1 Haqay p'unchaymi Señor Diosqa niwarqan: Iskay p'alta rumikunata thupakamuy ñawpaqkaqta hina, k'ullumanta huk arcatawan ruwakamuy, hinaspa kay orqoman wichamuy. 2 Ñoqan chay p'alta rumikunapi qelqasaq ñawpaq p'akisqayki rumikunapi qelqarqani chay kikin simikunata, hinaspa chaykunata arcaman churanki, nispa. 3 Chaymi acacia kurkumanta huk arcata ruwarqani, iskay p'alta rumikunatawan thuparqani ñawpaqkaqta hina. Hinaspa chay rumikunata aparikuspa orqoman wicharqani. 4 Señor Diostaq p'alta rumikunapi qelqarqan ñawpaqkaqta hina, orqopi nina ukhumanta huñukuy p'unchay rimasqan chunka kamachikuy simikunata, hinaspa chaykunata qomuwarqan. 5 Orqomanta kutiykamuspataq, chay rumikunata ruwasqay arcaman churarqani, chaypin kashan Señor Diospa kamachiwasqanman hina. 6 Israel runakunaqa Jaacanpa churinkunaq p'uytunkunamantan puririrqanku Moserakama. Chaypin Aarón wañukapurqan, hinan p'ampapurqanku. Churin Eleazartaq rantinpi sacerdote kapurqan. 7 Chaymantataq Gudgodaman rirqanku, Gudgodamantataq Jotbataman rirqanku, chaypiqa askhan unu karqan. 8 Hinan Señor Diosqa Leví aylluta akllakurqan rimanakuy arcanta apanankupaq, Señor Diosta servinankupaq, sutinpi saminchanankupaqwan, chay hinatan kunankama ruwashanku. 9 Chaymi Leví ayllu runakunaqa mana ayllumasin runakuna hinachu hallp'ata chaskirqanku, aswanpas Señor Diosmi paykunaq herencianqa Señor Diospa nisqanman hina. 10 Ñoqaqa tawa chunka p'unchay tawa chunka tutan orqopi kasharqani ñawpaq kuti hina, chaymi Señor Diosqa mañakusqayta uyariwaspa mana wañuchiyta munarqasunkichischu. 11 Aswanpas niwarqan: Phaway kay llaqtata pusaykuy ñawpa taytaykichisman juraspa prometesqay hallp'aman, chaytan paykuna hap'ikapunqaku, nispa. 12 Chay hinaqa, Israel runakuna, ¿imatataq Diosniykichis Señor Diosqa qankunaq ruwanaykichista munan? Kaykunallatan munan: payta manchakunaykichista, tukuy kamachikuyninta kasukunaykichista, munakunaykichista, tukuy sonqo tukuy alma servinaykichista, 13 hinallataq kunan kamachisqay unanchayninkunata kamachikuyninkunatapas hunt'anaykichistawan, ahinapin allillan kankichis. 14 Qhawariychis, Señor Diospa kaqninmi lliw hanaq pachapas, kay pachapas, tukuy chaypi kaqkunapas. 15 Chaywanpas Señor Diosqa ñawpa taytaykichistan anchatapuni munakurqan, chaymi tukuy llaqtakunamanta aswantaqa qankunata akllakurqasunkichis, chay hinapin qankunaqa akllasqa llaqtaña kankichis. 16 Chay hinaqa, sonqoykichispi kasukuqpuni kaychis, amataq rumi sonqo kaspa k'ulluchakuychischu. 17 Diosniykichis Señor Diosqa dioskunaq Diosninmi, señorkunaq Señorninmi. Payqa hatun Diosmi, atiyniyoqmi, manchanataqmi. Payqa manan pimanpas sayapakunchu, manataq lluk'iykusqatapas chaskikunchu. 18 Makillan qhawashan mana sarunchasqa kanankupaq viudakunatapas mana tayta-mamayoqkunatapas, hinallataq wak llaqtayoqkunatapas munakuspa p'achachin mikhuchin. 19 Qankunapas munakullaychistaq wak llaqtayoqkunataqa, Egipto suyupi wak llaqtayoq kasqaykichisrayku. 20 Diosniykichis Señor Diostan manchakunkichis, pay sapallantataq servinkichis, paypaq hunt'aqllapuni kaychis, juraspaykichisqa paypa sutinpi juraychis. 21 Payqa yupaychanaykichismi, payqa Diosniykichismi, paymi qankunapaq rikushaqtiykichis manchay hatun musphanakunata ruwarqan. 22 Egiptoman uraykuq ñawpa taytaykichiskunaqa qanchis chunka runakunallan karqanku, kunanmi ichaqa Diosniykichis Señor Dios hatun llaqtata mirachisunkichis hanaq pachapi ch'askakunata hinaraq.
