiempopas. 8Kanmi munakuna tiempo, cheqnikuna tiempopas. Kanmi hatun maqanakuy tiempo, sumaq kawsay tiempopas. 9¿Ima allintataq runari may sasawan llank'asqanmanta tarin? 10Ñoqan rikurqani Diosqa ruwashanankupaq runakunaman llank'ana qosqanta. 11Diosqa lliwtan tiemponpi sumaq tupaqta ruwarqan. Runamanqa qoykurqanmi wiñay-wiñay kaqkunapi yuyariy atiyta, chaypas runaqa manan llapanta entiendeyta atinchu Diospa qallariymanta tukukuykama ruwasqantaqa. 12Ñoqaqa yachanin, kawsashanankamaqa manan aswan allinqa runapaq kanchu, aswanpas kusikunallanmi, allinkaqllatapuni ruwanallanmi. 13Diospa qowasqallanchistaqmi mikhunchisña, ukyanchisña, tukuy llank'asqanchiswanña q'ochukunchis chaypas. 14Yachanin tukuy imapas Diospa ruwasqanqa wiñaypaq kasqanta. Manan chaymanqa imapas yapakunqañachu, manallataqmi pisiyachikunqañapaschu. Chhaynatan Diosqa ruwan runakuna payta manchakunanpaq. 15Kunan imachus kaqqa karqanñan, hamuq p'unchaypi imachus kanqa, chaypas karqanñan. Diosqa imachus karqanña chaytan kutichimunqa. 16Kay pachapiqa rikullarqanitaqmi chanin ruwaymantaqa mana chanin ruwaqta, kuskachaymantaqa mana allin ruwaqta. 17Chaymi sonqoypi nirqani: Chanin runatapas mana chanin runatapas Diosmi juzganqa, tukuy ruwananpaqpas tukuy imapaqpas tiempo kasqanrayku, nispa. 18Runamantapas sonqoypi nillarqanitaqmi: Chayqa hinapunin, runakunatan Diosqa probashan, paykunaqa animalkuna hina kasqankuta reparakunankupaq. 19Runapas uywapas kaq tukukapuynillayoqmi: runapas uywapas wañupuqllan, kaqkama kawsay samayniyoqmi kanku. Runaqa manan aswan allinchu uywamantaqa. Tukuy imapas yanqallan. 20Lliwmi kaq cheqasllaman ripun, llapallanmi ñut'u hallp'amanta ruwasqa karqan, llapallantaqmi ñut'u hallp'aman tukupunqa. 21¿Pitaq yachan runaq espiritun altoman wicharipusqanta, animalpa espiritunpas hallp'a pacha ukhuman uraykusqanta? 22Reparanin runapaq aswan allinqa llank'asqanwan kusikunan kasqanta, chaymi paypa tupaqninqa. Manan pipas paymanqa rikuchinqachu wañupusqan qhepata imachus kanantaqa.

will be added

X\