Daniel 6

1Rey Darion yuyaykurqan pachak iskay chunka kamachikuqkunata suyunpi churayta, hinantin kamachisqan suyupi kamachikunanpaq. 2Paykunata kamachinanpaqtaq kinsa hatun qollanakunata churarqan. Paykunamanmi suyupi kamachikuqkunaqa imatapas willananku karqan, ama reyqa imapipas imanasqapaschu kananpaq. Danielqa hatun qollanan karqan. 3Chay Danielmi wakin hatun qollanakunamantapas suyupi kamachikuqkunamantapas aswan allin kasqanta rikuchirqan, payqa aswan kusa imapas ruwananpaq kasqanrayku. Hinan reyqa yuyaykurqan tukuy kamachikusqan suyupi kamachiqpaq Danielta churayta. 4Chaymi wakin qollanakunapas suyupi kamachikuqkunapas Danielta imallapipas huchachayta munaspa hatun suyu kamachishasqanpi mana allinta tariytapuni maskharqanku, ichaqa manan ima pantasqallantapas tarirqankuchu, payqa hunt'aqtaq chanin ruwaqtaq kasqanrayku. Chaymi mana imallapipas pantasqanta, huchantapas paymanta willayta atirqankuchu. 5Chaypas paykunaqa ninakurqankun: Kay Daniel contraqa manan imallatapas tarisunchu huchachananchispaq, aswanpas Diosninpa kamachikuyninta ruwasqallantan pay contrataqa tarisunchis, nispa. 6Chaymi chay hatun qollanakunaqa suyupi kamachikuqkunapas reyman usqhaylla phawarqanku, hinaspan nirqanku: –¡Rey Darío, wiñaypaqmi kawsanki! 7Hatun suyupi llapan hatun qollanakuna, prefectokuna, kamachikuqkuna, umalli runakuna, yuyaychaqkuna ima huñunakuspan rimanakuyku kayta kamachikunaykipaq kasuchikunaykipaqwan: Pipas kinsa chunka p'unchay ukhupi mayqen diosmantapas otaq runamantapas mañakunman, manataq reyllamantachu mañakunman chayqa, leonkuna ukhuman wikch'uykusqa kachun, nispa. 8Chayrayku, kay kamachikuy simita churaspa qelqay ama p'akisqa kananpaq, imaynan Media suyuq Persia suyuq kamachikuynin simikunapas mana p'akikunchu hinata, nispa. 9Chaymi rey Darioqa kamachikuy simita firmarqan. 10Danieltaq kamachikuy simi firmasqaña kasqanta yachaspa wasinman haykurqan. Altos wasinpin Jerusalenman qhawashaq ventanakuna karqan, chaypin kinsa kutita p'unchay qonqorikurqan Diosmanta mañakunanpaq graciastapas qonanpaq, imaynan ruwallaqpuni hinata. 11Hinan chay runakunaqa huñunakuspanku Danielpa wasinman haykurqanku, hinaspan payta hap'irqanku Diosninmanta mañakushaqta yanapaynintapas valekushaqta. 12Hinaspankun reyman rirqanku kamachikusqan simimanta rimapayaq, paytan nirqanku: –Qanmi kamachikuy simita churarqanki, pipas kay kinsa chunka p'unchay ukhupi mayqen diosmantapas otaq mayqen runamantapas mañakunman, manataq qanllamantachu chayqa, leonkuna ukhuman wikch'uykusqa kananpaq. Reyniyku, ¿hinachu manachu? nispa. Reytaq kutichirqan: –Arí, hinapunin. Kamachikuy simiqa hunt'akunanmi Media runakunaq Persia runakunaq kamachikuy siminman hina, manan chayqa p'akisqa kayta atinmanchu, nispa. 13Hinan paykunaqa yapamanta nirqanku: –Judá suyumanta apamusqa Danielqa manan manchakusunkichu, manan kamachikuy simi qelqasqaykitapas kasukunchu, aswanmi kinsa kutitaraq p'unchaypi Diosninmanta mañakun, nispa. 14Chayta uyarispanmi reyqa maytapuni llakikurqan, hinaspan Danielta qespichiytapuni munarqan. Inti haykuykaman Danielta qespichiytapuni munaspa reyqa imaymanata ruwarqan. 15Chay runakunan ichaqa reyman kutispa nirqanku: –Qanqa allintan yachanki, Media runakunaq Persia runakunaq kamachikuy siminman hinaqa manan reypa ima hark'asqan simitapas otaq ima kamachikusqan simitapas pipas p'akinmanchu, nispa. 16Hinaqtinmi reyqa kamachikurqan Danielta apamuspanku leonkuna ukhuman wikch'uykunankupaq. Manaraq wikch'uykushaqtinkutaq reyqa Danielta nirqan: –Tukuy sonqoykiwan servisqayki Diosniyki qespichisunki, nispa. 17Rumita apamuspataq t'oqota chaywan wisq'aykurqanku, reytaq selloyoq anillonwan umalli runankunaq anillonpiwan chayta selloykurqan, Danielmanta rimanakusqanku hunt'akunanpaq. 18Chaymantataq reyqa wasinta ripurqan, hinaspa mana mikhusqa puñunanman siriykurqan. Manan taki tocanakunatapas qayllanman apamurqankuchu, manan chay tuta chhikallantapas puñurqanchu. 19Tutallamanta sayarispanmi reyqa phawaylla leonkunaq t'oqonman rirqan. 20T'oqoman qayllaykuspataq waqay-waqay kunkanwan Danielta waqyarqan: –¡Daniel, kawsaq Diospa kamachin! ¿Tukuy sonqo servisqayki Diosniykiqa leonkunamanta qespichisunkichu? nispa. 21Hinan Danielqa kutichimurqan: –¡Reyníy, wiñaypaqmi kawsanki! 22Diosniymi angelninta kachamuwan, paymi leonkunaq siminta wisq'aykurqan. Manan Dios contraqa huchallikurqanichu, qan contrapas manan ima mana allintapas ruwarqanichu, chaymi leonkunaqa mana k'iriwanchu, nispa. 23Hinan reyqa maytapuni kusikuspa kamachikurqan Danielta t'oqomanta horqomunankupaq. Danielta t'oqomanta horqomuspankutaq mana ima k'irillatapas tarirqankuchu, Diosninman hap'ipakusqanrayku. 24Chaymantataq reyqa kamachikurqan Danielta huchachaq runakunata apamunankupaq, hinan paykunaqa warmintin wawantin leonkuna ukhuman wikch'uykusqa karqanku, leonkunataq t'oqomanpas chayraq urmaykushaqtinku paykunata hap'irqarispa tullunkunata lliwta p'akirqarirqan. 25Hinaqtinmi rey Darioqa qelqarqan kay pachantinpi tiyaq llapa llaqtakunaman, llapa suyukunaman, ima rimaytaña rimaqkunamanpas: Thak-kay qankunawan kachun. 26Ñoqan kayta kamachikuni: Hinantin kamachikusqay suyupi llapalla Danielpa Diosninta manchakuchunku yupaychachunku. Paymi kawsaq Diosqa, wiñay-wiñaymi kashallanqapuni. Kamachikuyninqa manan hayk'aqpas qollunqachu, munaychakuyninpas manan hayk'aqpas tukukunqachu. 27Paymi qespichinpas kacharichinpas, hanaq pachapipas kay pachapipas señalkunatan musphanakunatan ruwan. Paymi Danielta leonkunaq mikhunanmanta qespichirqan, nispa. 28Danielqa tukuy imapin allillanpuni kasharqan Darío kamachikushaqtinpas Persia suyu rey Ciro kamachikushaqtinpas.

will be added

X\