Daniel 8

1Kinsakaq watapi rey Belsasar kamachikushaqtinmi ñoqa Danielqa iskaykaq rikhuriyta rikurqani. 2Rikhuriypin Elam provinciaq hatun llaqtan Susapi kashasqani, Ulai mayu patapi. 3Qhawarispan rikurqani mayu patapi huk anejo sayashaqta. Hatuchaq iskay waqrayoqmi karqan, hukninmi aswan hatun hukkaqmantaqa karqan, chay aswan hatunkaqtaq qhepataña wiñarqan. 4Anejotan rikurqani inti haykuyman, wichayman, urayman waqrapakushaqta, manataq mayqen animalpas chaywan churanakuyta atirqanchu, atiyninmantapas pipas kacharichiyta atirqanchu. Ima munasqantan ruwarqan, aswan-aswantan hatunchakurqan. 5Chay rikusqaypi yuyaykushaqtiymi huk orqo cabra inti haykuyneqmanta qonqaylla rikhurimurqan, phawayllan phawamurqan pampatapas mana saruykuspa. Chay cabran mat'inpi hatun waqrayoq karqan. 6Mayu patapi rikusqay iskay waqrayoq anejoman chayaspataq sinchi phiñasqa tukuy kallpanwan takarqan. 7Anejoman imaynatachus phawaykusqantan rikurqani, sinchi phiñasqan chaypa iskaynin waqranta p'akirqorqan, anejotaqmi mana kallpayoq kapurqan paywan churanakunanpaq. Pampaman kumparqospanmi sarurparirqan, manataq pipas anejota kacharichiq karqanchu. 8Orqo cabrataq sinchitapuni hatunchakurqan, ichaqa sinchi kallpasapa kashaqtinmi chay hatun waqranqa p'akikurqan, chay waqraq rantinpitaq tawantin kinrayman tawa waqrakuna wiñamurqan. 9Hukninkumantan huch'uy waqra wiñamurqan, sinchitataq wiñarqan uray ladoman, inti lloqsimuy ladoman, munayllaña hallp'a ladomanwan. 10Hanaq pacha ch'askakunaman chayanankama wiñarqan, hanaq pachapi wakin ch'askakunatapas pampamanmi wikch'umurqan, hinaspan chaykunata sarurparirqan. 11Ch'askakunata Kamachiq contrapas hatunchakurqanmi, sapa p'unchay sacrificio haywanatapas hark'akurqanmi, Dios yupaychana wasitapas qhellicharqanmi, 12Dios sonqo runakunatapas muchuchirqanmi. Sapa p'unchay sacrificio haywanantaqa Diospa wasinpin millayta huchallikurqan. Cheqaq yupaychanatapas wikch'urqanmi. Ima munasqantan ruwarqan, imapas paypaqqa allinkamataqmi karqan. 13Hinamantataq huk angelpa rimasqanta uyarirqani, hukkaq angeltaq chay rimashaqta tapurqan: ¿Hayk'aqkamataq chay rikhuriypi rikusqaqa kanqa? ¿Hayk'aqkamataq Diospa wasinpi millayta huchallikunqaku sacrificiota sapa p'unchay haywanankutaqa? ¿Hayk'aqkamataq Dios yupaychana wasitapas qhellichanqaku, paypa ejercitontapas muchuchinqaku? nispa. 14Hinan payqa nirqan: Waranqa pachak phisqa chunka p'unchaymi sacrificiota mana haywanqakuchu tutamantapas ch'isiyaykuytapas. Chay qhepatataq Diospa wasinqa ch'uyayachisqa kapunqa, nispa. 15Chay rikhuriyta ñoqa Daniel rikuspay entiendeytapuni munashaqtiymi, ñawpaqeypi runaq churinman rikch'akuq rikhuriwarqan. 16Hinan Ulai mayumanta huk kunkata uyarirqani, chay kunkan waqyakurqan: ¡Gabriel, chay rikhuriyta Danielman sut'inchay! nispa. 17Chaymi payqa asuykamuwarqan, qayllaykamuwaqtintaq sinchita q'aqchakuspa pampaman uyanpamanta wikch'ukurqani. Paytaq niwarqan: Qan, runaq churin, entiendey, kay rikhuriyqa p'uchukay tiempopi hunt'akunanpaqmi, nispa. 18Pay rimaykuwashaqtintaq ñoqaqa yuyay chinkasqa pampaman uyayoq wikch'urayasharqani, paytaq llamiykuwaspa sayarichiwarqan. 19Hinaspan niwarqan: Ñoqan willasqayki k'arakta phiñakuspa Diospa imatachus ruwananta, rikhuriyqa p'uchukay tiempopin hunt'akunqa. 20Iskay waqrayoq anejo rikusqaykiqa Media suyu Persia suyu reykunan. 21Orqo cabraqa Grecia suyu reymi, mat'inpi hatun waqraqa ñawpaqkaq reymi. 22Ñawpaqkaq waqra p'akikuqtin wiñaq tawa waqraqa chay hatun suyumanta tawa suyukuna sayarimunanmi, ichaqa manan ñawpaqkaq hina kallpasapachu kanqaku. 23Chay tawa reykuna kamachikuyta tukushaqtinkutaq, huchallikuqkuna sinchitapuni huchallikuqtinku, anchaykachaq yuyaysapa rey kamachikuq sayarinqa. 24Kallpasapan kanqa, ichaqa manan paypa kallpanwanchu. Sinchitan purunyachinqa, imapas paypaqqa allinkaman kanqa. Atiyniyoqkunatan wañuchinqa, Diospa llaqtantapas wañuchinqan. 25Yuyaysapa kasqanwanmi q'otuspa ruwasqankunaqa paypaq allin kanqa. Sonqonpin hatunchakunqa, qonqayllan askha runata wañuchinqa. Kamachikuqkunaq Kamachiqnin contran sayarinqa, ichaqa runaq mana wañuchisqanmi wañunqa. 26Ch'isiyaykuytapas tutamantantapas rikhuriymanta willasqayqa cheqaqmi, qantaq chay rikhuriyta sonqollaykipi hap'iy, unay tiempomantaraqmi hunt'akunqa, nispa. 27Hinaqtinmi ñoqa Danielqa pisi kallpayarqani, hinaspan iskay-kinsa p'unchayta onqorqani. Qhaliyaspataq reypa churawasqan llank'anapi llank'arqani. Ichaqa chay rikhuriypa mancharichisqanmi kasharqani, manataqmi chay rikhuriytaqa entiendeyta atirqanichu.

will be added

X\