Deuteronomio 19

1Diosniykichis Señor Dios qonasuykichis suyupi tiyaq runakunata wañuchiqtinmi, qankuna llaqtankuta hap'ikapuspa wasinkupi tiyankichis. 2Señor Diosniykichis hap'ikapunaykichispaq qonasuykichis suyupin kinsa llaqtata t'aqankichis, 3chay llaqtakunaman riq ñankunatan allichankichis. Hinaspan chay suyuta kinsaman t'aqankichis, runa wañuchiq chay llaqtakunaman ayqespa pakakunanpaq. 4Pi runapas runamasinta wañuchinman mana yuyaypichu, manataq awqantin kaspapaschu chayqa, pakakuna llaqtamanmi ayqekunqa mana wañuchisqa kananpaq. 5Kay hina kaqtin: Mayqenpas huk runamasinpiwan sach'a-sach'ata llant'a ch'eqtaq rinkuman, hinataq sach'ata wit'ushaqtin k'aspinmanta hacha qonqay phawarqospa llank'aqmasinta sinchita k'irirqospa wañurqochinman chayqa, chay runan huknin pakakuna llaqtaman ayqeyta atin qespikunanpaq. 6Mana chayqa, wañuqpa vengakuq ayllunmi sinchi phiñasqa qatipaspa tariparqonman, ñan karu kasqanrayku, hinaspa wañurqochinman mana wañuypaq huchachasqa kashaqtin, chay runaqa manan awqantin kaspachu wañuchirqan. 7Chayrayku, kamachiykichis kinsa llaqtakunata t'aqanaykichispaq. 8Diosniykichis Señor Diosmi ñawpa taytaykichisman suyuta qonanpaq prometerqan, chay suyuta hatunyachispa llapanta qosuqtiykichis, 9kamachikusqan simikunata mana qonqaspa kasukunkichis, Señor Diosniykichista munakunkichis, munaynintapas ruwankichis chayqa, kinsa pakakuna llaqtatawanraqmi yapankichis. 10Ahinapin Diosniykichis Señor Dios qosunkichis chay suyupiqa mana huchayoq runata mana wañuchinkichischu, manataq qankunaqa wañuchisqamanta huchachasqapaschu kankichis. 11Pipas runamasinta cheqnikuspa qhamiyanman, hinaspataq hap'ispa payta wañurqochinman, chaymantataq hukkaqnin pakakuna llaqtaman ayqenman chayqa, 12llaqtanpi kurak runakuna kachanqa pakakusqanmanta aysamunankupaq. Hinaspan kurak runakunaqa wañuqpa vengakuq ayllunman runa wañuchiqta hap'ichinqaku wañuchinanpaq. 13Aman chay runataqa khuyapayankichischu, chay hinapin Israelpi mana huchayoq runa wañuchiqta ch'usaqyachinkichis. Hinan allillan kankichis. 14Diosniykichis Señor Dios qosunkichis chay suyupi hallp'aykichis qorpataqa aman llaqta-masiykichispa hallp'anman ithiykuchinkichischu, chay qorpataqa ñawpa taytaykichismi churarqan. 15Ima huchaña kaqtinpas, ch'ulla testigo rimariqtinqa manan pitapas huchachayta atiwaqchischu, aswanpas iskaypas kinsapas testigokuna rimarillaqtinmi huchachayta atiwaqchis. 16Huk millay llulla testigo piqpa contranpipas sayarispa ima huchamantapas ch'atanman chayqa, 17iskaynin churanakuqkunan Señor Diosman qayllaykunqaku, hinallataq tupaqninman hina chay kuti llank'ashaq sacerdotekunamanpas juezkunamanpas qayllaykunqaku, 18juezkunataq allinta tapupakunqaku. Testigoq llaqtamasin contra ch'atasqan llulla kaqtintaq, 19payta huchachankichis imaynatachus llaqtamasinta ruwayta munarqan chay hinata. Ahinapin qankuna ukhumanta chay mana allinta ch'usaqyachinkichis. 20Chayta uyarispataq llapa runakuna manchakunqaku, manañataq chay millay mana chaninta ruwanqakuñachu. 21Aman chay hina ruwaqta khuyapayankichischu, aswanpas imaynatachus ruwanqa chay hinallatataqmi muchuchinkichis, kawsaymanta kawsayta, ñawimanta ñawita, kirumanta kiruta, makimanta makita, chakimantapas chakita.

will be added

X\