Deuteronomio 15

1Sapa qanchiskaq watapin manuykichiskunata pampachapunkichis. 2Chaytaqa kay hinatan ruwankichis: Pipas llaqtamasinman imatapas manuqqa, chay manutan pampachapunqa. Manataq llaqta-masintapas wawqentapas: Pagapuway, ninqañachu, kikin Señor Dios chay manuta pampachasqanrayku. 3Wak llaqtayoqmantaqa manusqaykichista pagachikapuwaqchismi, llaqta-masiykichismantan ichaqa ama pagachikunkichischu. 4Chay hinapin qankuna ukhupi mana wakchakuna kanqachu, Diosniykichis Señor Diosmi hap'ikapunaykichispaq qonasuykichis suyupi saminchasunkichis, 5Señor Diosniykichistachus kasukunkichis, kunan kamachisqay paypa tukuy kamachikuyninkunatachus hunt'ankichis chayqa, 6prometesqasuykichisman hinan Diosniykichis Señor Diosqa saminchasunkichis. Askha llaqtakunamantaq mañankichis, qankunataq ichaqa mana pimantapas mañakunkichischu. Askha suyukunatan kamachinkichis, qankunatataq ichaqa mana pipas kamachisunkichischu. 7Diosniykichis Señor Dios qosunkichis chay suyu llaqtakunapi mayqen llaqta-masiykichispas wakcha kaqtinqa, aman sonqoykichista rumiyachinkichischu amataq maqllakunkichischu. 8Aswanpas yanapankichismi mañankichismi necesitasqantaqa. 9Paqtataq mana allinta yuyaykuwaqchis: Qanchiskaq wataqa qayllamushanñan, manu pampachana wata, nispaykichis. Hinaspataq llaqta-masiykichis wakchakunata millay ñawiykichiswan qhawariwaqchis, manataq imatapas qoykuwaqchischu. Chaymi qankuna contra Señor Diosman waqyakuqtin, huchachasqa kawaqchis. 10Imatapas qoykuspaykichisqa tukuy sonqon qonkichis ama maqllakuspa, chay hinata ruwaqtiykichismi Diosniykichis Señor Diosqa tukuy llank'asqaykichispi ima ruwasqaykichispipas saminchasunkichis. 11Kay suyupiqa kashallanqapunin wakchakuna, chayrayku, kamachiykichis llaqta-masiykichista, wakchakunata, mana imayoqkunatapas ama mich'akuspa yanapanaykichispaq. 12Hebreo wawqeykichistapas panaykichistapas kamachiykichispaq rantikunkichis chayqa, soqta watallatan servichikunkichis, qanchiskaq watapitaq kacharipunkichis. 13Kacharipuspaykichisqa aman hinallatachu kacharparinkichis, 14aswanpas sonqopas-sonqo qoykunkichis uywaykichismanta, hinallataq trigota, vinota ima. Señor Diosniykichispa saminchasqasuykichisman hinan qonkichis. 15Yuyariychis qankunapas Egipto suyupi kamachi kasqaykichista, chaymanta Diosniykichis Señor Dios horqomusqasuykichistawan. Chayraykun chay hinata kunan kamachiykichis. 16Ichaqa qankunatapas wawaykichistapas munakuspa, qankunawanpas allillantaq kashaspa, kamachiykichis nisunkichis: Manan ripuymanchu, nispa chayqa, 17huk t'oqonata hap'ispa punkuman k'iraykuchispa ninri ura puntanta t'oqonkichis. Hinan chaymanta kamachillaykichispuni kapunqa. Hinallatataq warmi kamachiykichistapas ruwankichis. 18Ama sinchita sasachaychu kamachiyki kacharipuytaqa, payqa soqta watantinmi servirqasunkichis huk llank'apakuq runaq ganasqan kuskanllanmanta. Ahinapin Diosniykichis Señor Diosqa tukuy ruwasqaykichiskunapi saminchasunkichis. 19Diosniykichis Señor Diospaqmi t'aqankichis wakaykichismanta ovejaykichismanta llapan ñawpaq wachay orqo uñakunata. Wakaykichispa ñawpaq wachay orqo uñantapas aman llank'achinkichischu, ovejaykichispa ñawpaq wachay orqo uñantapas aman rutunkichischu. 20Chaykunatataq sapa wata Diosniykichis Señor Diospa ñawpaqenpi tayta-mama wawakunantin mikhunkichis pay akllakunqa chay cheqaspi. 21Ichaqa ñawsapas wist'upas imallanpas mana allin kanman chayqa, aman Diosniykichis Señor Diosman sacrificiota haywankichischu. 22Aswanpas wasiykichispin mikhunkichis, ch'uya kaqpas mana ch'uya kaqpas llapaykichis, imaynan tarukatapas luychutapas mikhunkichis hinata. 23Yawarnintan ichaqa ama mikhunkichischu, aswanpas pampamanmi hich'apunkichis.

will be added

X\