Deuteronomio 24

1Mayqen qharipas huk warmiwan casarakuspaña, chay warmiq mana allin ruwayninta yachaspa mana munapunmanchu chayqa, t'aqanakuy qelqata qelqaspa payman qonqa, hinaspan wasinmanta kachapunqa. 2Chay wikch'usqa warmitaq huk qhariwan casarakapunman, 3chay qosanpas manallataq munaspa t'aqanakuy qelqata qollanmantaq, hinaspataq wasinmanta kachapunman, otaq wañupunmanpas chay qhepakaq qosan chayqa, 4manan wakmanta casarakuyta atinmanchu ñawpaqkaq qosanqa, chay warmi qhellichakapusqanrayku, Señor Diospas chay hina ruwaytaqa cheqnikunmi. Diosniykichis Señor Dios hap'ikapunaykichispaq qosunkichis chay suyutaqa aman qhellichankichischu. 5Pipas chayllaraq casarakuqqa manan awqa-tinkuyman rinqachu, manataq ima ruwanatapas ayllunpi chaskinqachu, aswanpas wasinpin huk wata libre kanqa, warmintin kusisqa tiyanankupaq. 6Aman piqpa tunawantapas marannintapas prendata apankichischu, kawsananpaq mikhunatapas qechuwaqchis hinachá kanman. 7Mayqen runapas huk Israel llaqtamasinta suwaspa apanman, kamachin kananpaqpas vendenanpaqpas, hinaspa hap'ichikunman chayqa, chay runa suwataqa wañuchinkichismi. Chay hinapin chay huchata qankuna ukhumanta ch'usaqyachinkichis. 8Lepra onqoy rikhuriqtinqa, allintapunin Leví ayllu sacerdotekuna yachachisunkichis, chaytataq hunt'ankichis. Qankunaqa lliwtan ruwankichis Leví ayllu sacerdotekunata yachachisqayman hina. 9Yuyariychis Diosniykichis Señor Diospa Egipto suyumanta lloqsimushaqtiykichis Mariata ruwasqanta. 10Runa-masiykichisman imatapas manuspaykichisqa, aman wasinta haykunkichischu prendata apanaykichispaq, 11aswanpas hawallapi suyankichis manukuq runa prendata horqomuspa qonasuykichiskama. 12Chay runa wakcha kaqtinqa, aman chay prendata tutantin hap'ikunkichischu, 13aswanpas inti chinkaykuyta prenda qosqasuykichis ponchonta kutichipunkichis, chaywan p'istukuspa puñunanpaq, chaymi chay wakcha runaqa saminchasunkichis. Chay hinapin Diosniykichis Señor Dios chaninpaq qhawarisunkichis. 14Aman llank'apakuq wakcha runata yanqalla llank'achikunkichischu, llaqta-masiykichistapas llaqtaykichispi tiyaq wak llaqtayoqtapas. 15Sapa p'unchaymi llank'asqanmanta pagapunkichis manaraq inti chinkaykushaqtin, payqa necesitanmi chay qolqeta, wakcha kasqanrayku. Mana pagapuqtiykichisqa contraykichispin Señor Diosmanta mañakunqa, hinan qankuna huchachasqa kankichis. 16Manan taytaqa churinpa huchanmanta wañuchisqa kanmanchu, manallataqmi churipas taytanpa huchanmanta wañuchisqa kanmanchu, aswanpas kikin huchallikuqmi wañunqa. 17Aman chaninchayta waqllichinkichischu wak llaqtayoqkunapaqpas, mana tayta-mamayoqkunapaqpas, amallataq viudaq p'achantapas prendata apankichischu. 18Yuyariychis Egipto suyupi kamachi kasqaykichista, Diosniykichis Señor Dios chaymanta horqomusqasuykichistapas, chayraykun kamachiykichis chay hinata ruwanaykichispaq. 19Chakraykichispi trigota ichhushaspa huk marq'ay trigota qonqaspaykichisqa, amañan hoqariq kutinkichischu, chaytaqa saqenkichis mana tayta-mamayoqkunapaq, viudakunapaq, llaqtaykichispi tiyaq wak llaqtayoqkunapaqwan, ahinapin tukuy llank'asqaykichispi Diosniykichis Señor Diosqa saminchasunkichis. 20Olivos chakraykichis ruruta pallashaspaqa, aman k'allmankunamanta q'alatachu pallarqonkichis, puchuq ruruqa hinallan qhepanqa wak llaqtayoqkunapaq, mana tayta-mamayoqkunapaq, viudakunapaqwan. 21Chakraykichismanta uvasta pallashaspaqa, aman qhellankichischu, puchuqqa hinallan qhepanqa wak llaqtayoqkunapaq, mana tayta-mamayoqkunapaq, viudakunapaqwan. 22Yuyariychis Egipto suyupi kamachi kasqaykichista, chayraykun kamachiykichis chayta ruwanaykichispaq.

will be added

X\