Deuteronomio 31

1Moisesmi Israel runakunata nirqan: 2–Pachak iskay chunka watayoqñan kani, manan kallpaypas llank'anaypaq kanñachu. Señor Diospas niwarqantaqmi: “Manan Jordán mayuta chimpankichu”, nispa. 3Chaypas Diosninchis Señor Diosmi ñawpaqeykichista chimpanqa, paymi chay suyu runakunata ch'usaqyachinqa, hinan hallp'ankuta hap'ikapunkichis. Josuemi umalliykichis kanqa, Señor Diospa nisqanman hina. 4Señor Diosmi chay suyukunata ch'usaqyachinqa imaynan Amor runakunaq reyninku Sehontapas Ogtapas ch'usaqyachirqan hinata, paymi suyunkuta ch'usaqyachirqan. 5Señor Diosmi chay suyukunata hap'ichisunkichis, chaymi kamachisqayman hina lliwta paykunata ruwankichis. 6Kallpachakuychis, allin qhari kaychis, ama manchakuychischu, amataq paykunata manchapakuychischu. Diosninchis Señor Diosmi qankunawan kashan, manan payqa saqesunkichischu, manataq wikch'urparisunkichispaschu, nispa. 7Chaymantataq Moisesqa Josueta waqyarispa, llapa Israel runakunaq qayllanpi nirqan: –Kallpachakuy, allin qhari kay, qanmi kay llaqtata Señor Diospa prometesqan suyuman pusaykunki, paymi ñawpa taytaykichiskunaman jurarqan chay suyuta qonanpaq, qanpa kamachisqaykin Israel runakunaqa chay suyuta hap'inqaku. 8Señor Diosmi ñawpaqeykita rinqa, qanwantaq kanqapas. Manan saqerparisunkichu, manataqmi wikch'urparisunkipaschu, chhaynaqa, ama manchakuychu amataq pisi kallpayaychu, nispa. 9Moisesmi chay kamachikuy simita qelqarqan, hinaspa Señor Diospa rimanakuynin arcata apaq Leví ayllu sacerdotekunaman, Israel llapa kurak runakunamanwan qorqan. 10Kamachirqantaq paykunata: –Sapa qanchis wata tukuyta, manukuna pampachay wata chayamuqtin, Ch'uklla Ruway Fiestapi kay qelqata leenkichis. 11Diosniykichis Señor Dios akllakunqa chay cheqaspi llapa Israel runakuna huñukuqtin, paykunaq qayllanpi kay kamachikuy simita leenkichis. 12Llapan qharikunata, warmikunata, wawakunata, qankuna ukhupi tiyaq wak llaqtayoqkunata ima huñunkichis, kamachikuy simi leesqata uyarinankupaq. Ahinapin Diosniykichis Señor Dios manchakuyta yachanqaku, tukuy kay kamachikuy simikunatapas makilla hunt'anqaku. 13Chaymi chaykunata mana yachaq wawqeykichiskunapas uyarinqaku, hinaspan paykunapas Diosniykichis Señor Diosta manchakullanqakutaq, Jordán mayuta chimpaspa hap'ikapunkichis chay hallp'api tukuy kawsasqanku p'unchaykuna, nispa. 14Señor Diosmi Moisesta nirqan: –Wañukapunaykin qayllamushanña, chhaynaqa, Josueta waqyamuy, hinaspa Ñoqawan Tupana Karpapi iskayniykichis qayllaykamuwaychis Josueta kamachinaypaq, nispa. Hinan Moisesqa Josuepiwan Karpaman rirqanku. 15Chaypin Señor Diosqa paykunaman rikhurirqan sayashaq phuyupi, chay phuyun Karpaman haykuna patapi sayarqan. 16Señor Diostaq Moisesta nirqan: –Yaqañan ñawpa taytaykikuna hina wañukapunki, kay runakunataq qhellichakunqaku, hap'ikapunqaku chay suyu runakunaq diosninkuta yupaychaspa. Ñoqatataq saqerpariwanqaku, paykunawan rimanakusqaytapas p'akinqaku. 17Chayrayku, paykunapaq anchata phiñakuspa wikch'urparisaq, paykunataqa manañan qhawarisaqchu, hinan ch'usaqyachisqa kanqaku. Chaymi paykunaqa tukuy mana allintapas ñak'ariykunatapas muchuspa ninqaku: ¿Manachu kay mana allinkunata muchushanchis Diosninchis mana ñoqanchiswan kasqan hawa? nispa. 18Chay p'unchaymi ñoqaqa paykunata manapuni qhawarisaqchu, tukuy mana allin ruwasqankumanta, wak dioskunata yupaychasqankumanta ima. 19Chhaynaqa, kunan qelqaychis kay takita, hinaspa Israel runakunaman yachachiychis takinankupaq, ahinapin kay taki paykuna contra testigo kanqa. 20Ñoqan paykunata pusaykusaq lecheq miel misk'iq askha kanan hallp'aman, imaynan ñawpa taytankuman juramentowan prometerqani hina. Chaypin tukuy munasqankuta mikhuspanku wirayanqaku, chaymantataq wak dioskunata yupaychanqaku, ñoqatataq pisichawanqaku, rimanakusqaytapas p'akinqaku. 21Tukuy mana allinkunatapas ñak'ariykunatapas muchuqtinku, kay taki paykuna contra testigo kanqa, mirayninkun yuyarispa takinqapuni. Kunanmi prometesqay hallp'aman manaraq pusaykushaspa, yachaniña imatachus paykuna yuyaykushanku chayta, nispa. 22Hinan Moisesqa chay p'unchaypacha kay takita qelqarqan, hinaspataq Israel runakunaman yachachirqan. 23Nunpa churin Josuetan Señor Diosqa kamachirqan: –Kallpachakuy, allin qhari kay, qanmi kay Israel runakunata prometesqay suyuman pusaykunki, ñoqataq qanwan kashasaq, nispa. 24Moisestaq chay kamachikuy simikunata lliwta qelqayta tukuspa, 25Señor Diospa rimanakuynin arcata apaq Leví runakunata nirqan: 26–Hap'iychis kay kamachikuy simi qelqata, hinaspa Diosniykichis Señor Diospa rimanakuynin arcaman churaychis, chaypi qankuna contra willakuy kananpaq. 27Yachanin ñoqaqa sinchi k'ullu mana kasukuq kasqaykichista, kunan ñoqa kawsashaqtiyraq Señor Diosta mana kasunkichischu chayqa, ¡imaynaraqchá kankichis wañukapuqtiyqa! 28Kayman huñumuychis ayllu kurak runakunata kamachikuqkunatawan, kay simikunata allinta willanaypaq, hinaspa kay pachata hanaq pachatawan waqyasaq paykuna contra testigo kananpaq. 29Yachanin wañukapusqay qhepata sinchi mana chaninta ruwanaykichista, yachachisqay simikunamanta t'aqarikunaykichistapas. Qankunataq hamuq p'unchaykunapi ñak'ariykunata muchunkichis, Señor Diospa mana munasqan kaqkunata ruwaspa payta phiñachisqaykichis hawa, nispa. 30Chaymi Moisesqa llapa huñuykusqa Israel runakunaman kay takita qallariymanta tukukuykama rimarqan:

will be added

X\