Deuteronomio 30

1Willarqaykichisñan saminchaykunamantapas ñakaykunamantapas, tukuy chaykuna taripasuqtiykichismi Señor Dios ch'eqechisunkichis chay suyukunapi willasqayta yuyarinkichis. 2Chaypitaq qankunapas wawaykichiskunapas Señor Diosman kutirikunkichis, tukuy sonqo tukuy almataq payta kasunkichis kunan kamachishaykichis chayman hina chayqa, 3Diosniykichis Señor Diosmi wakmanta allinyachisunkichispas khuyapayasunkichispas, hinaspan ch'eqechisqasuykichis tukuy suyukunamanta huñumusunkichis. 4Kay pachapi sinchi karu llaqtakunamanña ch'eqechisqa kankichis chaypas, Diosniykichis Señor Diosqa maskhamusunkichismi, hinaspan wakmanta kutichimusunkichis. 5Ñawpa taytaykichispa hap'ikapusqan suyuman wakmanta kutichimuqtinmi qankunaqa chay suyuta hap'ikapunkichis, Señor Diostaq allinyachisunkichispas mirachisunkichispas ñawpa taytaykichismantapas astawanraq. 6Diosniykichis Señor Diosmi qankunamanpas mirayniykichismanpas kasukuq sonqota qosunkichis payta tukuy sonqo tukuy alma munakunaykichispaq, ahinapitaq kawsankichis. 7Paymi awqaykichista sarunchaqniykichistapas chay ñakaykunawan muchuchinqa. 8Qankunataq Señor Diosta wakmanta kasukunkichis, kunan kamachisqayman hinataq tukuy kamachikuyninkunata hunt'ankichis. 9Diosniykichis Señor Diostaq tukuy ruwayniykichispi allinyachisunkichis, hinan askha wawayoq askha uywayoq kapunkichis, askhataq cosechaykichispas kanqa. Señor Diosniykichistaq wakmanta anchata kusikunqa allinyachisqasuykichismanta, imaynan ñawpa taytaykichista allinyachispa kusikurqan hinata. 10Chaykunaqa kanqa, Señor Diosniykichispa kamachikuy qelqanpi kamachikuyninkunata unanchayninkunatapas kasukuspa hunt'aqtiykichismi, Señor Diosniykichisman tukuy sonqo, tukuy alma kutirikuqtiykichismi. 11Kay kamachikuy simiqa manan sinchi sasachu hunt'anaykichispaq, manataq karupipaschu kashan. 12Manan hanaq pachapichu kashan, chaychu niwaqchis: ¿Pitaq hanaq pachata wichapuwasun kamachikuy simita apamuspa willawaqtinchis hunt'ananchispaq? nispa. 13Manallataq lamar-qocha chimpapipaschu kashan, chaychu niwaqchis: ¿Pitaq lamar-qochata chimpapuwasun kamachikuy simita apamuspa willawaqtinchis hunt'ananchispaq? nispa. 14Manan chay hinachu, aswanpas Diospa siminqa sinchi qayllallaykichispin kashan, simiykichispi, sonqoykichispi, chhaynaqa, hunt'ay atinaykichispaqmi kashan. 15Kunanmi ñoqa qankunaman willaykichis kawsaymanta wañuymantawan, hinallataq allin kaymanta mana allin kaymantapas. Chhaynaqa, kunan qankuna akllakuychis. 16Kunan kamachisqaytachus kasukunkichis, Diosniykichis Señor Diostapas munakunkichis, paypa munaynintataq ruwankichis, kamachikuyninkunata unanchayninkunata chaninchayninkunatapas kasukunkichis chayqa, kawsankichismi, askha wawayoqtaq kankichis, Señor Diosniykichistaq saminchasunkichis hap'ikapunkichis chay suyupi. 17Qankunataqchus mana uyariyta munaspa mana kasukunkichischu, aswanpas wak dioskunata servispa yupaychankichis chayqa, 18cheqaqtapunin niykichis wañunaykichista, manataq Jordán mayuta chimpaspa hap'ikapunkichis chay hallp'apipas unaytachu kawsankichis. 19Kunanmi hanaq pachatapas kay pachatapas chay nisqaykunamanta testigo kananpaq waqyani. Willaykichismi wañuymantapas kawsaymantapas, hinallataq saminchaymantapas ñakaymantapas. Akllakuychis kawsayta, qankunapas mirayniykichispas kawsanaykichispaq. 20Diosniykichis Señor Diosta munakuychis, payta kasuychis, hunt'aq kaychis, chay hinapin qankunapas mirayniykichispas unayta kawsankichis, Señor Diosniykichispa ñawpa taytaykichis Abrahamman, Isaacman, Jacobman qonanpaq prometesqan suyupi, nispa.

will be added

X\