Deuteronomio 6

1Kaykunan Diosninchis Señor Diospa kamachikuyninkuna, yachachikuyninkuna, chaninchayninkuna ima, chaykunatan Señor Diosqa qankunaman yachachinaypaq kamachiwan, hap'ikapunkichis chay hallp'api hunt'anaykichispaq. 2Tukuy kawsasqaykichis p'unchaymi qankunapas, wawaykichiskunapas, nietoykichiskunapas Diosninchis Señor Diosta yupaychanaykichis, tukuy kunan kamachisqay kamachikuyninta yachachikuynintapas hunt'anaykichis, ahinapin unayta kawsankichis. 3Chay hinaqa, uyariychis Israel runakuna, chaykunata hunt'aychis. Ahinapin allillan kankichis, lecheq miel misk'iq akha kanan hallp'api, askha wawakunayoq kankichis, imaynan ñawpa taytaykichispa Señor Diosnin prometerqasunkichis hina. 4Uyariychis, Israel runakuna, Diosninchis Señor Diosqa ch'ullallan. 5Diosninchis Señor Diosta munakuychis tukuy sonqoykichiswan, tukuy almaykichiswan, tukuy kallpaykichispiwan. 6Sonqoykichispi waqaychaychis tukuy kay kamachisqaykunata, 7yachachillaychispuni wawaykichiskunaman, chaykunamanta rimapayallaychispuni wasipi kashaspa, purishaspapas, hinallataq puñuykushaspa, hatarishaspapas. 8Chay kamachikuykunata watakuychis makiykichisman mat'iykichismanwan yuyarinaykichispaq. 9Hinallataq qelqakuychis wasiykichis punku sayaq k'aspikunapi, llaqtaykichis punkukunapipas. 10Abraham, Isaac, Jacob ñawpa taytaykichiskunaman prometesqan suyumanmi Diosniykichis Señor Dios pusaykusunkichis. Chay suyupiqa mana sayarichisqaykichis sumaq hatun llaqtakunan kashan, 11mana hunt'achisqaykichis hunt'a kawsayniyoq wasikuna, mana t'oqosqaykichis unu p'uytukuna, mana tarpusqaykichis uvas chakrakuna, olivos chakrakunapiwan kashan. Chaykunata mikhuykuspa saksaykuspaqa, 12amapunin Señor Diosta qonqankichischu, paymi Egiptopi kamachi kashaqtiykichis horqomurqasunkichis. 13Señor Diosllatan yupaychankichis, pay sapallantan servinkichis, sutillanpitaqmi jurankichispas. 14Aman wak dioskunata yupaychankichischu, amallataq qorpaykichis llaqtakunaq diosninkutapas yupaychankichischu, 15mana chayqa, qankuna contran phiñakuynin rawrarinqa, hinan chay hallp'amanta wikch'usunkichis, payqa sienteq Diosmi, qankunawantaqmi kashan. 16Aman Diosniykichis Señor Diosta wateqankichischu, Masah ch'inneqpi wateqasqaykichista hinaqa. 17Makilla kasuychis Diosniykichis Señor Diospa kamachikuyninta, unanchayninta, chaninchaynintapas kamachisqasuykichisman hina. 18Señor Diospa munasqan allinkaqta chaninkaqta ruwaychis, ahinapin allillan kankichis, ñawpa taytaykichisman Señor Diospa prometesqan sumaq hallp'aman haykuspapas hap'ikapunkichis, 19Señor Diostaq llapan awqaykichiskunata qayllaykichismanta wikch'unqa, prometesqasuykichisman hina. 20Huk p'unchay wawaykichis tapusunkichis: ¿Imanaqtintaq Diosninchis Señor Diosqa kamachirqasunkichis kay kamachikuykunatapas, unanchaykunatapas, chaninchaykunatapas? nispa chayqa, 21kutichinkichis: Ñoqaykuqa Egipto suyupi rey Faraonpa kamachinmi karqayku, chaymantan Señor Diosqa hatun atiyninwan horqomuwarqanku. 22Payqa hatun musphay señalkunatan milagrokunatan ruwarqan, rey Faraón contra ayllun contrapiwan, chaykunatan rikurqayku. 23Ahinatan chaymanta horqomuwarqanku kay suyuman pusamuwanankupaq, hinaspa ñawpa taytanchisman prometesqanman hina qowanankupaq. 24Señor Diostaq kamachiwarqanku llapan kay kamachikuykunata hunt'anaykupaq, hinallataq payta manchakunaykupaq. Chayta ruwaspaykuqa allillanmi kasaqku, Señor Diosqa kawsayniykutapas waqaychawanqakun imaynan kunankama waqaychashawanku hinata. 25Chay hinaqa, Diosninchis Señor Diospa qayllanpi tukuy chay kamachikuykunata makilla hunt'asunchis paypa kamachikusqanman hina chayqa, Diosmi chaninpaq qhawariwasunchis, nispa.

will be added

X\