1 Horeb orqopin Israel runakunawan Señor Diosqa rimanakurqan, Moisestan kamachirqan Moab suyupi wakmanta paykunawan rimanakunanpaq. 2 Chaymi Moisesqa llapa Israel runakunata huñuykuspa nirqan: –Qankuna kikiykichismi rikurqankichis Egipto suyupi imaynatachus rey Faraonta, oficialninkunata, llapan suyuntapas Señor Diospa ruwasqanta. 3 Qankuna kikiykichismi rikurqankichis manchay musphanakunata, señalkunata, hatun milagrokunatawan. 4 Chaywanpas Señor Diosqa manan kunankama sut'inta entiendenaykichista munarqanchu, manataq tukuy chaykuna imachus kasqanta yachanaykichistapas munarqanchu. 5 Señor Diosmi nin: –Tawa chunka watan ch'inneqninta pusamurqaykichis, manan p'achaykichispas usut'aykichispas thantakurqanchu. 6 Manan t'antata mikhurqankichischu, manataq vinotapas ima machachikuq ukyanatapas ukyarqankichischu, ñoqa Diosniykichis Señor Dios kasqayta yachanaykichispaq, nispa. 7 Kay cheqasman chayamuqtinchistaq, Hesbón llaqta rey Sehón, Basán suyu rey Ogpiwan sayarimurqanku ñoqanchis contra maqanakuq, ichaqa atiparqanchismi. 8 Hinaspan hallp'ankuta qechuspa Rubén aylluman, Gad aylluman, Manasés kuskan ayllumanwan hap'ikapunankupaq qorqanchis. 9 Chhaynaqa, tukuy kay rimanakuy simikunata makilla hunt'aychis, tukuy ruwayniykichiskunapi allillan kanaykichispaq. 10 Llapanchismi kunan Diosniykichis Señor Diospa ñawpaqenpi kashanchis: ayllukuna, umallikuna, kurak runakuna, kamachikuqkuna, llapan Israel runakuna, 11 warmintin wawakunantinkama, hinallataq qankuna ukhupi tiyaq wak llaqtayoqkunapas, paykunan llant'a ch'eqtaqkuna unu aysaqkuna kanku. 12 Llapaykichismi Señor Diospa ñawpaqenpi kashankichis Diosniykichis Señor Diosman juraspa rimanakunaykichispaq. 13 Ahinapin qankunaqa Señor Diospa llaqtan kapunkichis, paytaq Diosniykichis kanqa, prometesqasuykichisman hina, ñawpa taytaykichis Abrahamman, Isaacman, Jacobman jurasqanman hina. 14 Manan qankunallawanchu Señor Diosqa juramentowan rimanakun, 15 aswanpas imaynan ñoqanchiswan rimanakun ahinallataqmi mirayninchiswanpas kunan rimanakun. 16 Qankunaqa allintan yachankichis imaynatachus Egipto suyupi kawsasqanchista, hinallataq imaynatachus wak suyukunaq chawpinta purimusqanchistapas. 17 Purimusqanchispin rikurqankichis millay wak'a diosninkuta, qorimanta, k'ullumanta, rumimanta, qolqemanta ruwasqa idolokunatapas. 18 Paqtataq qankuna ukhupi kanman qharipas, warmipas, familiapas, ayllupas Diosniykichis Señor Diosta kunan qonqaspa chay suyukunaq diosninkunata yupaychaq. Chhayna kaspaykichisqa haya qora otaq wañuna qora hinachá kawaqchis. 19 Paqtataq pipas kay juramentowan rimanakuy simikunata uyarishaspa hatunchakunman, hinaspa sonqonpi ninman: Ima munasqayta ruwaspa kawsasaq chaypas, allillanpunin kashasaq, nispa. Chay hina runaqa llapa llaqtaq wañunantan mink'an. 20 Señor Diosqa chay hina runataqa manan pampachanqachu, aswanpas phiñakuyninmi pay contra sinchita rawrarinqa, hinan kay qelqapi qelqasqa llapan ñakaykuna payman chayanqa, paytataq ch'usaqyachipunqa manaña sutinta pipas yuyarinanpaq. 21 Hinallataq Señor Diosqa llapan Israel ayllukunamanta payta t'aqanqa ñak'arichinanpaq, kay kamachikuy simi qelqapi qelqasqa kashaq rimanakuy llapan ñakaykunawanmi muchuchinqa. 22 Hamuq miraypi wawaykichiskunan, karu llaqtamanta hamuq wak llaqtayoqkunan rikunqaku chay suyuman Señor Diospa kachamusqan chay ñak'ariykunata onqoykunata, hinan ninqaku: 23 Llapa suyun ruphasqa kashan, azufrewan qollpawan p'ampasqa. Chay hallp'aqa manan ima tarpunapaqpas valenchu, manan imapas wiñanmanchu, manan q'achupas wiñanqachu. Imaynan Sodoma llaqtata, Gomorra llaqtata, Adma llaqtata, Zeboim llaqtatawan k'arakta phiñakuspa Señor Diosqa purunyachirqan, chay hinatan hallp'aykichistapas purunyachinqa, nispa. 24 Llapan suyukunataq tapukunqaku: –¿Imanaqtintaq Señor Diosqa kay hallp'ata kay hinata ruwarqan? ¿Imanaqtintaq sinchi k'arakta phiñakurqan? nispa. 25 Hinan kutichinqaku: –Ñawpa taytankuq Señor Diosninmi Egipto suyumanta horqomuspa, paykunawan rimanakusqa, paykunataq ichaqa mana hunt'asqakuchu, aswanpas qonqapusqaku. 26 Mana reqsisqanku wak dioskunatataq servispa yupaychasqaku, chhayna ruwasqankuta Señor Diospas hark'ashaqtin. 27 Chayraykun Señor Diosqa kay suyu contra sinchita phiñakuspa kay qelqapi qelqasqa ñakaykunawan paykunata muchuchirqan. 28 Sinchi k'arakta phiñakuspataq kay suyumanta wikch'urqan, wak suyukunaman. Chaypin kunankama kashanku, nispa. 29 Pakasqa kaqkunaqa Diosninchis Señor Diosmanmi tupan, sut'inchasqa kaqkunataq ñoqanchisman mirayninchiskunamanwan tupawanchis, wiñaypaq tukuy kamachikuyninkunata hunt'ananchispaq.
