1 Wayna-sipasllaraq kashaspa Kamaqniykimanta yuyarikuy, sasa p'unchaykuna manaraq chayamushaqtin, hinallataq: Kunan kawsayqa manan ima kusikunaypaqchu, nispa ninaykipaq watakuna manaraq chayamushaqtin. 2 Intipas, k'anchaypas, killapas, ch'askakunapas manaraq tutayaykushaqtin, phuyupas parasqan qhepata kashaqtinraq. 3 Chaypachan wasi qhawaqkuna khatatatanqa, kallpasapakunapas k'umuykapunqa, kutaqkunapas sayapunqan pisiyapusqanrayku, ventananta qhawamuqkunapas ayphayapunqan. 4 Chaypachan calle punkupas wisq'akapunqa, molinoq kunrururuyninpas pisi-pisimantan ch'inyapunqa. Chaypachan urpikunaq takisqan pisillataña uyarikunqa, wakin takisqakunataq manaña uyarikunqañachu. 5 Chaypachan qhatapas mancharikuna kanqa, manchapakuykunan ñanpi kanqa. Almendropas yuraqtan t'ikarinqa, t'isku-t'iskupas sasatañan suchunqa, manan yarqachikuypas kapunqañachu. Runaqa wiñay tiyananmanmi ripushan, waqapuqninkunapas callekunapiñan purishanku. 6 Kamaqniykita yuyarikuy qolqe q'aytu manaraq p'itikushaqtin, qori mankapas manaraq p'akikushaqtin, p'uyñupas pukyu patapi manaraq ñut'ukushaqtin, p'uytumanta aysana waskhapas manaraq p'itikushaqtin. 7 Chaypachan ñut'u hallp'aqa hallp'aman tukupunqa imaynachus ñawpaq karqan hina, samaytaq qomuqnin Diosman kutipunqa. 8 Predicadormi nin: ¡Yanqapunin! ¡Qasipunin! ¡Tukuy imapas yanqapunin! nispa. 9 Predicadorqa yachayniyoq kaspanmi yachayta llaqtaman yachachirqan. Hinallataq askha rikch'anachiy simikunatapas allinta yuyaymanaspa t'aqwirqan, hinaspan t'aqa-t'aqata churarqan. 10 Predicadorqa munarqanpunin sumaq simikunata tariyta, hinaspan allin cheqaq simikunata qelqarqan. 11 Yachayniyoqkunaq siminqa t'urpukuq hinan, huk michiqpa uywakunata watananpaq allin takasqa takarpukuna hinan. 12 Churilláy, huk kunaykuytawanraq uyariykuy. Manan askha qelqakunata qelqayqa tukukunchu, sinchita qelqata yachaypas sayk'uchikunmi. 13 Tukuy rimasqa simikuna uyarisqaykiq tukukuyninqa kaymi: Diosta manchakuy, kamachikuyninkunatapas hunt'ay, chaypunin runaq ruwananqa. 14 Diosqa tukuy ima ruwasqanchismantan cuentata mañawasun, allin kaqkunamantapas mana allinkaqkunamantapas, watuwasunmi, pakallapi ruwasqanchismantapas watuwasunmi.
