Deuteronomio 5

1Llapan Israel runakunata huñuykuspan Moisesqa nirqan: –Uyariychis, Israel runakuna, kunanmi willasqaykichis kamachikuykunata chaninchaykunata, allinta yachaqaychis hinaspa hunt'aychis. 2Señor Diosninchisqa ñoqanchiswanmi Horeb orqopi rimanakurqan. 3Manan taytanchiskunallawanchu rimanakurqan, ñoqanchiswanpas kaypi kunan kawsashaqkunawan rimanakullarqantaqmi. 4Orqo patapin Señor Diosqa nina ukhumanta pay kikin rimaykurqasunkichis. 5Ñoqataq Señor Dioswan qankunawan chawpipi kasharqani, paypa nisqanta qankunaman willanaypaq, qankunaqa manan orqoman wicharqankichischu ninata manchakuspaykichis. Señor Diostaq nirqan: 6–Ñoqan Diosniyki Señor Dios kani, Egipto suyupi kamachi kasqaykimanta horqomuqniyki. 7Aman ñoqamanta wak dioskunayoqchu kanki. 8Aman ima idolotapas, ima rikch'aytapas ruwakunkichu, hanaq pachapi kaqman rikch'akuqtapas, kay pachapi kaqman rikch'akuqtapas, kay pachaq ukhun unupi kaqman rikch'akuqtapas. 9Aman chaykunaman k'umuykukunkichu, amallataq chaykunata yupaychankipaschu, ñoqa Diosniyki Señor Diosqa sienteq Diosmi kani. Ñoqan cheqnikuwaqniy tayta-mamakunata huchallikusqankumanta muchuchini, hinallataq wawakunatapas, nietokunatapas, nietonkuq wawankunatapas. 10Munakuwaqniykunata kamachikuyniykunata hunt'aqkunatan ichaqa, waranqa miraykama munakushallanipuni. 11Aman sutiyta mana allinpaq hoqarinkichu, ñoqa Diosniyki Señor Diosqa sutiyta mana allinpaq hoqariqtaqa manan hinallatachu qhawasaq. 12Samana p'unchayta yuyariy ñoqapaq t'aqanaykipaq, imaynan ñoqa Diosniyki Señor Dios kamachirqayki hinata. 13Soqta p'unchaymi llank'anki, tukuy ima ruwanaykitapas ruwanki, 14qanchiskaq p'unchaymi ichaqa ñoqa Diosniyki Señor Diospaq t'aqasqa samana kanqa. Aman chaypiqa ima ruwanatapas ruwankichischu, qanpas, churiykipas, ususiykipas, qhari kamachiykipas, warmi kamachiykipas, toroykipas, asnoykipas, mayqen uywaykipas, llaqtaykipi tiyaq wak llaqtayoqpas. Chay hinapin qhari kamachiykipas warmi kamachiykipas qan hina samakunqa. 15Yuyariy Egipto suyupi kamachi kasqaykita, ñoqa Diosniyki Señor Dios ancha atiyniywan hatun kallpaywan chaymanta horqomurqayki, chaymi ñoqa kamachirqayki samana p'unchayta waqaychanaykipaq. 16Taytaykita mamaykita sumaqta respetay, imaynan ñoqa Diosniyki Señor Dios kamachirqayki hinata, unayta kawsanaykipaq, qosqayki chay hallp'apipas allillan kakunaykipaq. 17Aman pitapas wañuchinkichu. 18Aman wasanchankichu. 19Aman suwakunkichu. 20Aman runamasiykita llullakuspa tumpankichu. 21Aman munapayankichu runamasiykiq warminta, wasinta, hallp'anta, qhari kamachinta, warmi kamachinta, toronta, asnonta, runamasiykiq imantawanpas, nispa. 22Chay simikunatan Señor Diosqa kunkayoqta rimaykurqasunkichis orqopi llapa huñuykusqa kashaqtiykichis. Payqa rimarqan nina ukhumanta yanay-yana ati phuyu ukhumanta, manataq imatapas yapaykurqanchu. Hinaspan chay simikunata iskay p'alta rumipi qelqaspa ñoqaman qowarqan. 23Qankunataq tutayaq ukhumanta rimayta uyarirqankichis, orqotataq nina rawrashaqta rikurqankichis, chaymi llapa aylluykichispa umallinkuna, kurak runakuna ñoqawan rimaq hamuspanku 24niwarqanku: Cheqaqtapunin Diosninchis Señor Diosqa hatun-kayninta qhapaq-atiynintawan rikuchiwanku, nina ukhumantan kunkanta uyariyku, kunanmi rikuyku runawan Dios rimasqanta, chay runaq mana wañusqantapas. 25Chay hinaqa, ¿imanaqtintaq wañusaqku? Kay manchana ninaqa ruphawanqakupunin. Diosninchis Señor Diospa kunkanta uyarishallasaqku chayqa wañusaqkupunin. 26¿Mayqen runapas kawsashanchu nina ukhumanta kawsaq Diospa kunkanta uyarispa, imaynan ñoqayku uyarirqayku hinaqa? 27Aswanpas qan asuykuy, hinaspa Diosninchis Señor Diospa tukuy nisqasuykita uyariy, chaymantataq ñoqaykuman willawankiku, hinan tukuy nisqasuykita kasukusaqku, nispa. 28Señor Diostaq rimapayawasqaykichista uyarispa niwarqan: Uyarinin kay runakunaq rimapayasqasuykita, allinmi tukuy rimasqanku. 29¡Allinchá kanman chay hina sonqollayoq kankuman chayqa! Maytan munayman yupaychawanankuta, kamachikusqay simitapas tukuy kawsasqanku p'unchay hunt'anankuta, paykunapas wawankupas allillanpuni kawsanankupaq. 30Phaway, hinaspa nimuy: Karpaykichiskunaman kutipuychis, nispa. 31Qantaq ichaqa ñoqawan qhepakuy, tukuy kamachikuyniyta, yachachikuyniyta, chaninchayniytawan yachachisqayki, chaymantataq paykunaman yachachinki, hap'ikapunankupaq qonay hallp'api hunt'anankupaq, nispa. 32Chay hinaqa, paqtataq Diosninchis Señor Diospa kamachisqasuykichista mana hunt'awaqchischu, kasukuychis ama pañamanpas lloq'emanpas t'aqakuspa. 33Señor Diosninchispa ñanninta puriychis yachachisqasuykichista kasuspa, ahinapin kawsankichis, allillan kankichis, hap'ikapunkichis chay hallp'apipas unayta kawsankichis.

will be added

X\