Eclesiastés 10

1Imaynan wañusqa ch'uspikunaqa sumaq q'apaq hawinata millayta asnachan, ahinatan huk chhikan mana yuyayniyoq-kaylla yachayniyoqta, allinpaq qhawasqa kaqta waqllichin. 2Yachayniyoqpa sonqonqa allinkaqmanmi k'askakun, mana yuyayniyoqpa sonqonmi ichaqa mana allinkaqman k'askakun. 3Mana yuyayniyoqqa ñanta purishaspapas mana yuyayniyoq kasqantan rikuchikun, llapa runamanmi mana yuyayniyoq kasqanta rikuchikun. 4Kamachikuqchus phiñarikusunki chayqa, imachus ruwanaykita ama saqepuychu, samp'ayaykuyqa hatun pantaykunatan hark'an. 5Huk mana allintan kay pachapi rikurqani, chaytaqmi kamachikuqkunamanta paqarimun. 6Mana yuyayniyoqqa hatun kamachikunapi churasqan kashan, qhapaqkunan ichaqa wakcha tiyanapi tiyashanku. 7Kamachikunatan caballopi puriqta rikurqani, kamachikuqkunatataq kamachi hina chakipi purishaqta. 8T'oqota hasp'iqqa chaymanmi urmaykunqa. Perqa q'asaqtapas mach'aqwaymi kaninqa. 9Rumita horqoqqa chaywanmi k'irikunqa. Llant'ata ch'eqtaqpas chaywanmi k'irikunqa. 10Hachachus molq'ayapun, manataq filoyachisqachu chayqa, aswan kallpawanmi waqtanqa, ichaqa yachaywan ruwaymi aswan allinqa. 11Mach'aqwaychus manaraq khurusqa kashaspa kanin chayqa, manan imatapas khuruqqa chaskinñachu. 12Yachayniyoqpa rimasqankunaqa ancha sumaqmi, mana yuyayniyoqpa rimasqankunan ichaqa pay kikinta waqllichin. 13Mana yuyayniyoq simikunatan rimayta qallarin, millay waq'a simikunata rimaspataq tukupunpas. 14Mana yuyayniyoqqa askhatan riman. Manan pipas yachanchu imachus qhepaman kanantaqa, ¿pitaq willakunman imachus qhepaman kananta? 15Mana yachayniyoqtaqa llank'anan sinchita sayk'uchin, chaymi maynintachus llaqtaman riytapas mana yachanchu. 16¡Ay, qanmanta, hatun suyu! ¿Imaninkin reyniyki waynalla kaqtin, umalliykikunapas pacha paqariymantapacha machaykunallapi mikhuykunallapi kaqtinku? 17¡Kusisamiyoqmi kanki hatun suyu, reyniyki allin respetasqa runaq churin kaqtin, umalliykikunapas mana machaspanku kallpata hap'inankupaq horasllanpi mikhuqtinku! 18Qellaq wasinmi q'echuykukun, maki oqllasqa runaq wasinmi sut'urin. 19Mikhunaqa kusikunapaqmi, vinoqa kawsayta q'ochuchinapaqmi, qolqetaqmi ichaqa tukuy imaymanapaq. 20Ama reymantaqa yuyaynillaykipipas millayta rimaychu, ama qhapaqtaqa puñunayki wasillapipas ñakaychu, phalaq animalkunan rimasqaykita apanman, raphrayoqkunan rimasqaykita willanman.

will be added

X\