Deuteronomio 20

1Awqaykichiswan maqanakuq lloqsishaspa rikunkichis awqaykichispa caballonkunata carretankunata soldadonkunatapas qankunamanta aswan askhata chayqa, aman mancharikunkichischu, Egiptomanta horqomuq Diosniykichis Señor Diosmi qankunawan kashanqa. 2Awqa-tinkuyta qallarinaykichispaqtaq soldadokunata sacerdote ninqa: 3–Uyariychis, Israel runakuna, kunanmi awqaykichiswan maqanakuq rinkichis, ama pisi kallpayaychischu, ama manchakuychischu, ama khatatataychischu, amataq paykunata manchapakuychispaschu. 4Diosniykichis Señor Diosmi qankunawan kashan, paymi qankunamanta sayarikunqa hinaspa awqaykichista atipachisunkichis, nispa. 5Oficialkunapas rimaykullanqataqmi: ¿Pitaq qankuna ukhupi kashan mosoq wasita chayllaraq tukuspa manaraq chaypi tiyaq? Ripuchun, wasinta kutipuchun. Paqtan awqa-tinkuypi wañunman, hinataq wasinpi wak runa tiyanman. 6¿Pitaq qankuna ukhupi kashan uvas chakrata plantaspa manaraq chay chakra ruruta mikhuq? Ripuchun, wasinta kutipuchun, paqtan awqa-tinkuypi wañunman, hinataq chakran ruruta wak runa mikhunman. 7¿Pitaq qankuna ukhupi kashan casarakunanpaq rimanasqa? Ripuchun, wasinta kutipuchun, paqtan awqa-tinkuypi wañunman, hinataq munakusqanwan wak runa casarakunman, nispa. 8Chaymantapas tapuykullanqakutaq: ¿Pitaq qankunamanta pisi kallpayaspa manchakushan? Ripuchun, wasinta kutipuchun, paqtan manchakuspa wawqenkunaq sonqonta iskayrayachinman, nispa. 9Oficialkuna rimayta tukuspataq, kamachiqkunata churanqaku t'aqa-t'aqa soldadokunata umallinanpaq. 10Mayqen llaqtamanpas phawaykunaykichispaq qayllaykuspaqa, manaraq maqanakushaspan chaypi tiyaq runakunata: Sumaqpi rimanakusun, ninkichis. 11Allinmi, rimanakusun, nispataq llaqta punkuta kicharisunkichis chayqa, llapan chaypi kaqkunan kamachiykichis kanqa, mit'anipitaq llank'anqaku. 12Maqanakuyta munaspa qankunawan mana rimanakuyta munaqtinkun ichaqa, llaqtata muyuykunkichis phawaykunaykichispaq. 13Diosniykichis Señor Dios paykunata hap'ichisuqtiykichistaq, llapa chaypi tiyaq qharikunata wañuchinkichis, 14ichaqa warmikuna, wawakuna, uywakuna, chay llaqtapi tukuy imaymana kaqkunapiwantaq qankunapaq kanqa. Ahinapin Diosniykichis Señor Diospa qosqan chay runakunaq kaqninkunawan kusikunkichis. 15Chaytaqa ruwankichis hap'ikapunkichis chay suyumanta aswan karupi kaq tukuy llaqtakunatan. 16Diosniykichis Señor Dios hap'ikapunaykichispaq qosunkichis chay suyu llaqtakunapi runakunataqa aman ch'ullallatapas kawsachinkichischu. 17Aswanpas Diosniykichis Señor Diospaq sacrificiota hinan llapanta wañuchinkichis Het runakunata, Amor runakunata, Canaán runakunata, Ferez runakunata, Hev runakunata, Jebus runakunatawan, Señor Diospa kamachisqanman hina. 18Chay hinapin mana qankunata yachachisunkichischu diosninkuq sutinpi chay millay mana chanin ruwasqankuta, manataq Diosniykichis Señor Dios contrapas huchallichisunkichischu. 19Mayqen llaqtatapas awqa-tinkuypi hap'ikapunaykichispaq askha p'unchayña muyuykunkichis chayqa, aman sach'ankunata kumpankichischu, chaykunaq rurunta mikhunaykichisrayku. Chay sach'akunaqa manan runachu, qankunawan maqanakunanpaq. 20Mana ruruq sach'akunata ichaqa kumpawaqchis, muyuykuspaykichis llaqta perqaman seqanata ruwanaykichispaq, chay hinapin atipankichis.

will be added

X\