Deuteronomio 28

1Cheqaqtapuni Diosniykichis Señor Diosta kasukunkichis, hinataq kunan kamachisqay tukuy kamachikuyninkunatapas hunt'ankichis chayqa, Señor Diosqa tukuy kay pachapi kaq suyukunaq qollanantan churasunkichis. 2Hinallataq Diosniykichis Señor Diosta kasukuqtiykichisqa, tukuy kay saminchakunata chaskinkichis. 3Señor Diosmi saminchasunkichis llaqtapipas campopipas. 4Señor Diosmi saminchasunkichis askha wawakunawan, cosechakunawan, wakaykichispa ovejaykichispa tukuy uywaykichispa uñankunawan ima. 5Señor Diosmi saminchanqa ruru pallasqa canastaykichista, masa chapunaykichistapas. 6Señor Diosmi saminchasunkichis tukuy ima ruwasqaykichispi purisqaykichispipas. 7Señor Diosmi awqaykichiskuna phawaykusuqtiykichis atipachisunkichis, paykunan contraykichispi hamunqa huk ñanninta, ayqenqakutaqmi tukuy ñanninta. 8Diosniykichis Señor Diosmi saminchanqa taqeykichista, tukuy llank'asqaykichistapas, paymi qosunkichis chay suyupi saminchasunkichis. 9Diosniykichis Señor Diospa kamachikuynintataq hunt'ankichis, munaynintataq ruwankichispas chayqa, paypaq t'aqasqa llaqtantan ruwasunkichis, prometesqasuykichisman hina. 10Chaymi kay pachapi llapan suyukuna yachanqaku Señor Diospa llaqtan kasqaykichista, hinan manchakusunkichis. 11Señor Diosmi anchatapuni allinyachisunkichis ñawpa taytaykichisman qonasuykichispaq prometesqan suyupi, paymi qosunkichis askha wawakunata, uywaykichispa askha uñankunata, askha cosechata ima. 12Qhapaq kayninta kicharispa, hanaq pachamanta hallp'aykichisman qarpanta kachaykamunqa, tiemponpitaq parata chayachimunqa, tukuy llank'asqaykichistataq saminchanqa. Chaymi askha suyukunaman manunkichis, qankunataq ichaqa mana pimantapas manukunkichischu. 13Diosniykichis Señor Diospa kamachikuyninkunata makilla uyarinkichis hinaspa hunt'ankichis kunan kamachisqayman hina chayqa, Señor Diosqa ñawpaqllapipuni churasunkichis manataq qhepapichu, llapa suyukunaq qollanantaq kankichis manataq kamachichu. 14Amataq kunan kamachisqay simikunamanta pañamanpas lloq'emanpas t'aqakunkichischu wak dioskunata servinaykichispaq. 15Diosniykichis Señor Diosta mana kasuspaykichis, kunan kamachisqay tukuy kamachikuykunata unanchaykunatapas mana hunt'ankichischu chayqa, tukuy kay ñakaykunan chayamusunkichis: 16Señor Diosmi ñakasunkichis llaqtapipas campopipas. 17Señor Diosmi ñakanqa ruru pallasqa canastaykichista masa chapunaykichistapas. 18Señor Diosmi ñakasunkichis, chaymi pisi wawayoq pisi cosechayoq kankichis, hinallataq wakaykichispas ovejaykichispas pisi uñayoq kanqa. 19Señor Diosmi ñakasunkichis tukuy llank'asqaykichispi purisqaykichispipas. 20Señor Diosmi tukuy llank'ayniykichiskunapi ñakasunkichis, hinan llakisqataq musphasqataq kankichis, qonqaylla hukpaqkama wañuchisqa kanaykichiskama, mana chaninta ruwaspaykichis Señor Diosta saqerparisqaykichis hawa. 21Señor Diosmi millay onqoywan onqochisunkichis hap'ikapunkichis chay suyupi lliw wañunaykichiskama. 22Hinallataq tisis onqoywan, fiebrewan, punkillikuywan, hump'i onqoywan onqochisunkichis, chakraykichistapas ch'akichipunqa, kachamunqataq ruphashaq wayrata polvillotawan, hinan qankuna wañunkichis. 23Manan chhikantapas para chayanqachu, hallp'aykichispas manataqmi rurunqachu. 24Señor Diosqa paraq rantinpin t'uyurmita, aqota hanaq pachamanta qankunaman chayachimunqa lliw wañunaykichiskama. 25Señor Diosmi awqaykichiskunawan atipachisunkichis, awqaykichis contran huk ñanninta rinkichis, paykunamantataq ayqenkichis tukuy ñanninta, chaymi kay pachapi llapa suyukunapas qankunata rikuspa llaksakunqaku. 26Wañuqtiykichispas salqa animalkunan phalaq animalkunan ayaykichista mikhunqa, manataq pipas hark'akunqachu. 27Señor Diosmi Egipto onqoywan, ch'upuwan, khiki onqoywan, seqsi onqoywan ima onqochisunkichis, manataq chay onqoykunamanta qhaliyankichischu. 28Hinallataq Señor Diosqa waq'ayachisunkichis, ñawsayachisunkichis, yuyayniykichistapas chinkachisunkichis, 29chaymi sut'i p'unchaypi ñawsa hina llankhupakunkichis, tukuy imapipas manataq allinchu kasunkichis. Sarunchasqataq suwasqallataq kashankichispas, manataq pipas qespichisunkichischu. 30Casarakunaykichispaq rimaykukusqaykichis warmiwanpas wak qharin puñunqa. Wasitan ruwakunkichis, manataq chaypi tiyankichischu. Uvas chakratan plantankichis, manataq rurunta mikhunkichischu. 31Toroykichistapas qhawashaqtiykichismi nak'anqaku, manataq aychanta mikhunkichischu. Asnoykichistapas ñawpaqeykichismantan qatirikunqaku, manataq kutichipusunkichisñachu. Ovejaykichiskunatapas awqaykichiskunan qatirikunqaku, manataq pipas hark'aykukusunkichischu. 32Rikushaqtiykichismi churiykichispas ususiykichispas wak llaqtayoq runakunaman hap'ichisqa kanqaku, qankunataq wawaykichista rikuykuypipuni kankichis, ichaqa manan imanaytapas atinkichischu. 33Chakraykichismanta cosechaykichistapas llank'asqaykichis tukuy rurukunatapas mana reqsisqaykichis llaqta runakunan mikhunqaku. Qankunataq sarunchasqa muchuchisqa tukuy tiempo kankichis. 34Chaymi tukuy chaykunata rikuspaykichis waq'ayankichis. 35Señor Diosmi onqochisunkichis ch'upuwan moqoykichispi phakaykichispi, chay onqoytaq chaki pampaykichismanta uma mukukuykichiskama tukusunkichis, manataq qhaliyankichischu. 36Señor Diosmi apachisunkichis qankunatapas akllakunkichis chay reytapas qankunaqpas ñawpa taytaykichispapas mana rikusqaykichis suyuman. Chaypin rumimanta k'ullumanta ruwasqa wak dioskunata yupaychankichis. 37Señor Dios apachisunkichis chay suyukunapin llapa runakuna qankunamanta musphanqaku, rimaytan q'oñirichinqaku, asipayasunkichistaqmi. 38Askha muhuta chakraykichisman tarpunkichis, pisillatataq cosechankichis, langostaq mikhusqan hawa. 39Uvas chakratan plantankichis llank'ankichistaq, ichaqa manan uvasta pallankichischu, manataq vinotapas ukyankichischu, kurukuna lliwta tukupusqanrayku. 40Llapa suyuntinpin olivos sach'aykichis kanqa, ichaqa rurukuna pampaman urmaqtinmi mana aceite kanqachu sumaqchakunallaykichispaqpas. 41Churiykichiskunapas ususiykichiskunapas kanqan, ichaqa manan qankunawanchu tiyanqa, aswanpas wak suyukunamanmi preso apasqa kanqaku. 42Tukuy sach'aykichiskunatapas chakra ruruykichistapas langostakunan mikhurqapunqaku. 43Qankunawan tiyaq wak llaqtayoqkunan qankunamantaqa aswanta qhapaqyanqaku, qankunataq ichaqa aswan-aswanta wakchayapunkichis. 44Chay wak llaqtayoqkunan mañasunkichis, qankunaqtaq mana imapas paykunaman mañanaykichispaq kanqachu. Paykunan qollana kanqaku, qankunataq kamachi kankichis. 45Chay hina ñakasqan qankuna kankichis, chaymi chay ñakaykuna taripasunkichis hinan wañuchisunkichis, Diosniykichis Señor Diosta mana uyarispa kamachikuyninkunatapas unanchayninkunatapas mana kasukusqaykichis hawa. 46Tukuy chaykunan wiñaypaq sut'inchanqa qankunata mirayniykichistapas Señor Diospa muchuchisqanta, hinallataq hukkunatapas musphachinqa. 47Diosniykichis Señor Diosmi tukuy allinkunata qosunkichis, qankunataq ichaqa mana tukuy sonqochu kusisqachu payta servinkichis, 48chayraykun Señor Diosqa awqaykichista kachamunqa, hinan paykunata servinkichis. Muchunkichistaq yarqayta ch'akiyta, hinataq q'alalla kankichis, tukuy imaymanataq pisisunkichis. Señor Diosmi kamachi-kaypi sinchita muchuchisunkichis wañunaykichiskama. 49Señor Diosmi sinchi karu suyumanta wak llaqtata contraykichispi kachamunqa, paykunaq rimaynintaqa manan entiendenkichischu. Paykunan anka hina hap'irqosunkichis. 50Paykunaqa sinchi millaymi kanku, manan yuyaqkunatapas respetanqakuchu, wawakunatapas khuyapayanqakuchu. 51Uywaykichista chakra ruruykichista mikhunqaku, ahinapitaq wañunkichis. Manan saqesunkichischu trigotapas, vinotapas, aceitetapas, manallataq saqesunkichischu wakaykichispa ovejaykichispa uñantapas, ahinapin qankunaqa wañunkichis. 52Diosniykichis Señor Dios qosunkichis chay suyu llapan llaqtaykichiskunata muyuykuspan phawaykunqaku, confiakusqaykichis allin ruwasqa perqakunatapas thuninqakun. 53Chaymi awqaykichis muyuykuspa k'iskiykusuqtiykichis, sinchitapuni yarqayta muchunkichis, hinaspan Diosniykichis Señor Diospa qosqasuykichis kikin wawaykichista mikhukunkichis. 54Chayrayku, qankunamanta luylusqa munasqa hunt'asqapi wiñaq qharipas mana munakuq tukupunqa wawqenpaqpas, munasqa warminpaqpas, qhepaq wawankunapaqpas, 55manataq wawankuq aychan mikhushasqantapas paykunaman qonqachu, awqaykichis muyuykuspa k'iskiykusuqtiykichis mana imapas mikhunaykichispaq kaqtin. 56Hinallataq luylusqa munasqa hunt'asqapi wiñaq warmipas sinchi llaklla kaspa, mana hayk'aq chakipi puriqpas mana munakuq tukupunqa munasqa qosanpaqpas, churinpaqpas, ususinpaqpas, 57manataq paykunaman qonqachu, aswanpas pakallapi mikhunqa wachakusqan wawantapas parisnintapas, awqaykichis muyuykuspa k'iskiykusuqtiykichis mana imapas mikhunaykichispaq kaqtin. 58Manachus kay qelqapi qelqasqa yachachikuykunata makilla hunt'ankichis, manallataq Diosniykichis Señor Diospa qollanan manchana sutintapas yupaychankichischu chayqa, 59paymi qankunata mirayniykichistapas musphana mana tukukuq ñak'ariykunawan muchuchisunkichis, hinallataq mana qhaliyaq millay onqoykunawan onqochisunkichis. 60Egipto suyu manchakusqaykichis onqoykunawantaq onqochisunkichis, chaykunawanmi onqoshallankichispuni. 61Aswantaraqmi Señor Diosqa muchuchisunkichis kay kamachikuy simi qelqapi mana qelqasqa kaq tukuy ñak'ariykunawan onqoykunawan ima, ahinapin qankuna wañunkichis. 62Diosniykichis Señor Diospa siminta mana kasukusqaykichis hawa, hanaq pacha ch'askakuna hina askha kashaspan, pisi runakunallaña qhepankichis. 63Señor Diosqa anchatan kusikurqan askhayachisqasuykichismanta allinyachisqasuykichismantapas, chay hinallataqmi kusikunqa urmachisqasuykichismantapas wañuchisqasuykichismantapas. Hap'ikapunkichis chay hallp'amantapas wikch'usqataq kankichis. 64Señor Diosmi ch'eqechisunkichis kay pachantin tukuy suyukunaman. Chaykunapin qankunaqpas ñawpa taytaykichispapas mana reqsisqaykichis dioskunata yupaychankichis, rumimanta k'ullumanta ruwasqa dioskunata. 65Chay suyukunapiqa manan qankunapaq thak-kay kanqachu, manataq samaykunaykichis cheqaspas kanqachu. Aswanpas Señor Diosmi manchasqa llakisqa sonqoyoqta kawsachisunkichis, waqay-waqay uyayoqta, mana suyakuyniyoqta ima. 66Kawsayniykichispas thutasqa q'aytupi warkurayaq hinan kanqa, tutapas p'unchaypas sinchi manchasqan purinkichis, manataq yachakunkichischu kawsanaykichistapas wañunaykichistapas. 67Sonqoykichistaq tukuy rikusqaykichiswan llaksasqa khatatatanqa, chaymi tutamanta ninkichis: ¡Ojalachá ch'isinllaña kanman! nispa, ch'isintaq ninkichis: ¡Ojalachá pacha paqarllaña kanman! nispa. 68Señor Diosmi nirqasunkichis: Manan Egipto suyumanqa kutinkichisñachu, nispa. Chaywanpas paymi qochanta barcokunapi Egipto suyuman kaqta kutichisunkichis. Chaypin awqaykichiskunaman k'askakunkichis kamachi kanaykichispaq, ichaqa manan pillapas rantiyta munasunkichischu, nispa.

will be added

X\