Deuteronomio 9

1¡Israel runakuna, uyariychis! Jordán mayuta chimpanaykichis patapin kashankichis, qankunamanta aswan askha aswan atiyniyoq suyukunatan atipankichis, hinallataq sinchi alto perqawan muyuchisqa hatun llaqtakunatapas hap'ikapunkichis. 2Chaypi tiyaq runakunaqa Anac runakunan, paykunaqa hatuchachaqmi sinchi kallpayoqmi kanku, qankunaqa yachankichisñan kay rimayta: ¿Anac runakunawanri pitaq tupayta atinman? nispa, nisqata. 3Chay hinaqa, yachaychis Diosniykichis Señor Diospa ñawpaqeykichista rishasqanta, payqa ruphakuq nina hinan, ñawpaqeykichispitaq chay suyukunata atipaspa wañuchinqa. Chaymi qankunaqa usqhaylla paykunata wikch'unkichis wañuchinkichis Señor Diospa prometesqanman hina. 4Qayllaykichismanta Diosniykichis Señor Dios paykunata wikch'uqtinqa, ama yuyaykuychischu: Señor Diosqa chanin kasqanchisraykun kay hallp'ata qowanchis hap'ikapunanchispaq, nispaqa. Señor Diosqa chay suyu runakunataqa mana chanin kaqtinkun wikch'urqan. 5Chay hallp'ataqa hap'ikapunkichis manan chanin kasqaykichisraykuchu, manallataq allin kasqaykichisraykupaschu, aswanpas Diosniykichis Señor Diosqa chay runakunata wikch'urqan huchallikusqankumantan, ñawpa taytaykichis Abrahamman, Isaacman, Jacobman prometesqanta hunt'ananpaqmi. 6Allinta yachaychis, manan chanin kasqaykichisraykuchu Diosniykichis Señor Diosqa chay allin hallp'ata qosunkichis, qankunaqa mana kasukuq k'ullu runapunin kankichis. 7Amapuni qonqaychischu ch'inneqpi Diosniykichis Señor Diosta phiñachisqaykichistaqa. Egipto suyumanta lloqsimusqaykichis p'unchaymantapachan kayman chayamunaykichiskama sinchi mana kasukuq kankichis. 8Horeb orqollapiraqmi Señor Diosta phiñachirqankichis, chaymi payqa phiñakuspa wañuchiyta munarqasunkichis. 9Qankunawan Señor Diospa rimanakuynin p'alta rumi chaskiq orqoman wicharqani, hinaspan tawa chunka p'unchay tawa chunka tuta orqopi mana mikhusqa mana ukyasqa karqani. 10Hinan Señor Diosqa pay kikinpa qelqasqan iskay p'alta rumita qowarqan, chaypin qelqasqa karqan huñukuy p'unchay nina ukhumanta rimaykusqasuykichis llapan simikuna. 11Tawa chunka p'unchay tawa chunka tuta tukukuytataq Señor Diosqa qowarqan rimanakuynin iskaynin p'alta rumita, hinaspan niwarqan: 12Phaway, usqhaylla uraykuy, Egiptomanta horqomusqayki runakunan waqllipunku, kamachisqay simikunatapas manaraq imapi qonqarqonku, hinaspan unuyachispa huk rikch'ayta ruwakunku, nispa. 13Nillawarqantaq Señor Diosqa: Yachanin kay runakuna sinchi mana kasukuq k'ullu kasqankuta. 14Ama hark'awaychu, wañuchisaqmi paykunata, ahinapi manaña pipas paykunaq sutinta yuyarinqañachu. Aswanpas qanmantan paqarichisaq paykunamanta aswan askha aswan atiyniyoq llaqtata, nispa. 15Hinan nina rawrashaq orqomanta uraykamurqani, rimanakuy p'alta rumikuna apaykusqa. 16Qhawarispataq, Diosniykichis Señor Dios contra huchallikusqaykichista rikurqani. Qankunaqa unuyachispan torillo rikch'ayta ruwakusqankichis, manaraq imapin Señor Diospa yachachisqasuykichismanta waqllipurqankichis. 17Chaymi apamusqay iskaynin p'alta rumikunata pampaman ch'aqespa qayllaykichispi ñut'uta p'akirqani. 18Chaymantataq Señor Diospa ñawpaqenpi pampaman uyanpamanta wikch'uykukurqani, hinaspa tawa chunka p'unchay tawa chunka tuta mana mikhusqa mana ukyasqa ñawpaq kuti hina karqani. Chaytan ruwarqani qankunaq huchaykichis hawa, Señor Diosta chaywan phiñachisqaykichis hawa. 19Qankuna contra Señor Diosqa sinchi k'arakta phiñakuspa wañuchiyta munasuqtiykichismi mancharikurqani, ichaqa mañakusqaytan huktawan uyariykuwarqan. 20Hinallataq Señor Diosqa Aarón contra sinchita phiñakuspa wañuchiyta munarqan, chaymi paypaqpas mañapullarqanitaq. 21Chay millay torillo ruwakusqaykichistataq hap'ispa ninaman wikch'uykurqani, hinaspan ñut'uta kutaspa orqomanta uraykamuq mayuman hich'aykurqani. 22Phiñachillarqankichistaqmi Señor Diosta Taberapi, Masahpi, Quibrot-hataavapi ima. 23Kaqllataq Cades-barneapi Señor Diosqa: Riychis, hinaspa qosqay hallp'ata hap'ikapuychis, nispa nisuqtiykichispas, qankunaqa pay contra sayarispaykichismi kamachisqanta pisicharqankichis, manataq payman hap'ipakurqankichischu, manallataq kasurqankichispaschu. 24Qankunaqa reqsisqay p'unchaymantapachan sinchi rumi sonqopuni Señor Diospaq kankichis. 25Qankunata wañuchinanpaq Señor Dios yuyaykuqtinmi tawa chunka p'unchay tawa chunka tuta Señor Diospa ñawpaqenpi pampapi uyanpamanta wikch'uykukuspay kasharqani. 26Mañakurqanitaq: ¡Ay! Señor Diosníy, amapuni qan kikiykiq llaqtaykitaqa wañuchiychu, qanqa hatun atiyniykiwanmi qespichimurqanki, kallpaykiwanmi Egipto suyumanta horqomurqanki. 27Yuyarikuy Abraham, Isaac, Jacob kamachiykikunata. Kay llaqtaykiq mana kasukuyninta amaraq qhawariychu, amallataq mana chanin huchankunatapas. 28Paqtan Egipto suyupi ninkuman: Señor Diosqa manan atinchu prometesqan hallp'aman pusaykuyta. Paykunataqa cheqnikurqanmi, chaymi kaymanta horqorqan ch'inneqpi wañuchinanpaq, nispa. 29Cheqaqtapunin paykunaqa akllakusqayki llaqtayki, qanmi Egipto suyumanta hatun atiyniykiwan horqomurqanki, nispa.

will be added

X\