Eclesiastés 2

1Sonqoypin nirqani: Kunanqa kusikusaq q'ochukusaq imachus allin kasqanta yachanaypaq, nispa. Chaypas yanqallataqmi karqan. 2Chaymi asikuyta: Waq'ayaymi kanki, nirqani. Aycha kusichiytapas: Mana imapaq valeqmi kanki, nirqani. 3Sonqoypi yachaypas kashaqtinmi, cuerpoyta vinowan kusichiyta munarqani, mana yuyayniyoq-kayta reqsiytapas munarqani. Chaywanmi yachayta munarqani imakunachus runapaqqa allin ruwananpaq kasqanta. Runaqa kay pachapi pisi p'unchaykunallatan kawsan. 4Hatun ruwaykunatan ruwarqani, qhapaq wasikunatan ruwakurqani, uvas chakrakunatan llank'arqani. 5Huertakunatan t'ika kanchakunatan ruwakurqani, chaykunapin tukuy rikch'aq fruta sach'akunata plantarqani. 6Unu qochakunatan ruwakurqani mallkisqa sach'akunata qarpanaypaq. 7Qhari kamachikunatapas warmi kamachikunatapas rantirqanin, wasiypi naceq kamachiykunapas karqanmi. Kallarqantaqmi askha wakaykunapas ovejaykunapas, Jerusalenpi llapa ñoqamanta ñawpaqkaq tiyaqkunamantapas aswan askharaq. 8Huñullarqanitaqmi qolqetapas, qoritapas, reykunaq illankunatapas, suyuypa provinciankunapi chaniyoq illankunatapas. Karqanmi takipuqniy qharikunapas, takipuqniy warmikunapas, tiyaqmasiy askha warmiykunapas aychayta kusichinankupaq. 9Mentasqa runan karqani, Jerusalenpi llapa ñoqamanta ñawpaqkaq tiyaqkunamantapas aswanraq. Yachayniypas ñoqallawanpunin kasharqan. 10Ñawiypa rikusqantaqa manan hark'arqanichu, sonqoypa ima munasqantapas manan hark'arqanichu. Tukuy llank'asqaywanmi q'ochukurqani, chay q'ochukuymi tukuy llank'asqaymanta premioyqa karqan. 11Chaymantataq tukuy ruwasqaykunata qhawarirqani, may sasawan llank'aspa tarisqayta qhawarirqani, ichaqa tukuymi yanqakama wayra hap'iykuy hinalla karqan, mana imapaq valeqtaq kanpas. 12Qhawarillarqanitaqmi yachaytapas, waq'ayaytapas mana yuyayniyoq-kaytapas rikunaypaq. ¿Imatan huk reyqa huk reypa qhepanta ruwanman? Manan imatapas, aswanpas imachus ruwasqaña karqan chayllatan ruwanqa. 13Repararqanitaqmi yachayqa mana yuyayniyoq kaymanta aswan allin kasqanta, imaynan k'anchaypas laqhayaqmanta aswan allin kan chay hinata. 14Yachayniyoqqa tukuy imatan makilla qhawan, mana yuyayniyoqmi ichaqa laqhayaqpi hina purin. Chaypas ñoqaqa reparanin yachayniyoqtapas, mana yuyayniyoqtapas kaqtakama sucedenanta. 15Chaymi ñoqaqa sonqoyta nirqani: Imaynan mana yuyayniyoqta suceden, chhaynatachá ñoqatapas sucedewanqa. Chhaynaqa, ¿yachayniyoq kasqayqa ima allinniypaqtaq kanman? ¡Yanqan chaypas! 16Yachayniyoqmantapas mana yuyayniyoqmantapas manan hayk'aqpas yuyarikunqañachu, qhepa p'unchaykunapiqa tukuymi qonqasqa kapunqa, yachayniyoqpas mana yuyayniyoq hinallataqmi wañukapunqa, nispay. 17Chaymi kawsaytaqa cheqnikurqani, kay pachapi ruwasqakunaqa sasachakuylla kaqtin. Tukuy imapas yanqakaman, wayra hap'iykuy hinallan karqan. 18Ahinallataqmi kay pachapi may sasawan tukuy llank'asqayta cheqnikurqani, huk qhepay hamuqman chaykunata saqepunayta yachaspay. 19Chaytan yachaywan sinchi afanakuywan llank'arqani. Chayri, ¿pitaq yachan yachayniyoqchus icha mana yuyayniyoqchus tukuy llank'asqayta hap'inanta? Chaypas yanqallataqmi. 20Chaymi tukuy sasawan llank'asqaymanta llakikuqtiy sonqoy p'iti-p'itirqan. 21Runaqa yachaywanña, reqsiywanña, llank'ay yachaywanña llank'anman chaypas, mana chayta llank'aq runamanmi saqepunqa. Chaypas yanqallataqmi, sinchi mana chanintaq kanpas. 22Chayri, ¿imatan runaqa tarin chay tukuy sasachaywan kay pachapi llank'asqanmanta, sinchita llakipakusqanmantapas? 23Tukuy kawsasqan p'unchaykunaqa nanayllan, tukuy llank'asqanpas uma nanaymi. Manan tutapas yuyayninqa samaykunchu. Chaypas yanqallataqmi. 24Runapaq aswan allinqa mikhuyllanmi, ukyayllanmi, llank'asqanpipas kusikuynillanmi. Rikullanitaqmi chaypas Diospa qosqan kasqanta. 25Mana Dioswanqa, ¿pitaq mikhunman? ¿Pitaq q'ochukunman? 26Kusichiqnin runamanqa Diosmi yachaytapas, reqsiytapas, q'ochukuytapas qon, huchasapamantaqmi qon askha qhapaq kayta huñuspa waqaychananpaq, pichus Diosta kusichiqman chay qhapaq kayta qopunanpaq. Chaypas yanqan, wayra hap'iykuy hinallan.

will be added

X\