Deuteronomio 34

1Moisesqa Moab pampamantan Nebo orqoman wicharqan, Jericowan qhawanakuypi kashaq Pisga orqo pataman. Chaymantapachan Señor Diosqa qhawarichirqan tukuy Galaad hap'iyta Dan suyukama, 2Neftalipa, Efrainpa, Manasespa hallp'ankunatawan, Judapa llapan hallp'anta inti haykuy lamar-qochakama, 3hinallataq Neguevta palmera sach'akunayoq Jericó llaqtamanta Zoar llaqtakama, (Jordán qheswa wayq'otapas). 4Nirqantaq: –Abrahamman, Isaacman, Jacobmanwanmi jurarqani suyuta mirayninkuman qonaypaq, chaymi kay suyu. Munarqanitaqmi rikunaykita, manaña chayman haykunkichu chaypas, nispa. 5Hinan chaypi Diospa kamachin Moisesqa Moab hallp'api wañukapurqan, Señor Diospa nisqanman hina. 6Chaymi Bet-peorwan qhawanakuy huk wayq'opi Señor Diosqa payta p'ampapurqan, ichaqa manan pipas chay p'ampasqanta hayk'aqpas rikunchu. 7Moisesqa pachak iskay chunka watayoq kashaspanmi wañukapurqan, qhalin karqan, ñawinpas allintaraqmi rikurqan. 8Israel runakunan Moab pampapi Moisesmanta waqarqanku kinsa chunka p'unchayta, chay hinapin wañusqanmanta waqayta hunt'arqanku. 9Nunpa churin Josueqa allin yachayniyoqmi karqan, payta Moisesqa umallita churasqanrayku. Israel runakunataq Josueta kasurqanku, Moiseswan Señor Diospa kamachisqantataq hunt'arqanku. 10Manañan hayk'aqpas Israelpi huk profeta Moisés hina karqanñachu, manan pay hina Señor Dioswan uya-uya pura rimaqqa karqanñachu. 11Manan mayqen profetapas pay hina tukuy señalkunata milagrokunatapas ruwarqanchu, Señor Diosmi Moisesta kamachirqan milagrokunata ruwananpaq Egipto rey Faraón contra, oficialninkuna contra, suyun contra ima. 12Manallataq pipas atiyninman ayparqanchu, ancha hatun chanin ruwaykunata llapan Israelpa rikushasqan ruwasqanmanpas.

will be added

X\