Eclesiastés 1

1Predicadorqa Davidpa churinmi, Jerusalenpin rey karqan. Paymi nirqan: 2¡Yanqapunin! ¡Qasipunin! ¡Tukuy imapas tukukuqllan! 3¿Ima allintan runaqa llank'asqanmanta tarin tukuy sasachakuywan kay pachapi llank'aspa? 4Wakinmi wañupushan, wakintaq paqarimushan, kay pachan ichaqa kaqllapuni kashan. 5Intin lloqsimun, hinaspan haykupun, chaymantataq usqhaylla kutiripun maymantachus lloqsimusqanman, wakmanta lloqsimunanpaq. 6Wayran urayman wayramun, chaymantataq wichayman kutirin. Muyu-muyurispan wayraqa kasqan purinallanmantaq kutirinpun. 7Mayukunaqa llapallanmi lamar-qochaman haykun, lamar-qochataq manapuni hunt'anchu. Maymantachus mayukunaqa lloqsimun, chayllamantaqmi kutipunku wakmanta phawamunankupaq. 8Tukuy imaymanan sinchitapuni runata sayk'uchin, chaykunaqa sinchi askhan mana rimariy atiyraqmi. Manan ñawipas qhawaspa utinchu, manan ninripas uyarispa amikunchu. 9Imachus karqan, chayllataqmi kanqa, imachus ruwakurqan, chayllataqmi ruwakunqa, manan kay pachapiqa ima mosoqpas kanchu. 10¿Imallapas kanchu: Kayqa mosoqmi, ninapaq? Manapunin kanchu, unay watakunamantañan karqan, manaraq kashaqtinchismi karqanña. 11Ñawpa runakunaqa qonqasqañan kapunku, paqarimunqaku chaykunapas, qhepankuta nacemuqkunaq qonqasqallantaqmi kapunqaku. 12Ñoqa Predicadormi Jerusalenpi Israel suyu rey karqani. 13Tukuy sonqo maskhaspaymi yachaywan t'aqwirqani kay pachapi tukuy imaymana ruwasqata. ¡Diospa runakunaman qosqan llank'anaqa sinchi uma nanaymi! 14Tukuy imaymana kay pachapi ruwasqakunatan qhawarirqani, tukuy chaykunaqa yanqan, wayrata hap'iykuy hinallan kasqa. 15Q'ewisqa kaqqa manan kuskachakuyta atikunchu, mana hunt'asqa kaqpas manan yapakuyta atikunchu. 16Sonqoypin nirqani: Ñoqaqa hatunyaykapunin, Jerusalenpi tukuy ñoqamanta ñawpaqkaq kamachikuqkunamantapas astawanmi yachaykapuni, ñoqan ancha yachayniyoqpas yuyayniyoqpas kani, nispa. 17Yachaytapas, waq'ayaywan rimaytapas, mana yuyaywan rimaytapas allinta entiendenaypaqmi kallpachakurqani. Chaymi repararqani chaypas wayra hap'iykuy hinalla kasqanta. 18Askha yachaypiqa uma nanayllapunin kan, astawan yachaqqa, astawanmi muchunqa.

will be added

X\