Deuteronomio 12

1Kay kamachikuykunatapas unanchaykunatapas qankunaqa tukuy kawsasqaykichis p'unchaykunan hunt'ankichis, ñawpa taytaykichispa Señor Diosnin hap'ikapunaykichispaq qosunkichis chay hallp'api. 2Chaypi tiyaq wikch'unaykichis runakunaqa diosninkutan yupaychanku orqo patakunapi, moqokunapi, askha k'allmayoq sach'a chakikunapipas. Chay cheqaskunatan lliwta thuninkichis. 3Hinallataq altarninkuta, yupaychana saywa ruminkuta, Asera diosankuta, diosninkuq rikch'ayninkunatapas llapanta ñut'uta p'akinkichis, pipas manaña hayk'aqpas chaykunata yuyarinanpaq. 4Qankunaqa manan chay runakuna diosninkuta yupaychanku chay hinatachu Diosniykichis Señor Diosta yupaychankichis. 5Señor Diosmi aylluykichis ukhupi huk cheqasllata akllanqa chaypi payta yupaychanaykichispaq, chaytan yupaychaq rinkichis. 6Apankichistaq ruphachina sacrificiokunatapas, sumaq kawsay sacrificiokunatapas, hinallataq diezmoykichista, ofrendaykichista, Señor Diosman qonaykichispaq prometekusqaykichis ofrendakunata, tukuy sonqo ofrendakunata, wakaykichispa ovejaykichispa ñawpaq wachay uñankunata ima. 7Chaymantataq Diosniykichis Señor Diospa ñawpaqenpi tayta-mama wawakunantin mikhunkichis, tukuy llank'asqaykichismanta kusikunkichis, Señor Diosniykichis saminchaqtin. 8Chaypiqa manan kaypi sapanka ima munasqanchista ruwanchis chay hinatachu ruwankichis. 9Manan chayashankichisraqchu hap'ikapunaykichispaq Diosniykichis Señor Diospa qonasuykichis sumaq kawsana hallp'amanqa. 10Jordanta chimpaspaykichis Diosniykichis Señor Diospa qonasuykichis hallp'ata hap'ikapuqtiykichismi, payqa tukuy awqaykichiskunamanta qespichisunkichis, hinan qankunaqa thak-kaypi kawsankichis. 11Chaymantataq Diosniykichis Señor Diospa payta yupaychanapaq akllakusqan cheqasman tukuy kamachisqayta apankichis: ruphachina sacrificiokunata, sumaq kawsay sacrificiokunata, diezmokunata, ofrendakunata, Señor Diosman qonaykichispaq prometekusqaykichis llapan ofrendakunatawan. 12Hinan Diosniykichis Señor Diospa qayllanpi q'ochukunkichis, qankunapas, churiykichispas, ususiykichispas, qhari kamachiykichispas, warmi kamachiykichispas llaqtaykichispi tiyaq Leví runakunapas, paykunaqa manan qankuna hinachu hallp'ata chaskinqaku. 13Paqtataq munasqaykichis cheqaskunapi Señor Diosman ruphachina sacrificiokunata haywawaqchis, 14mayqen ayllupichus Señor Diosniykichis huk cheqasta akllakunqa chayllapin haywankichis, tukuy kamachisqaykunatapas hunt'ankichis. 15Chaywanpas llaqtaykichispiqa animalkunata nak'akuspaykichis hayk'an munasqaykichista aychanta mikhunkichis, may chhikatachus Señor Dios qosunkichis chayman hina. Chaytaqa pipas mikhullankichismi, ch'uya kaqpas mana ch'uya kaqpas, imaynan tarukata luychuta mikhunkichis hinata. 16Yawarnintan ichaqa ama mikhunkichischu, aswanpas pampaman hich'apunkichis. 17Aman llaqtaykichiskunapi Señor Diospaq t'aqasqaykichis kaqtaqa mikhunkichischu trigomanta, vinomanta, aceitemanta, diezmoykichiskunata, ovejaykichispa wakaykichispa ñawpaq wachay uñankunata, tukuy sonqo ofrendakunata, Señor Diosman qonaykichispaq prometekusqaykichis ofrendakunata, wak ofrendakunatapas. 18Chaykunataqa llank'asqaykichismanta kusikuspan mikhunkichis Diosniykichis Señor Diospa ñawpaqenpi maypichá akllakunqa chay cheqasllapi, churiykichis, ususiykichis, qhari kamachiykichis, warmi kamachiykichis, llaqtaykichispi tiyaq Leví runakunapiwan. 19Paqtataq Leví runakunata tukuy kay pachapi kawsasqaykichis p'unchaykuna qonqawaqchis. 20Diosniykichis Señor Dios prometesqanman hina hallp'aykichista hatunyachiqtinqa, aychata mikhuyta munaspaykichisqa mikhullaychis hayk'an munasqaykichista. 21Diosniykichis Señor Diospa payta yupaychanapaq akllakusqan cheqas tiyasqaykichismanta karu kaqtinqa, paypa qosqasuykichis ovejakunata, wakakunata, nak'akuspa hayk'an munasqaykichista tiyasqaykichispi mikhuyta atinkichismi, kamachisqayman hina. 22Chaytaqa pipas mikhullankichismi ch'uya kaqpas mana ch'uya kaqpas, imaynan tarukata luychuta mikhunkichis hinata. 23Yawartan ichaqa amapuni mikhunkichischu, yawarpiqa kawsaymi kashan, chayrayku ama kawsayta yawartawan mikhunkichischu. 24Aman yawarta mikhunkichischu aswanpas pampamanmi hich'apunkichis. 25Aman yawarta mikhunkichischu, ahinapin qankunapas mirayniykichispas allillan kankichis Señor Diospa munayninta ruwasqaykichismanta. 26Ichaqa Señor Diospaq t'aqasqaykichis ofrendakunatapas, payman qonaykichispaq prometekusqaykichis ofrendakunatapas Señor Diospa akllakusqan cheqasmanmi apankichis, 27chaypitaq Diosniykichis Señor Diospa altarninpi haywankichis ruphachina sacrificiokunata. Haywasqaykichis sacrificiokunaq yawarnintataq altarman hich'ankichis, aychantataq ichaqa mikhuyta atinkichis. 28Tukuy kay kamachisqay simikunata makilla hunt'aychis, hinan qankunapas mirayniykichispas allillanpuni kankichis, Diosniykichis Señor Diospa munayninta chaninta ruwasqaykichismanta. 29Hap'ikapunaykichis suyu runakunataqa Diosniykichis Señor Diosmi wañuchinqa, hinan qankunaqa hap'ikapuspa chaypi tiyapunkichis. 30Paqtataq Señor Diospa paykunata wañuchisqan qhepata qankuna kikiykichis urmawaqchis paykunaq ruwasqanta hina ruwaspa, chayrayku ama diosninkuta yupaychayta yuyaykuspa tapukunkichischu: ¿Imaynatataq paykunari diosninkuta servirqan? nispaqa. 31Aman Diosniykichis Señor Diostaqa imaynatachus chay runakuna diosninkuta servinku chay hinataqa yupaychankichischu, paykunaqa diosninkuta servispankuqa Señor Diospa cheqnisqan tukuy qhellikaqtan ruwashanku, kikin wawankutapas diosninkuman sacrificiota haywaspa ruphachishanku. 32Chayrayku, tukuy kamachisqayman hina ruwaychis, ama chhikallantapas yapaykuspa nitaq pakaykuspa.

will be added

X\