Deuteronomio 21

1Diosniykichis Señor Dios hap'ikapunaykichispaq qosunkichis chay suyupi huk qhari ayata campopi wañuchisqata tarinkichis, manataq yachankichischu pichus wañuchisqantapas chayqa, 2juezkunan kurak runakunapiwan rispanku ayaq kasqanmanta mayqen llaqtachus qaylla kasqanta yachanankupaq thaskiypi tupunqaku. 3Hinan ayaq aswan qayllanpi kaq llaqta kurak runakuna hap'imunqaku manaraq llank'aq manataq yugo churasqapaschu kaq huk malta wakata. 4Hinaspa mana chakmana mana tarpuna mana tukuy tiempo unu phawashaq wayq'oman chay malta wakata qatinqaku, chaypitaq nucanmanta wañuchinqaku. 5Hinallataq Leví ayllu runa sacerdotekunapas rinqaku, paykunan churanakuytapas maqanakuytapas chaninchanqaku. Señor Diosmi Leví aylluta akllarqan payta servinanpaq, sutinpi saminchananpaq. 6Hinan aya qayllapi kaq llaqta llapan kurak runakuna wayq'opi nucanmanta wañuchisqa malta waka patapi makinkuta maqchikunqaku. 7Khaynatataq ninqaku: Manan ñoqaykuqa chay runata wañuchirqaykuchu, manataqmi rikurqaykupaschu. 8Señor Diosniyku, Egiptomanta horqomusqayki Israel llaqtaykita pampachay, ama huchachaychu llaqtaykita mana huchayoq runaq wañusqanmanta, nispanku. 9Chay hinapin qankunaq chawpiykichismanta chay runa wañuchiy huchata chinkachinkichis, Señor Diospa munayninta ruwaspaykichis. 10Awqa-tinkuyman awqaykichis contra lloqsiqtiykichis, Diosniykichis Señor Dios atipachisuqtiykichis, paykunata presota apankichis chayqa, 11pipas sumaq rikch'ayniyoq warmita rikuspa munakunman, hinaspataq casarakuyta munanman chayqa, 12wasinmanmi pusanqa. Hinan warmiqa chukchanta rutukunqa sillunta wit'ukunqa, 13llaqtanpi churakunan p'achatapas ch'utikuspa wak p'achawan churakunqa, chay runaq wasinpitaq qhepapunqa. Tayta-mamanmantataq huk killa hunt'ata llakikunqa. Chaymantataq casarakapunqa, chaymi qosan kapunqa paypas warmin kapunqa. 14Manataqchus chay qhepata munapunman chayqa, wasinmantan kacharipunqa, manan qolqeman vendenmanchu, manallataq kamachinpas kanmanchu, paywan puñuspa pisichasqan hawa. 15Pipas iskay warmiyoq kaspan, hukta munakunman hukkaqtataq cheqnikunman chayqa, aman munasqa warminpa churinman sayakunqachu. Iskayninkutaq wachakunman, phiwi churintaq cheqnisqa warminpi kaqtinqa, 16kawsayninta churinkunaman rakipuspaqa, manan munasqa warminpi churinman phiwi churinman hinaqa tupaqninta qonmanchu, cheqnisqa warminpi phiwi churintachá sarunchanman. 17Aswanpas cheqnisqa warminpi phiwi churin kasqanta reqsikuspa, sapankaman qonan t'aqamanta iskay t'aqata payman qonqa, phiwi churiq chaskinan hinapuni kasqanrayku. 18Huk runaq churin mana kasukuq k'ullu kaspa tayta-mamanpa anyasqanta mana kasunqachu, wanananpaq waqtaykuqtinpas manapuni kasukunqachu chayqa, 19tayta-mamanmi payta hap'ispa llaqta punkuman apanqa, llaqta kurak runakunaq chaninchananpaq. 20Ninqakutaq: Kay churiykun sinchi k'ullu mana kasukuq, manapunin rimapayasqaykuta kasuwankuchu, payqa machaqmi rakraputaq, nispa. 21Chaymi llaqta runakunaqa wañunankama rumiwan ch'aqenqaku. Chay hinapin qankunamanta chay mana chaninta ch'usaqyachinkichis, llapan Israel runataq chayta uyarispa manchakunqa. 22Pipas sinchi huchallikusqanrayku wañuchinapaq huchachasqa kaspa, wañuchisqa kanqa, hinaspa sach'aman warkusqa kanqa chayqa, 23aman ayanta tutantin sach'api warkurayachinkichischu, aswanpas chay kikin p'unchaymi p'ampapunkichis, sach'api wañusqa warkurayaqqa Diospa ñakasqanmi. Ahinapin Diosniykichis Señor Dios hap'ikapunaykichispaq qonasuykichis suyuta mana qhellichankichischu.

will be added

X\