Deuteronomio 3

1Chaymantataq wak ñanninta Basanman rirqanchis, hinan Basán suyu rey Ogqa llapan ejercitonpiwan Edreipi ñoqanchiswan awqa-tinkuq lloqsimurqan. 2Señor Diostaq niwarqan: Ama payta manchakuychu, makiykimanmi hap'ichiyki paytapas ejercitontapas suyuntapas, imaynan Hesbonpi tiyaq Amor runa rey Sehonta ruwarqanki hinallatataqmi paytapas ruwanki, nispa. 3Chay hinaqa, Diosninchis Señor Diosmi Basán suyu rey Ogta llapan runakunatawan hap'ichiwarqanchis, hinan llapanta wañuchirqanchis. 4Chay hinallataq llapan llaqtankunatapas hap'ikapurqanchis. Basán suyu rey Ogpa kamachisqan Argob hallp'api llaqtakunaqa soqta chunkan karqan. 5Llapan chay llaqtakunaqa muyuriq alto perqakunawan, punkukunawan, wisq'anakunawan allin waqaychasqan karqan, hinallataq campopi askha llaqtachakunapas karqan. 6Llapan chay llaqtakunata thunispanchismi qharikunata, warmikunata, wawakunata ima llapanta wañuchirqanchis, imaynan Hesbón llaqta rey Sehonpa llaqtankunapi ruwarqanchis hinata. 7Ñoqanchisqa uywakunata, llaqtakunamanta llat'anasqanchis kawsaykunallatawanmi hap'ikurqanchis. 8Ahinatan haqay p'unchay munaychakurqanchis Jordán mayu inti lloqsimuy ladopi tiyaq Amor runakunaq iskaynin reypa hallp'ankunata, Arnón mayumanta Hermón orqokama. 9(Chay Hermón orqotan Sidón runakuna Sirión nispa sutichasqaku, Amor runakunataq Senir nispa). 10Hinan hap'ikapurqanchis pata pampapi llaqtakunata, Galaad hap'iyta, rey Ogpa kamachisqan Basán suyutawan, inti lloqsimuy ladopi Salca llaqtakama Edrei llaqtakama. 11(Basán suyu rey Ogqa sapallanñan Refaim runakunamanta qheparqan, puñunan tarimataq fierromanta karqan, sayayninmi tawa metro karqan, anchontaq yaqa iskay metro, chay tariman kashanraq Amón runakunaq Rabá llaqtanpi). 12Chay suyukunata hap'ikapuspanchismi, Rubén aylluman Gad ayllumanwan hallp'ata qorqani, Arnón mayu qayllapi Aroermanta Galaadpa kuskan orqo-orqonkama llapan llaqtakunantinta. 13Manasés kuskan ayllumantaq qorqani Galaadpa hukkaq kuskanninta, rey Ogpa kamachisqan llapan Basán suyuta, chaypi kashaq Argob hap'iytawan. (Chay Basán suyuqa Refaim Runakunaq Hallp'an nispa sutichasqan karqan. 14Manasespa churin Jairmi llapan Argob hap'iyta hap'ikapurqan Gesur hap'iywan Maaca hap'iywan qorpakama. Hinan Basán suyuta paypa sutinwan suticharqan Habot-jair nispa. Chay sutiyoqmi kunankama kashan). 15Manasespa ayllunmanta Maquirmantaq Galaad hap'iyta qorqani. 16Rubén aylluman Gad ayllumanwantaq Galaadmanta Arnón mayukama qorqani, uray qorpantaq Arnón wayq'o karqan, wichay qorpantaq Amón runakunaq qorpan Jaboc mayu karqan. 17Inti lloqsimuy ladopi Jordán qheswa wayq'ota qorqani, Cineret qochamanta Kachi Qocha qaylla Pisga orqo k'uchukama, Jordán mayutaq qorpanku karqan. 18Hinan kamachirqaykichis: Señor Diosninchismi kay hallp'ata tiyanaykichispaq qosunkichis. Llapaykichistaq kallpayoq qharikuna wawqeykichis Israel runakunaq ñawpaqenta armasqa rinkichis. 19Ichaqa uywaykichis, warmiykichis, wawaykichis, paykunallan kay qosqay hallp'api qhepanqaku. (Rikunin askha uywayoq kasqaykichista). 20Manataqmi Jordán mayu inti haykuy suyumanta kay qosqay hallp'aman kutimunkichischu, Diosninchis Señor Diospa paykunaman qonan hallp'ata hap'ikapunankukama, hinallataq wawqeykichis qankuna hina thak-kaypi tiyanankukama, nispa. 21Josuetapas kamachillarqanitaq: Ñawiykiwanmi rikurqanki imaynatachus chay iskay reyta Diosninchis Señor Diospa tukuy ruwasqanta, chay hinatan payqa llapan purisqayki suyukunapi reykunatapas ruwanqa. 22Ama manchakuychischu, Diosninchis Señor Diosmi qankunamanta maqanakunqa, nispa. 23Hinan chaypacha Señor Diosmanta mañaykukurqani: 24Señor Diosníy, qanmi Ancha Hatun kayniykita hatun atiyniykitawan ñoqa kamachiykiman rikuchiwayta qallarinki. Manan hanaq pachapipas kay pachapipas qan hina musphana ruwaq Diosqa kanchu. 25Mañakuykin, Jordán mayu chimpaman pasachiway haqay sumaq hallp'ata, sumaq orqo-orqota, Libanotawan rikunaypaq, nispa. 26Señor Diostaq ichaqa qankuna hawa ñoqapaq phiñakurqan, chaymi mañakusqayta mana uyariwarqanchu, aswanmi niwarqan: ¡Chaykamalla! Amaña anchata chaymanta rimapayawaychu. 27Pisga orqo pataman wichay, hinaspa chaymanta qhawariy inti haykuy ladota, wichay ladota, uray ladota, inti lloqsimuy ladota ima. Manan Jordantaqa chimpawaqchu, aswanpas qhawarillankin. 28Josueta yachachispa kamachiy, kallpachay yuyaychay. Paymi Israel runakunata Jordán mayuta chimpachinqa, hinan paypa kamachisqan qhawarisqayki hallp'ata hap'ikapunqaku, nispa. 29Hinan Bet-peor qhaway wayq'opi qhepakurqanchis.

will be added

X\