Deuteronomio 26

1Diosniykichis Señor Dios qosunkichis chay suyuman haykuspaykichis, hap'ikapuspa tiyaspaykichisqa, 2llapan cosechaykichismantan sapanka t'aqamanta ñawpaqkaq ruruta huk canastaman churaspa apankichis Diosniykichis Señor Dios payta yupaychanapaq akllakunqa chay cheqasman. 3Hinan tupaqninpi llank'ashaq sacerdoteman qayllaykuspa ninkichis: Kunanmi Diosninchis Señor Diospa ñawpaqenpi rimarinchis qowananchispaq ñawpa taytanchisman prometesqan suyuman haykumusqanchista, nispa. 4Chaymi sacerdoteqa canastata chaskispa, Diosniykichis Señor Diospa altarninpa ñawpaqenman churanqa. 5Qankunataq Señor Diospa ñawpaqenpi ninkichis: Ñawpa taytanchisqa huk purikuq Aram miray runan karqan, paymi Egipto suyuman rirqan pisi runakunallapiwan. Hinaspan chaypi tiyarqan, askhatataq mirarqan, chaymi huk hatun kallpayoq suyu kapurqan. 6Egipto runakunataq ichaqa sinchita muchuchiwarqanchis, sarunchawarqanchis, sinchi sasatataq llank'achiwarqanchis. 7Hinan ñawpa taytanchiskunaq Señor Diosninta waqyakurqanchis, chaymi pay waqyakusqanchista uyarimuwarqanchis, rikurqantaq ñak'arisqanchista, llank'asqanchista, sarunchawasqanchistapas. 8Chaymi Señor Diosqa Egipto suyumanta horqomuwarqanchis hatun atiyninwan kallpanwan, hinallataq milagrokunata, señalkunata ruwaspa, chaypi tiyaq runakunata q'aqcharqan. 9Hinaspan kay suyuman pusamuwaspanchis, lecheq miel misk'iq askha kanan hallp'ata qowarqanchis. 10Chaymi Diosninchis Señor Diosman kunan apamunchis qowasqanchis hallp'aq ñawpaqkaq rurunta, nispa. Hinan Diosniykichis Señor Diospa ñawpaqenman canastaykichista churaykunkichis, qonqoriykukuspataq payta yupaychankichis. 11Chaymantataq Diosniykichis Señor Diospa tukuy allinkunata qankunamanpas aylluykichismanpas qosqasuykichismanta q'ochukunkichis, hinallataq qankunawan kuska tiyaq Leví runakunapas, wak llaqtayoqkunapas q'ochukunqaku. 12Kinsakaq wataqa diezmo qonaykichis watan, chay watapin tukuy cosechaykichis rurumanta diezmota qonkichis Leví runakunaman, wak llaqtayoqkunaman, mana tayta-mamayoqkunaman, viudakunamanwan, chaymi paykunaqa llaqtaykichispi tukuy munasqankuta mikhunqaku. Diezmo qoyta tukuspaykichistaq, 13Diosniykichis Señor Diosta ninkichis: Qanpaq diezmo t'aqasqaykuta wasiykumanta horqomuspayku, qopuykuñan Leví runakunaman, wak llaqtayoqkunaman, mana tayta-mamayoqkunaman, viudakunamanwan. Hunt'aykun tukuy kamachiwasqaykikuta, manan t'aqarikuykuchu, manataq qonqaykupaschu. 14Chay diezmomantaqa manan wañuqniyoq kashaspapas mikhurqaykuchu, qhelli kashaspapas manan horqorqaykuchu, manallataq wañusqakunapaqpas haywarqaykuchu, aswanpas qantan kasurqaykiku, tukuy kamachiwasqaykikutataq hunt'arqaykupas. 15Hanaq pachapi kaq ch'uya wasiykimanta qhawarimuspayki Israel llaqtaykita saminchay, lecheq miel misk'iq askha kanan qowasqaykiku hallp'atapas, imaynan ñawpa taytaykuman prometerqanki hinata, nispa. 16Diosniykichis Señor Diosmi kunan kamachisunkichis tukuy chay kamachikuyninkunata unanchayninkunata ruwanaykichispaq, hunt'aychispuni tukuy sonqoykichiswan tukuy almaykichiswan. 17Kunanmi qankuna rimarinkichis: Señor Diosmi Diosninchisqa, munayninta ruwasunchis, hunt'asunchistaq kamachikuyninta, unanchayninta, chaninchaynintawan, paytaqa kasukullasunpunin, nispa. 18Hinallataq Señor Diospas qankunamanta kunan rimarin: Qanmi, Israel, ñoqa kikiypa llaqtay kanki, prometesqayman hina, chhaynaqa tukuy kamachikuyniykunata hunt'anaykipaqmi kamachiyki. 19Ñoqan qanta llapa kamasqay suyukunamanta aswan hatunta ruwasqayki, hinan qan hawa wakin suyu runakuna yupaychawanqaku, hatunchawanqaku, qhapaqchawanqaku ima, qantaq ñoqapaq t'aqasqa llaqtay kanki, nispa.

will be added

X\