1 Chaymantataq kutiripurqanchis ch'inneqman Puka Qochaman purina ñanninta Señor Diospa kamachiwasqanchisman hina, chaymantataq Seir orqo-orqopi unayta muyurirqanchis. 2 Hinaqtinmi Señor Diosqa niwarqan: 3 Unayñan kay orqo-orqopi muyurinkichis, wichayman riychis. 4 Runakunatataq kamachinki: Qankunaqa Esaupa mirayninkunaq hallp'an ukhuntan purinkichis, paykunaqa Seirpin tiyanku, aylluykichistaqmi kankupas. Paykunaqa manchakusunkichismi, chay hinaqa, anchata cuidakuychis 5 ama maqanakunaykichispaq. Manan ñoqaqa qosqaykichischu hallp'ankupiqa huk chaki saruyllatapas, Esauman hap'ikapunanpaq Seir orqo-orqota qosqayrayku. 6 Mikhunatapas unutapas qolqewan paykunamanta rantikuspaykichismi mikhunkichispas ukyankichispas, nispa. 7 Yuyariychis Diosninchis Señor Dios tukuy ruwayniykichiskunapi saminchasqasuykichista, kay tawa chunka watantinmi ch'inneqpi qankunawan kasharqan, kay hatun ch'inneqpi purisqaykichispin waqaycharqasunkichis, manataq imamantapas pisichirqasunkichischu. 8 Chaymantataq Elatmantawan Ezión-gebermantawan Kachi Qochaman riq ñanmanta pulqarispa Esaupa miraynin ayllunchiskunaq Seir hallp'anta muyurirqanchis, hinaspan Moabman riq ch'inneq ñanninta rirqanchis. 9 Hinan Señor Diosqa niwarqan: Lotpa miraynin Moab runakunataqa aman awqaykita hinachu qhawanki, amataq paykunawan maqanakunkichu, manan hallp'ankutaqa huk chhikallantapas qosqaykichischu, Ar hallp'ata paykunaman hap'inankupaq qosqayrayku, nispa. 10 (Chay suyupiqa ñawpa tiempopi Em runakunan tiyasqaku, paykunaqa askhataq atiyniyoqtaq kasqakupas, Anac qharikuna hina hatuchachaq. 11 Runakunaqa yuyasqaku Refaim runapuni paykunaqa kasqanta Anac qharikunata hina, Moab runakunataq ichaqa Em runa nispa sutichasqaku. 12 Ñawpa tiempoqa Seir hap'iypi Hor runakunan tiyasqa, Esaupa mirayninkunataq ichaqa paykunata hallp'ankumanta ch'usaqyachisqa, hinaspa chayta hap'isqaku. Chaypitaq tiyasqaku imaynan Israel runakuna Señor Diospa qosqan hallp'ata ruwarqanku hinata). 13 Señor Diosmi nillarqantaq: –Puririychis, Zered mayuta chimpaychis, nispa. Hinan Zered mayuta chimparqanchis. 14 Cades-barneamanta puririmusqanchis p'unchaymanta Zered mayuta chimpasqanchiskamaqa kinsa chunka pusaqniyoq watan karqan. Awqa-tinkuq qharikunaqa llapankuñan chaypaqqa wañupurqanku Señor Diospa jurasqanman hina. 15 Señor Diosqa atiyninwanmi contrankupi sayarillarqanpuni llapanku wañunankukama. 16 Awqa-tinkuq qharikuna llaqtapi llapanku wañupuqtinñan, 17 Señor Diosqa niwarqan: 18 Kunanpacha Ar hallp'anta rispa Moab qorpata pasankichis, 19 ichaqa Lotpa miraynin Amón runakunaq hallp'anman qayllaspaykichisqa, aman paykunata imanankichispaschu, amallataq paykunawan maqanakunkichispaschu. Manan hallp'ankutaqa huk chhikallantapas qosqaykichischu, paykunaman hap'ikapunankupaq qosqayrayku, nispa. 20 (Chay suyutapas Refaim runakunaq hallp'an nispa sutichasqaku, ñawpa tiempopi Refaim runakuna chaypi tiyasqan hawa, paykunatan Amón runakunaqa Zamzum runa nispa sutichasqaku. 21 Refaim runakunaqa askhataq atiyniyoqtaq kasqaku, Anac qharikuna hina hatuchachaq, ichaqa Señor Diosmi Amón runakunaq ñawpaqenpi ch'usaqyachisqa, chaymi Amón runakunaqa chay suyuta hap'ikapusqaku, hinaspan chaypi tiyasqaku. 22 Kaqllatataqmi Señor Diosqa Seirpi tiyaq Esaupa mirayninkunapaqpas ruwasqa, paykunan Hor runakunata ch'usaqyachisqaku hinaspa hallp'ankupi tiyasqaku. 23 Hinallataqmi Gaza qaylla ayllukunapi tiyaq Avim runakunata Filistea runakuna ch'usaqyachisqa, Filistea runakunaqa Cretamantan hamusqaku hinaspa chaypi tiyasqaku). 24 Señor Diosmi nirqan: –Puririychis, hinaspa Arnón mayuta chimpaychis. Ñoqan hap'ichisqaykichis Hesbón llaqta rey Amor runa Sehonta suyuntawan. Hallp'anman haykuspa paykunawan maqanakuychis. 25 Kunanmantaqa llapan kay pacha llaqtakunatan ñawpaqeykichispi manchachisaq khatatatachisaq. Chaymi qankunamanta rimaqta uyarispanku paykunaqa llakikunqaku khatatatanqaku ima, nispa. 26 Cademot ch'inneqmantan Hesbón llaqta rey Sehonman willaqkunata kacharqani sumaqta rimaykunankupaq: 27 Hallp'aykita pasarichiwayku. Mana pañamanpas, lloq'emanpas kutirispa cheqan ñanllatan pasarqosaqku. 28 Mikhunatapas unutapas qolqewanmi rantikusqaykiku mikhunaykupaq ukyanaykupaq. Ñannillantapuni pasarqochiwanaykikutan munani, 29 Jordán mayuta chimpaspayku Señor Diosniykuq qowananku suyuman chayanaykukama. Seirpi tiyaq Esaupa mirayninkunapas Arpi tiyaq Moab runakunapas hallp'anku ukhuntan pasachimuwarqanku, nispa. 30 Hesbón llaqta rey Sehontaq ichaqa mana munarqanchu hallp'ankuta pasananchista, Diosninchis Señor Diosmi sonqonta rumiyaykachirqan ahinapi ñoqanchisman hap'ichinawanchispaq, chaymi kunan hallp'anta hap'ikapunchis. 31 Hinan Señor Diosqa niwarqan: Qhawariy, kunanmi qoyki Sehonta llapan hallp'antawan, kunanpacha haykuy hallp'anta hap'ikapunaykichispaq, nispa. 32 Sehontaq llapan ejercitonpiwan Jahazapi ñoqanchiswan awqa-tinkuq lloqsimurqan. 33 Diosninchis Señor Diostaq ichaqa makinchisman hap'ichiwarqanchis, hinan payta, wawankunata, llapan ejercitontapas atiparqanchis. 34 Llapan llaqtakunatan munaychakurqanchis, hinaspa llapanta thunirqanchis, hinallataq warmikunata, qharikunata, wawakunata ima wañuchirqanchis, manan hukllapas qheparqanchu. 35 Atipasqanchis llaqtakunamantaqa ñoqanchispaq hap'ikurqanchis uywakunata, wasi kawsaykunallatawanmi. 36 Arnón mayu qayllapi kashaq Aroer llaqtamanta, hinallataq chay wayq'opi kashaq hukkaq llaqtamantawan Galaadkama, manan huk llaqtapas karqanchu sinchi sasa atipananchispaqqa, Diosninchis Señor Diosmi tukuy chaykunata hap'ichiwarqanchis. 37 Kay llaqtakunallamanmi maqanakuq mana rirqanchischu: Amón runakunaq hallp'anman, Jaboc mayu hap'iyman, orqo-orqopi llaqtakunaman, hinallataq Señor Diospa llapan hark'awasqanchis llaqtakunamanpas.
