Deuteronomio 25

1Iskay runakuna pleitopi kanman chayqa, juezkunaman rispa uyarichikunqaku, hinan juezkuna chaninchaspanku mana huchayoqta mana huchachanqakuchu, huchayoq kaqtataq huchachanqaku. 2Hinataq chay huchayoq runa soq'anapaq hina kanqa chayqa, juezmi kamachinqa pampaman thallananpaq, hinaspan rikushasqan hayk'a kutitachus huchanmanta chaskinan chayman hina soq'achinqa. 3Chay runataqa tawa chunka kutikamallan soq'ankichis, paqtan llaqta-masiykichis sinchita soq'aqtiykichis ñawpaqeykichispi pisichasqa kapunman. 4Aman era saruq torotaqa senq'apankichischu. 5Iskay wawqentin kuska tiyankuman, hinataq hukkaq wawqen mana churiyoq kashaspa wañukapunman chayqa, wañuqpa viudanqa manan wak ayllu qhariwan casarakunqachu, aswanpas cuñadonmi payta chaskispa casarakunqa. 6Phiwi churinta cuñadonpaq wachakuspaqa, wañuq qosanpa sutinwanmi sutichanqa, chaymi chay wañuqpa sutinqa mana Israelpi chinkanqachu. 7Cuñadon mana paywan casarakuyta munaqtinqa, kurak runakunaman llaqta haykunata rispa viudaqa ninqa: Manan cuñadoy ñoqawan casarakuyta munanchu, manan Israel llaqtapi wawqenpa sutin sutiyoq miray kananta munanchu, nispa. 8Hinan chay llaqta kurak runakuna chay runata waqyachinqaku tapuykunankupaq, paytaq kaqllatapuni ninqa: Manan casarakuymanchu, nispa chayqa, 9viudan payman qayllaykunqa kurak runakunaq qayllanpi, hinaspan cuñadonpa usut'anta ch'utispa uyanpi thoqaykunqa, ninqataq: Chay hinatan ruwana wawqenpa sutin sutiyoq miray kananta mana munaq qharitaqa, nispa. 10Chaymi Israelpi chay runaq ayllunqa “Q'ala Chaki Ayllu” nisqa kapunqa. 11Iskay runa maqanakushaqtin, hukkaqpa warmin qosanta atipananmanta amachaq qayllaykuspa, maqanakuq-masin runata qhari-kayninmanta makinwan hap'inman chayqa, 12ama khuyapayaspan warmiq makinta wit'unkichis. 13Aman rantinaykichispaq suwana pesata apankichischu, vendenaykichispaqpas q'otuna pesata apankichischu. 14Amallataq wasiykichispi rantinaykichispaq suwana tupunatapas churakunkichischu, vendenaykichispaqpas q'otuna tupunata churakunkichischu. 15Pesanaykichispas tupunaykichispas chanintaq hunt'asqataqmi kanqa, Diosniykichis Señor Dios qosunkichis chay suyupi unayta kawsanaykichispaq. 16Diosniykichis Señor Diosqa chay hina ruwaqtapas mana chanin ruwaqtapas cheqnikunmi. 17Yuyariychis Egiptomanta lloqsimushaspa purimushaqtiykichis Amalec runakunaq ruwasqasuykichista. 18Paykunaqa Diostapas mana manchakuspan ñanpi contraykichis sayarispa, qhepa puntapi kaq pisi kallpa llaqta-masiykichiskunaman phawaykurqan qankuna sayk'usqa peqtusqa kashaqtiykichis. 19Chayraykun Diosniykichis Señor Dios llapan awqaykichiskunamanta qespichispa, hap'ikapunaykichis suyuta qosuqtiykichis, llapanta Amalec runakunata wañuchinkichis, manaña pipas paykunata yuyarinanpaq. ¡Aman chay ruwayta qonqankichischu!

will be added

X\