1 –Hanaq pacha, rimasqayta uyariy, kay pacha, simiykunata uyariy. 2 Yachachikuyniyqa para hinan chayanqa, simiykunaqa sulla hinan kanqa, q'achupi iphu para hinan kanqa, pastopi unu sut'uy hinan kanqa. 3 Señor Diospa sutintan hatunchasaq, ¡Diosninchisqa hatunmi! niychis. 4 ¡Hatun Qaqa hinan Señor Diosqa! Hunt'asqan ruwasqankunaqa, chaninmi ruwasqankunaqa, hunt'aq Diosmi payqa, mana waqlliqmi payqa, chanintaq cheqaqtaqmi payqa. 5 Qankunaqa waqllinkichismi, manan: Wawáy, ninapaq hinachu kankichis, q'otukuq millay runakunan kankichis. 6 ¿Chaywanchu Señor Diosta kutichinkichis, mana yuyayniyoq asno runakuna? Payqa taytaykichismi, kamaqniykichismi, paymi suyuman tukuchirqasunkichis. 7 Ñawpa watakunata yuyariychis, ñawpa tiempokunata qhawariychis, taytaykichista tapukuychis willanasuykichispaq, kurak runakunata tapukuychis sut'inchanasuykichispaq. 8 Ancha Hatun Diosmi llaqtakunaman herenciata qospa, runakunaman tiyanata rakispa, llaqtakunaq qorpanta sut'ita churarqan hayk'achus Israelpa churinkuna kasqanman hina. 9 Señor Diospa tupaqninqa llaqtanmi, herencianqa Jacobmi. 10 Señor Diosmi llaqtanta tarirqan ch'inneqpi, wayraq waqtasqan ch'aki hallp'api, paykunata p'istuykuspa uywarqan, ñawi rurunta hinan waqaycharqan. 11 Imaynan ankaqa q'esanta t'aqpin, chiwchinkunata phalayta yachachinanpaq, raphranta mast'arispa chiwchinkunata chaskinanpaq, wichayman hoqarinanpaq, chay hinatan Señor Diosqa llaqtanta ruwan. 12 Sapan Señor Diosllan llaqtanta pusarqan, manan wak diosqa yanaparqanchu. 13 Suyuq alto orqonkunantan pusarqan, campo rurukunatan mikhuchirqan, qaqakunapi miel misk'itan mikhuchirqan, rumi-rumipi wiñaq sach'amantan aceiteta qorqan. 14 Wakankumantan lluklluta mikhurqanku, ovejankumantan lecheta ukyarqanku. Allinnin borregokunata, orqo cabrakunata mikhurqanku, Basanmanta wiray-wira anejokunata mikhurqanku, hinallataq granza trigotapas yawar-puka vinotapas ukyarqanku. 15 Jesurunmi ichaqa wirayaspa hatunchakurqan, sinchitan wirayarqan llusk'ay-llusk'ata, Kamaqnin Diostan wikch'upurqan, hatun Qaqantan qespichiqnintan pisicharqan 16 Diostan sinchita phiñachirqanku wak dioskunata yupaychaspanku, millay ruwaykunawan qhellichakuspanku. 17 Supaykunamanmi sacrificiota haywarqanku, manataq Diosmanchu, aswanpas mana reqsisqanku dioskunaman. Chayllaraq rikhuriq mosoq dioskunaman, ñawpa taytankuq mana hayk'aq yupaychasqan dioskunaman haywarqanku. 18 Qankunaqa Hatun Qaqa Taytaykichistan saqepurqankichis, kamaqniykichis Diostan qonqapurqankichis. 19 Chayta rikuspanmi Diosqa sinchita phiñakurqan, chaymi churinkunata ususinkunata pisicharqan, 20 nirqantaq: Paykunataqa manan qhawarisaqchu, ¡imallatas ruwanqaku! Millay runakunan kanku, wasanchaq wawakunan kanku. 21 Mana valeq dioswanmi renegachiwarqanku, idolonkuwanmi phiñachiwarqanku. Chaymi ñoqapas mana valeq llaqtawan paykunata renegachisaq, mana yuyayniyoq llaqtawan phiñachisaq. 22 Nina hinan phiñakuyniy rawrarinqa, rawranqataq Wañuy-pachakamaraq, ruphanqataq kay pachatapas rurunkunatapas, orqokunaq teqsintapas q'olaykunqa. 23 Tukuy mana allinkunawanmi paykunata muchuchisaq, tukuy wach'inaykunatan paykunaman chanqasaq. 24 Yarqaymantan wañunqaku, fiebrewan millay onqoywanmi wañunqaku, salqa animalkunatan kachamusaq, venenoyoq mach'aqwaykunatan kachamusaq. 25 Callekunapin espadawan wawakuna wañunqaku, wasikunapitaq llaksakuy q'aqchanqa. Waynakunan sipaskunan wañunqa, yuyaqkunan ñuñuq wawakunan wañunqaku. 26 Ñoqaqa yuyaykurqani karuman ch'eqechiyta, sutinkuta kay pachapi ch'usaqyachiyta. 27 Manataqmi munarqanichu awqankuq asikunanta, manallataq umata hoqarispa: Manan Señor Dioschu chaytaqa ruwarqan, ñoqanchismi atiyninchiswan ruwanchis, nispa ninankutapas. 28 Israelqa yuyay chinkasqa llaqtan, manan yuyaynin kanchu. 29 Yachayniyoq kaspaqa entiendenkumanmi, qhawarinkumanmi imaynachus tukukuyninku kananta. 30 ¿Imaynan huk runalla waranqa runata qatirinman? ¿Imaynataq iskay runalla chunka waranqa runata atipanman? Hatun Qaqanmi hap'ichirqan, Señor Diosmi paykunata atipachirqan. 31 Awqanchiskunaqa allintan yachanku hatun qaqankuqa mana Hatun Qaqanchis hinachu kasqanta. 32 Paykunaqa uvas yura hinan kanku, chay yuraqa Sodoma uvas yura hinan, Gomorra chakramanta apamusqa. Uvasninkuqa venenoyoqmi, rurunkuqa sinchi p'osqon. 33 Vinonkupas mach'aqwaypa venenonmi, picaqpa wañuchiq venenonmi. 34 Tukuy kaykunatan pakashani, qhapaq kayta hinan waqaychashani: 35 Ñoqan awqakunata vengakuqqa kani, ñoqan chaskinanta pagaqqa kani, urmananku p'unchaymi hamushanña, ch'usaqyananku p'unchaymi qayllamushanña, wañunanku p'unchaymi usqhamushanña. 36 Señor Diosmi llaqtanta chaninchanqa manaña kallpan kapusqanta rikuspa. Señor Diosmi serviqninkunata khuyapayanqa manaña pipas kallpayoq qhepasqanta rikuspa. 37 Señor Diosmi llaqtanta ninqa: ¿Maytaq diosniykichiskunari? ¿Maytaq pakakunaykichis qaqari? 38 ¿Maytaq sacrificioykichispa wiranta mikhuqkunari? ¿Maytaq vino hich'ay ofrenda chaskiqkunari? ¡Hatarichunku yanapaqniykichiskuna! ¡Hamuchunku waqaychaqniykichiskuna! 39 Qhawariychis, ñoqallan Diosqa kani, ñoqamanta wak dioskunaqa manan kanchu. Ñoqan kawsachini, wañuchinitaq, ñoqan k'irini, hampinitaq. Manan pipas atiyniymanta qespichinmanchu. 40 Wiñay kawsaq Dios kaspaymi makiyta haywarispa jurani: 41 K'ancharishaq espadayta afilasaq, atiyniywan kuskachasaq, awqaykunata vengakusaq, cheqnikuwaqniykunaman chaskinankuta qosaq. 42 Wach'inaykunata yawarchasaq k'irisqakunaq presokunaq yawarninwan, espadaywanmi wañuchisaq umalli awqaykunata, nispa. 43 Suyukuna, Señor Diospa llaqtanta hatunchaychis. Paymi vengakunqa kamachinkunaq wañusqanmanta, paymi awqankunaman chaskinankuta qonqa, llaqtantapas hallp'antapas pampachanmi, nispa. 44 Moisesmi Nunpa churin Josuepiwan llapa Israel runakunaman qayllaykuspa chay takita llapallanta rimarqan. 45 Moisesqa chay simikunata Israel runakunaman rimayta tukuspan 46 paykunata nirqan: –Allinta yuyaykuychis tukuy chay yachachisqaykunata, hinaspa wawaykichista kamachiychis tukuy chay kamachikuyta makilla hunt'anankupaq. 47 Manan yanqa rimayllachu chay simikunaqa, aswanpas kawsay qoqniykichismi. Chayta kasuspaykichismi unayta kawsankichis Jordán mayu chimpapi hap'ikapunkichis chay suyupi, nispa. 48 Chay kikin p'unchaymi Señor Diosqa Moisesta nirqan: 49 –Jericó llaqtawan qhawanakuy Moab suyupi Abarim orqo-orqota riy, hinaspa Nebo orqoman wichaspa qhawarinki Israel runakunaman hap'ikapunankupaq qosaq chay Canaán suyuta. 50 Chay Nebo orqo patapin wañukapunki, hinaspa ñawpa taytaykikunawan huñukapunki, imaynan wawqeyki Aaronpas Hor orqopi wañukapuspa ñawpa taytankunawan huñukapurqan hinata. 51 Zin nisqa ch'inneq Cades llaqta qaylla Meriba unupi iskayniykichis huchallikurqankichis, Israel runakunaq qayllanpin mana ch'uya kasqayman hinachu yupaychawarqankichis. 52 Chayraykun karullamanta qhawarinki Israel runakunaman qonay suyuta, manataq chay suyumanqa haykunkichu, nispa.
