Daniel 9

1Media suyumanta Asueroq churin Darion Caldea runakunaq suyunpi kamachikusharqan. 2Hinan ñawpaqkaq wata kamachikuyninpi ñoqa Danielqa Señor Diospa profetan Jeremiasman willasqan qelqapi allintapuni qhawarqani, Jerusalenqa qanchis chunka watantin raqay-raqayman tukuchisqa kananta. 3Hinaspan ayunaspa, qhasqa p'achawan churakuspa, uspha patapi tiyaykuspa Señor Diosmanta mañakurqani, payta rogakurqani, valekurqani. 4Diosniy Señor Diosmantan mañakurqani, hinaspan willakurqani: Señor Diosníy, hatun manchakuna Dios, qanmi rimanakusqaykita hunt'anki, munakuqniykitapas kamachikuyniykikunata kasuqkunatapas munakunki. 5Huchallikurqaykun, mana chanintan ruwarqayku, millaytan ruwarqayku, qanta mana kasuspan kawsarqayku, kamachikusqaykikunatapas kamachikuy simiykikunatapas saqepurqayku. 6Manan kamachiyki profetakunata kasurqaykuchu, paykunan sutiykipi willawarqanku reyniykuman, kamachiqniykuman, ñawpa taytaykuman, Israel llaqtantinmanpas. 7Señor Diosníy, qanqa chaninmi kanki, ichaqa ñoqayku Judá runakunapas Jerusalenpi tiyaqkunapas llapan Israel runakunapas kay p'unchaymi p'enqasqa kashayku. Qanmi mana kasukusqaykurayku ch'eqechiwarqankiku, chaymi sispa suyukunapipas karu suyukunapipas kashayku. 8Señor Diosníy, ñoqaykupas, reyniykupas, kamachikuqniykupas, ñawpa taytaykupas p'enqasqan kashayku, qan contra huchallikusqaykurayku. 9Diosniyku Señor Dios, qan contraña sayarirqayku chaypas, qanmi khuyapayaqpas pampachaqpas kanki. 10Diosniyku Señor Dios, manan kasurqaykikuchu, kamachiyki profetakunawan churapuwasqaykiku yachachikuy simikunatapas manan kasurqaykuchu. 11Llapa Israel runakunan yachachikuy simiykikunata mana kasurqankuchu, simiykita mana uyariyta munaspan t'aqakurqanku. Kamachiyki Moisespa kamachikuy siminpi qelqasqa kashaq ñakaykunan jurasqayki huchachaykunan chayamuwarqanku qan contra huchallikusqaykurayku. 12Qantaq ñoqayku contra, kamachiqniyku runakuna contrapas rimasqayki simikunata hunt'arqanki, kay manchay mana allinwan muchuchiwaspaykiku. Manan hayk'aqpas kay pachapiqa karqanchu Jerusalenman muchuy chayamusqanmanta aswanraqqa. 13Moisespa kamachikuy siminpi qelqasqa kashan chayman hinan kay tukuy mana allinkuna chayamuwarqanku, ñoqaykutaq ichaqa huchallikusqaykutapas mana saqepurqaykuchu, cheqaq-kayniykitapas manan makichu uyarirqayku. 14Chaymi qanqa, Diosniyku Señor Dios, kay muchunata wakichirqanki, hinaspa ñoqaykuman chayachimuwarqankiku. Qanqa, tukuy ima ruwasqaykikunapipas chaninmi kanki, ñoqaykun ichaqa mana kasukurqaykikuchu. 15Diosniyku Señor Dios, qanmi Egipto suyumanta kallpasapa kayniykiwan llaqtaykita horqomurqanki, kunankaman chay ruwasqaykiwan allin reqsisqa kashanki, ñoqaykun ichaqa huchallikurqayku, mana chanintan ruwarqayku. 16Señor Diosníy, lliw chanin ruwasqaykikunaman hina kunan amaña k'arakta phiñakuyñachu. Ñoqaykuqpas ñawpa taytaykuqpas huchallikusqaykumantan Jerusalenpas llaqtaykipas llapa muyuriqniykupi tiyaqkunaq pisichasqan kashayku. 17Kunanqa, Diosniyku, kamachiykiq mañakusqanta rogakamusqantawan uyariykuway. Sutiykirayku, Señor Diosníy, khuyapayaykuy raqay-raqay kashaq yupaychana wasiykita. 18Diosniyku, makilla uyariykamuway, sutiykiwan sutichasqa purunyasqa llaqtata allinta qhawariy. Manan chanin ruwasqaykuman hap'ipakuspaykuchu mañakamuykiku, aswanpas ancha khuyapayakuyniykiman hap'ipakuspaykun. 19¡Señor Diosníy, uyariykuwayku! ¡Pampachaykuwayku! ¡Señor Diosníy, makilla uyariykuwayku, hinaspa yanapaykuwayku! ¡Diosníy, qan kikiykirayku, sutiykiwan sutichasqa llaqtaykirayku wawaykikunarayku amaña unaytachu saqewayku! nispa. 20Rimashallarqaniraqmi, mañakushallarqaniraqmi, huchaykunatapas, Israel llaqtaypa huchankunatapas willakushallarqaniraqmi, Diosniypa ch'uya orqonpaq Diosniy Señor Diosmanta mañakuspa. 21Chayllamanmi ñawpaqta rikhuriypi rikusqay Gabriel runa usqhaylla phalamuspa chayamuwarqan ch'isiyaykuyta sacrificio haywana horata hina. 22Hinaspan niwarqan: Daniel, kunanmi hamuni sut'inchaspa qanman entiendechinaypaq. 23Mañakuyta qallarishaqtiykin Dios kutichimurqasunki, ñoqataq chayta qanman willanaypaq hamuni, Diospa ancha munasqan kasqaykirayku. Chayrayku, makilla uyariway rikhuriyta entiendenaykipaq: 24Qanchis chunka semanan t'aqasqa kashan Israel llaqtaykipaq ch'uya llaqtaykipaqwan mana kasukuyta chinkachinapaq, huchatapas p'uchukachinapaq, mana chanin ruwasqata pampachanapaq, wiñaypaq chanin-kayta churanapaq, rikhuriypas profetizasqapas hunt'akunanpaq, Ch'uyay-ch'uya Cheqastapas Diospaq wakmanta t'aqanapaq. 25Kaytan yachanayki entiendenayki: Jerusalenta wakmanta sayarichinapaq perqanapaqwan kamachisqa simi lloqsimusqanmanta Diospa akllasqan Kamachikuq hamunankamaqa qanchis semanan kanqa soqta chunka iskayniyoq semanapiwan. Llaki-phutiy p'unchaykunapin llaqtata wakmanta sayarichinqaku, plazakunatawan llaqta waqaychana muyuriq hasp'isqa k'aktuntinta. 26Soqta chunka iskayniyoq semana tukukuqtintaq Diospa akllasqan Kamachikuqqa wañuchisqa kanqa, ichaqa pay mana piniyoq kaspa. Huk-hina runan hamunqa, soldadonkunataq Jerusalentapas yupaychana wasitapas thuninqa. P'uchukayqa millp'uq unu hinan chayarqamunqa, hatun maqanakuypas Diospa wakichisqan thuniykunapas p'uchukaykamataq kashanqa. 27Hukkaq semanatataq askha runawan allintapuni rimanakunqa, chay kuskan semanatataq sacrificiotawan ofrendatawan qolluchinqa. Chay qhepatataq thuniqqa yupaychana wasi patapi millay-millayta churanqa, chay thuniq runaqa Diospa kamachikusqanman hina ch'usaqyachisqa kanankama, nispa.

will be added

X\