1 Chay hinaqa, Diosniykichis Señor Diosta munakuychis, hinallataq hunt'anaykichispaq kamachisqasuykichis unanchayninta, chaninchayninta, kamachikuyninkunatapas kasukuychis. 2 Yuyariychis Diosniykichis Señor Diospa wanachiyninkunata, chaytaqa manan wawaykichiskuna yachanchu manataq rikurqankupaschu. Yuyariychis paypa hatun-kayninta hatun atiynintapas, 3 hinallataq Egipto rey Faraón contra suyun contra ima señalkunata musphanakunata ruwasqantapas. 4 Egipto soldadokuna qatimusuqtiykichismi, Señor Diosqa caballonkunantinta carretankunantinta Puka Qochawan millp'uchirqan. Ahinapin paykunata wañuchipurqan. 5 Yuyarillaychistaq manaraq kayman chayamushaqtiykichis ch'inneqpi Señor Diospa qankunapaq tukuy ruwasqankunata, 6 hinallataq Rubén ayllumanta Eliabpa churin Datanta Abiramtawan ruwasqantapas. Llapa Israel runakuna rikushaqtinmi, paykunata aylluntinta karpantinta tukuy kaqninkunantinta pampa kicharqokuspa millp'urqorqan. 7 Cheqaqtapunin qankunaqa Señor Diospa chay hatun musphay ruwasqankunata rikurqankichis. 8 Kunan kamachisqay tukuy kamachikuykunata hunt'aychis, ahinapin kallpayoq kankichis, chaskinaykichis suyutapas hap'ikapunkichis, 9 hinallataq chay hallp'api unayta kawsankichis. Chaytan Señor Diosqa ñawpa taytaykichisman mirayninkumanpas qonanpaq prometesqa, chay hallp'aqa lecheq miel misk'iq askha kananmi. 10 Hap'ikapunaykichis hallp'aqa manan lloqsimusqaykichis Egipto hallp'a hinallachu, chaypiqa muhu tarpusqaykichista huertata hinan makilla qarparqankichis. 11 Hap'ikapunaykichis hallp'an ichaqa wayq'okunayoq orqokunayoq, parapas chayashallanmi. 12 Chay hallp'ataqa Diosniykichis Señor Diosmi mana saqespa makilla waqaychashan wata qallariymanta wata tukukuykama. 13 Kunan p'unchay kamachisqay simikunata kasukunkichis, Diosniykichis Señor Diostapas munakunkichis, tukuy sonqo tukuy alma payta servinkichis chayqa, 14 Diosniykichis Señor Diosqa tiemponpin parata chayachimunqa, tarpuy kinray paratapas hallmay kinray paratapas. Ahinapin qankunaqa hoqarinkichis trigotapas, vinotapas, aceitetapas. 15 Hinallataq uywakunaq mikhunanpaq campopi q'achuta wiñachinqa, qankunaq mikhunaykichispas llasaqmi kanqa. 16 Allinta cuidakuychis, paqtataq sonqoykichiswan q'otuchikuwaqchis. Ama Señor Diosmanta t'aqakuychischu, amataq wak dioskunatapas yupaychaspa serviychischu. 17 Mana chayqa, qankuna contra phiñakuspanmi Señor Diosqa parata mana chayachimunqachu, hinan chakrapas rurusqanta mana poqochinqachu, hinallataq qankunapas pisi p'unchaykunallapi Señor Diospa qonasuykichis allin hallp'api wañunkichis. 18 Chayrayku, chay simikunata sonqoykichispi allinta waqaychaychis, hinallataq makiykichismanpas mat'iykichismanpas chay simikuna qelqasqata watakuychis yuyarinaykichispaq. 19 Wawaykichiskunamantaq chay simikunata yachachiychis, chaykunamanta rimapayaychis wasipi kashaspapas, ñanta purishaspapas, puñuykushaspapas, hatarishaspapas. 20 Qelqakullaychistaq wasiykichis punku sayaq k'aspikunapipas, llaqtaykichis punkukunapipas. 21 Ahinapin ñawpa taytaykichisman qonanpaq Señor Diospa prometesqan hallp'api qankunapas wawaykichiskunapas unayta kawsankichis, kay pachapas hanaq pachapas kashasqan tukuy p'unchaykunapi. 22 Kunan kamachisqayman hinachus tukuy kay simikunata hunt'ankichis Diosniykichis Señor Diosta munakunkichis, kamachikuyninkunatapas kasukunkichis, hunt'aqllapuni kankichis chayqa, 23 tukuy suyukunatan ñawpaqeykichismanta Señor Diosqa wikch'unqa. Qankunamanta aswan askha aswan kallpayoq suyukunaña kaqtinpas, atipankichispunin. 24 Maykamachus purinkichis chay tukuy hallp'akunan qankunaq kanqa. Chaymi hallp'aykichis kanqa uray lado ch'inneqmanta wichay lado Líbano orqokunakama, inti lloqsimuy lado Eufrates mayumantataq inti haykuy lado lamar-qochakama. 25 Manan pipas tupapakusunkichischu. Diosniykichis Señor Diosmi prometesqanman hina maypiña purinkichis chaypas chaypi tiyaq runakunata qankunawan manchachinqa llaksachinqa. 26 Qhawariychis, kunanmi rikuchiykichis saminchayta ñakaytawan, mayqentapas akllakunaykichispaq. 27 Señor Diospa siminkunata kunan kamachishaykichis chaykunata kasukunkichis chayqa, Señor Diosmi saminchasunkichis. 28 Manataqchus kay nisqay simikunata kasukunkichis, aswanpas waqllipunkichis mana reqsisqaykichis wak dioskunata yupaychaspa chayqa, ñakasunkichismi. 29 Hap'ikapunaykichis hallp'aman Diosniykichis Señor Dios pusaykusuqtiykichisqa, Gerizim orqomanta saminchayta rimamunkichis, Ebal orqomantataq ñakayta rimamunkichis. 30 Chay orqokunaqa Jordán mayu chimpapin kashan, Jordán wayq'opi tiyaq Canaán runakunaq hallp'anpi. Ñanpa inti haykuy ladonpin kashan, Morepi encina sach'a-sach'a qaylla Gilgal llaqta qhawaypi. 31 Jordán mayu chimpanaykichis patapiñan kashankichis, Diosniykichis Señor Diospa qonasuykichis hallp'ata hap'ikapunaykichispaq. Hap'ikapuspaykichis chaypi tiyaspataq, 32 kunan kamachisqay unanchaykunatapas kamachikuykunatapas makilla hunt'aychis.
