Deuteronomio 7

1Diosninchis Señor Diosqa hap'ikapunaykichis hallp'amanmi pusaykusunkichis, hinaspan qankunamanta aswan askha aswan kallpasapa qanchis suyu runakunata ñawpaqeykichismanta wikch'unqa: Het runakunata, Gerges runakunata, Amor runakunata, Canaán runakunata, Ferez runakunata, Hev runakunata, Jebus runakunatawan. 2Diosniykichis Señor Dios chay suyu runakunata qankunaman hap'ichiqtinmi, atipaspaykichis llapankuta ch'usaqyachinkichis. Amataq paykunawan rimanakunkichischu, amallataq khuyapayankichispaschu. 3Aman ususiykichista paykunaq churinkuwan casarachinkichischu, amallataq churiykichistapas ususinkuwan casarachinkichischu, paykunawan ama aylluntin kanaykichispaq. 4Mana chayqa wawaykichistan Señor Dios servinankuta waqllichinqa, hinaspa wawaykichis wak dioskunata servinqaku. Hinan Señor Diosqa qankuna contra sinchita phiñakuspa ñawi ch'ipiq-niypi ch'usaqyachisunkichis. 5Ahinaqa, kay hinata ruwaychis: altarninkunata thuniychis, yupaychana saywa rumikunata p'akiychis, Asera diosankutapas ñut'uychis, idolonkutapas ruphachiychis. 6Qankunaqa Señor Diospaq t'aqasqa llaqtan kankichis, paymi akllarqasunkichis kay pachapi llapan llaqtakuna ukhumanta munakusqan llaqta kanaykichispaq. 7Señor Diosqa manan wakin suyukunamanta aswan askha kaqtiykichischu munarqasunkichispas akllarqasunkichispas, qankunaqa llapan llaqtakunamanta aswan huch'uyllan kankichis. 8Aswanpas Señor Diosqa munakuspanmi, ñawpa taytaykichisman juramentowan prometesqanta hunt'ayta munaspa, Egipto suyu reypa kamachin kashaqtiykichis atiyninwan horqomuspa qespichirqasunkichis. 9Chay hinaqa, yachaychis Diosniykichis Señor Diosqa cheqaq Dios, hunt'aq Dios kasqanta. Payqa munakuqninkunawan kamachikuyninta hunt'aqkunawan rimanakusqantan hunt'an, paykunataqa waranqa miraykaman munakushallanpuni. 10Payta sut'ita cheqnikuqkunatataq ichaqa mana suyaykuspa usqhaylla muchuchispa ch'usaqyachin. 11Chayrayku, kasukuychis hunt'anaykichispaq kamachisqay unanchaykunata, kamachikuykunata, chaninchaykunatapas. 12Kay unanchay simikunata uyarispaykichis kasukuspa hunt'ankichis chayqa, Diosniykichis Señor Diosmi ñawpa taytaykichisman prometesqanman hina rimanakuynintapas munakuynintapas qankunawan hunt'anqa. 13Hinaspa ñawpa taytaykichisman prometesqan hallp'api munakusunkichis, saminchasunkichis, mirachisunkichis. Wawaykichistapas saminchanqa, hinallataq vino, trigo, aceite cosechaykichistapas, chay hinallataq wakaykichispa ovejaykichispa uñankunatapas askhayachinqa. 14Manataq qharipas warmipas qankuna ukhupi mana wawayoqqa kanqachu, manallataq uywaykichispas mana uñayoqqa kanqachu. Qankunaqa llapa llaqtakunamanta Señor Diospa aswan saminchasqanmi kankichis. 15Señor Diosqa tukuy onqoykunatan qankunamanta karunchanqa, Egiptopi rikusqaykichis llapan millay onqoykunataqa manan qayllachimusunkichischu, aswanpas llapan qankuna cheqnikuqkunatan chay millay onqoykunawan muchuchinqa. 16Chayrayku, Diosniykichis Señor Diospa hap'ichisqasuykichis llapan llaqtakunata mana khuyapayaspa ch'usaqyachinkichis. Amataq diosninkuta yupaychankichischu, mana chayqa misk'anan kasunkichisman. 17Ichapas sonqoykichispi niwaqchis: Ñoqaykumanta aswan askhamá chay suyukunaqa, ¿imaynataq hallp'ankumanta wikch'uyta atiykuman? nispa. 18Chaywanpas ama paykunata manchakuychischu. Allinta yuyariychis Diosniykichis Señor Dios Egipto rey Faraonta llapan runankunatapas ruwasqanta. 19Qankunan rikurqankichis Egipto runakunaq sinchi muchusqankutapas, señalkunatapas, milagrokunatapas, hinallataq hatun atiyninwan Señor Diospa Egipto suyumanta horqomusqasuykichistapas. Chay hinatan Diosniykichis Señor Diosqa manchakusqaykichis llapan llaqtakunata ruwanqa. 20Hinallataq Diosniykichis Señor Diosqa paykunaman avispata kachaykunqa, wañuchinqataq qankunamanta pakakuspa kawsashaq qhepaqkunatapas. 21Ama paykunata manchakuychischu, Diosniykichis Señor Diosqa qankunawanmi kashan, payqa hatunmi manchanataqmi. 22Payqa chay suyukunatan pisimanta-pisi qayllaykichismanta wikch'unqa, hukpaqkama wikch'uwaqchis chayqa, manan allinchu kasunkichisman, phiña salqa animalkunachá qankuna contra askhayanman. 23Diosniykichis Señor Diosqa qankunamanmi chay suyu runakunata hap'ichisunkichis, paykunatataq q'aqchanqa llapanta tukunankama. 24Chhaynallataq reyninkutapas hap'ichisunkichis munasqaykichista ruwanaykichispaq, sutinkupas kay pachapi pasaqpaq qonqasqa kanankaman paykunata ch'usaqyachinkichis. Manan pipas qankuna contra qhalichakunqachu llapanta wañuchispa tukunaykichiskama. 25Diosninkuq rikch'ayninkunatan kanaykunkichis, amataq diosninku sumaqchasqa qoritapas qolqetapas munapayaspa hap'ikunkichischu, paqtan misk'ana kasunkichisman, Diosniykichis Señor Diospas chaytaqa cheqnikunmi. 26Aman wasiykichisman chay rikch'aykunata apankichischu ama chaykunawan kuska ñakasqa kanaykichispaq. Chaykunaqa ñakasqan, chayraykun qankunaqa sinchita cheqnikunaykichis.

will be added

X\