Deuteronomio 22

1Llaqta-masiykiq wakantapas ovejantapas chinkasqata tarispaykiqa, aman hinallata qhawankichu, aswanpas waqaychaspan llaqtamasiykiman kutichipunki. 2Chay chinkachikuq llaqtamasiykita mana reqsinkichu manataq qorpaykipaschu chayqa, chinkasqa uywanta wasiykipi waqaychanki pay maskhamunankama, maskhaspa tarimuqtintaq qopunki. 3Ahinallatataq asnonwanpas, p'achanwanpas, tukuy iman chinkaqwanpas ruwanki, amataq hinallata qhawankichu. 4Llaqta-masiykiq asnontapas wakantapas ñanpi urmasqata rikunki chayqa, aman hinallata qhawankichu, aswanpas sayarinanpaqmi yanapaykunki. 5Warmiqa aman qhari p'achawan churakunqachu, amallataq qharipas warmi p'achawan churakunqachu, Señor Diosqa cheqnikunmi chay hina ruwaqtaqa. 6Purishaspayki sach'api otaq pampapi huk phalaq animalta q'esanpi tarinki chiwchiyoqtapas runtuyoqtapas chayqa, aman mamanta chiwchintawan apankichu. 7Aswanqa mamanta kacharipunki chiwchillanta apakunki, chaymi allillan kakunki, unaytataq kawsankipas. 8Mosoq wasita ruwakuspaykiqa wasi patatan muyuriqta kanchachanki, ama pipas urmaykuspa wañunanpaq, runa wañusqamanta mana huchachasqa kanaykipaq. 9Uvas chakraykipiqa aman wak t'aqa muhuta tarpunkichu, mana chayqa chay chakraykipi llapan rurutan Señor Diospaq qopunayki kanqa. 10Aman torota asnotawan masachankichu yapunaykipaq. 11Kuskan millma kuskan lino awasqa p'achataqa aman churakunkichu. 12Churakunayki ponchoq tawantin ch'ullpanpi chhaqchata ruwakunki. 13Qharichus warmiwan casarakunman, hinaspataq paywan puñusqan qhepata cheqnikapunman, 14llullakuspataq ch'atanmanpas, mana chanin warmimanta hina hukkunaman reqsichispa, ninmantaq: Ñoqan kay warmiwan casarakurqani, hinan paywan puñuspay mana doncellatachu tarini, nispa chayqa, 15sipaspa tayta-maman casarakusqanku tuta puñusqanku yawarkama llamp'unata apanqa llaqta haykunapi kurak runakunaman, ususin doncellapuni kasqan señalta qhawanankupaq. 16Chaymi sipaspa taytanqa kurak runakunata ninqa: Ñoqan kay qhariman ususiyta warminpaq qorqani, kunantaq ichaqa cheqnikapun. 17Llullakuspataq ch'atan, niwantaq: Manan doncellachu ususiykiqa kasqa, nispa. Qhawariychis, kaymi kashan ususiypa doncella kasqan señal, nispa. Chay llamp'unatataq kurak runakunaq ñawpaqenpi mast'arinqa. 18Hinan kurak runakuna chay qharita hap'ispa hasut'inqaku, 19pachak qolqetataq pagachinqaku, hinan chay qolqeta sipaspa taytanman qonqaku, Israelpi doncella sipasta mana chanin warmita hina hukkunaman reqsichisqanmanta. Chaymi chay qhariqa sipasta warminpaq chaskikapunqa wañunankama, manañataq wikch'uyta atinqachu. 20Cheqaqtapunitaq chay sipas mana doncella kaqtinqa, 21taytanpa wasin punkuman sipasta horqomunqaku, hinaspa llaqta runakuna rumiwan ch'aqenqaku wañunankama, Israelpi chay mana chaninta ruwasqanmanta, taytanpa wasinpi qhelli huchapi purisqanmantawan. Chay hinapin chay huchata qankuna ukhumanta ch'usaqyachinkichis. 22Huk qharichus qosayoq warmiwan puñushaq hap'isqa kanqa chayqa, iskayninkun warmipas qharipas wañuchisqa kanqaku. Chay hinapin chay huchata qankuna ukhumanta ch'usaqyachinkichis. 23Huk doncella sipas huk qhariwan casarakunanpaq rimaykusqa kashaqtin, llaqtapi wak qhari paywan tupaspa puñunman chayqa, 24iskayninta llaqta haykunaman horqospa chaypi ch'aqespa wañuchinkichis. Sipasqa wañunqa llaqta runakunata hark'akunanpaq mana waqyakusqanmanta, qharitaq wañunqa runamasinpa warminta violasqanmanta. Chay hinapin chay huchata qankuna ukhumanta ch'usaqyachinkichis. 25Ichaqa casarakunanpaq rimaykusqa sipasta huk qhari campopi tarinman, hinaspa payta violanman chayqa, qharillata wañuchinkichis. 26Sipastaqa ama wañuchinkichischu, payqa manan wañuchinapaq hina huchayoqchu, chay violayqa campopi huk runa-runamasinta phawaykuspa wañuchin chaymanmi rikch'akun. 27Chay qhariqa sipasta campopi hap'ispa violarqan, qapariqtinpas manataq pipas hark'aykuqnin kanmanchu karqan. 28Manaraq casarakunanpaq rimaykusqa huk doncella sipasta huk qhari hap'ispa violanman hinataq paykunata hap'inkichis chayqa, 29chay violaq qharin sipaspa taytanman phisqa chunka qolqeta qonqa. Sipastaq paypa warmin wañunankama kapunqa violasqanmanta, manañataq wikch'uyta atinqachu. 30Manan pipas taytanpa warminwanqa puñukunqachu, mana chayqa taytantan pisichanqa.

will be added

X\