Deuteronomio 17

1Wakatapas ovejatapas mana allintaqa aman Diosniykichis Señor Diosman sacrificiopi haywankichischu, payqa chay hina haywasqataqa cheqnikunmi. 2Diosniykichis Señor Diospa qonasuykichis suyupi mayqen llaqtapipas warmipas qharipas Señor Diospa rimanakuyninta p'akispa mana munasqanta ruwashan nisqata uyarinkichis chayqa, 3chay runataq Señor Diospa hark'asqanta ruwaspa, wak dioskunatapas, intitapas, killatapas, qoyllurtapas, ch'askatapas yupaychanqa chayqa, 4allintapunin tapupakunkichis. Cheqaqtapunitaq Israel suyupi chay mana chanin ruwasqata tarinkichis chayqa, 5chay ruwaqtaqa warmiña qhariña kaqtinpas llaqta punku qhepaman horqospaykichismi ch'aqespa wañuchinkichis. 6Chaywanpas chay runataqa wañuchinkichis iskaypas kinsapas testigokuna rimariqtinmi, huk testigolla kaqtinqa aman wañuchinkichischu. 7Chay huchachasqa runataqa testigokunan ñawpaqta ch'aqenqa, chaymantañan llaqta runakunaqa ch'aqellanqataq. Chay hinapin chay mana allinta qankuna ukhumanta ch'usaqyachinkichis. 8Llaqtaykichiskunapi wañuchiymantapas, hallp'a qechunakuymantapas, k'irinakuymantapas, hukkunamantapas sinchi sasa chaninchanaykichispaq kaqtinqa, Diosniykichis Señor Dios akllakunqa chay cheqasta rinkichis. 9Chayaspaykichistaq Leví runa sacerdotekunata, tupaqninpi llank'ashaq jueztawan tapunkichis. Paykunataq chayta chaninchanqaku. 10Qankunataq chayta ruwankichis nisqasuykichista mana p'akispa. 11Chay hinaqa, nisqasuykichisman hinan ruwankichis, chay kikin chaninchasqantan hunt'ankichis, ama pañamanpas lloq'emanpas t'aqarikuspa. 12Señor Diospa ñawpaqenpi chaninchaq sacerdotetapas jueztapas mana kasuspa anchaykachaq runatan ichaqa wañuchinkichis, chay hinapin Israel runakuna ukhumanta chay mana allinta ch'usaqyachinkichis. 13Chaymi runakunaqa chayta uyarispanku manchakunqaku, manataq anchaykachaspa ruwanqakuñachu. 14Diosniykichis Señor Dios qosunkichis chay suyuta hap'ikapuspa, chaypi tiyaspañataq niwaqchis: Reyta churakusun kamachiwananchispaq, imaynan qorpanchis suyukunaqpas reynin kan hinata, nispa chayqa, 15Diosniykichis Señor Dios akllakunqa chay runatan reyniykichispaq churankichis. Wak llaqtayoqtapas mana llaqta-masiykichistapas aman reyta churankichischu, aswanpas llaqta-masillaykichistapunin reytaqa churankichis. 16Chay churasqaykichis reyqa aman askha caballokunata huñunqachu, amataq Egiptomanpas runakunata kachanqachu caballokunata askhayachiyta munaspa. Señor Diosqa nirqasunkichismi: Aman hayk'aqpas Egiptoman riq ñanta kutinkichisñachu, nispa. 17Amataq askha warmiyoqpaschu kanqa, mana chayqa sonqontan waqllichinman. Amallataq qoritapas qolqetapas sinchi askhataqa huñukunqachu. 18Hinallataq chay reyqa kamachikuyta qallarishaspa, Leví runa sacerdotekunaq waqaychasqan kashaq kamachikuy simi qelqamanta payqa qelqachikunqa, chay simikunata kikin rey leekunanpaq. 19Chay qelqachikusqan qelqataqa manan saqenqachu, aswanpas tukuy kawsasqan p'unchaymi leeshallanqa, chaymi Diosniykichis Señor Diosta manchakuyta yachanqa, tukuy kamachikusqan simikunatapas makillataq kasukunqa. 20Manataq llaqtamasinkuna ukhupipas anchaykachanqachu, manallataq kay kamachikuy simikunamanta pañamanpas lloq'emanpas t'aqarikunqachu. Chaymi Israel suyupi paypas mirayninkunapas unayta kamachinqaku.

will be added

X\