1 Abib killapin Señor Diosniykichispaq Pascua Fiestata ruwankichis. Chay killapin huk tuta Diosniykichis Señor Diosqa Egipto suyumanta horqomurqasunkichis. 2 Diosniykichis Señor Dios sutinta yupaychanapaq akllakunqa chay cheqastan rinkichis, hinaspa wakatapas ovejatapas nak'aspa Pascua sacrificiota Señor Diosman haywankichis. 3 Chay haywasqa animaltaqa mana qonchuyoq t'antatawanmi mikhunkichis. Qanchis p'unchaymi mana qonchuyoq t'antata mikhunkichis. Chay t'antaqa Llakikuy T'antan sutin, chaytan mikhurqankichis Egipto suyumanta usqhaylla lloqsimushaspaykichis. Chay hinapin lloqsimusqaykichis p'unchayta kawsanaykichiskama yuyashallankichispuni. 4 Chay qanchis p'unchay ukhupiqa aman llapa suyuykichispi qonchu kanqachu. Fiesta Qallariy p'unchay tardepi haywasqaykichis animal aychatataq ama qhepantin p'unchaypaq puchuchinkichischu. 5 Pascua sacrificiotaqa aman Diosniykichis Señor Diospa qonasuykichis suyupi mayqen llaqtapipas haywankichischu, 6 aswanpas sutinta yupaychanapaq Señor Dios akllakunqa chay cheqasllapin Pascua sacrificiotaqa haywankichis inti chinkaykuy horasta, chay horastan Egiptomanta lloqsimpurqankichis. 7 Señor Dios akllakunqa chay cheqaspin haywasqa aychata kankaspa mikhunkichis. Qhepantin paqartataq wasiykichisman kutipunkichis. 8 Soqta p'unchaymi mana qonchuyoq t'antata mikhunkichis, qanchiskaq p'unchaytaqmi Diosniykichis Señor Diospaq hatun p'unchay kanqa. Chay p'unchaypiqa aman imatapas llank'ankichischu. 9 Trigo ichhuy qallariy p'unchaymantapacha qanchis semana tukuyta, 10 Diosniykichis Señor Diospa sutinpi Semanakuna nisqa Fiestata ruwankichis, Señor Diosniykichispa saminchasqasuykichisman hinataq tukuy sonqo ofrendaykichiskunata payman haywankichis. 11 Hinallataq Diosniykichis Señor Dios payta yupaychanapaq akllakunqa chay cheqaspi paypa ñawpaqenpi q'ochukunkichis wawaykichiskunapiwan, kamachiykichiskunapiwan, llaqtaykichispi tiyaq Leví runakunapiwan, wak llaqtayoqkunapiwan, mana tayta-mamayoqkunapiwan, viudakunapiwan. 12 Yuyarinkichistaq Egipto suyupi kamachi kasqaykichista, chayrayku tukuy kay kamachikuyta mana qonqaspa hunt'ankichis. 13 Trigo cosechayta lliwta tukuspa uvasniykichistapas ch'irwayta tukuspa, qanchis p'unchayta Ch'uklla Ruway Fiestata ruwankichis. 14 Chay fiestapin q'ochukunkichis wawaykichiskunapiwan, kamachiykichiskunapiwan, llaqtaykichispi tiyaq Leví runakunapiwan, wak llaqtayoqkunapiwan, mana tayta-mamayoqkunapiwan, viudakunapiwan. 15 Señor Diosniykichis akllakunqa chay cheqaspi paypa sutinpi qanchis p'unchayta fiestata ruwankichis, tukuy cosechaykichiskunapipas llank'asqaykichiskunapipas Diosniykichis Señor Dios saminchasunkichis chay hawa. Ahinapin qankuna ancha kusisqa kankichis. 16 Señor Dios akllakunqa chay cheqastan sapa wata llapa qharikuna kinsa kutita Señor Diospa ñawpaqenman rinqa Mana Qonchuyoq T'anta Fiestapi, Semanakuna nisqa Fiestapi, Ch'uklla Ruway Fiestapi ima. Chay fiestakunapiqa aman pipas hinalla Señor Diosman rinqachu, 17 aswanpas sapankan ofrendakunata apanqa, Diosniykichis Señor Diospa saminchasqanman hina. 18 Diosniykichis Señor Dios qosunkichis chay suyu llaqtakunapin aylluykichisman hina juezkunata oficialkunata churankichis, runakunata chanin-kayman hina juzganankupaq. 19 Ama chaninchayta waqllichiychischu, aman mayqen runamanpas sayakunkichischu, amataq lluk'iykusqatapas chaskikunkichischu, lluk'iykuyqa yachayniyoq runakunaq ñawintan ñawsayachin, chanin runakunaq rimasqantapas waqllichinmi. 20 Chanin-kayman hinallapunin ruwankichis, chay hinapin Diosniykichis Señor Diospa qonasuykichis suyuta hap'ikapunkichis hinaspa kawsankichis. 21 Diosniykichis Señor Diospa altarnin qayllapiqa aman ima sach'atapas mallkinkichischu Asera diosa hina yupaychasqa kananpaq. 22 Aman yupaychana saywa rumita sayarichinkichischu. Tukuy chaykunataqa cheqnikunmi Diosniykichis Señor Diosqa.
