Daniel 4

1Ñoqa rey Nabucodonosormi kay pachantinpi tiyaq llapa llaqtakunaman, hatun suyukunaman, ima rimaytaña rimaqkunamanpas qelqamuykichis: Thak-kay qankunawan kachun. 2Ancha hatun Diospa musphanakunata utirayanakunata ruwapuwasqankunataqa qankunaman willanaypunin. 3¡Ancha hatunmi Diospa musphana ruwasqankunaqa! ¡Ancha atiyniyoqmi Diospa milagro ruwasqankunaqa! Payqa wiñaypaqmi munaychakunqa, miray-miraykaman kamachikunqapas. 4Ñoqa Nabucodonosormi wasiypi llakhi kakusharqani, kamachikunay wasipi t'ikarisharqani. 5Ichaqa puñunapi puñushaspaymi mosqokurqani, chaymi mancharichiwarqan, yuyaykusqaykunapas rikhuriyta rikusqaykunapas q'aqchawarqan. 6Chaymi kamachikurqani Babiloniapi llapa yachayniyoqkuna ñawpaqeyman hamuspanku mosqokusqayta sut'inchawanankupaq. 7Hinan hamurqanku yachayniyoqkuna, watuqkuna, layqakuna, ch'askata qhawaspa watuqkunapas. Ñoqataq mosqokusqayta paykunaman willarqani, ichaqa manan atirqankuchu ñoqapaq sut'inchayta. 8Chayllamanmi Danielqa haykumuwarqan, payqa diosniypa sutin hina Beltsasar sutiyoqmi, paypin ch'uya dioskunaq espiritun kashan. Paymanmi mosqokusqayta willarqani: 9Watuqkunata kamachiq Beltsasar, yachanin ch'uya dioskunaq espiritun qanpi kasqanta, ima pakasqa yachaypas qanpaqqa sut'in. Chayrayku, mosqoypi rikusqayta willasqayki, hinaspa sut'inchapuway: 10Puñushaspaymi kay rikhuriykunata rikurqani: Hallp'a pampapin hatunkaray sach'a kashasqa. 11Chay sach'an wiñarqan, hinaspan rakhuyarqan, umanmi hanaq pachakama chayarqan, teqsimuyuntin runakunataq chayta rikurqanku. 12Ancha munay raphiyoqmi karqan, askha ruruyoqmi karqan, llapallan chaymanta mikhurqanku. Salqa uywakunan chay k'uchupi llanthukurqanku, k'allmankunapin phalaq animalkuna q'esachakurqanku, chay sach'amantan lliw kay pachantin mikhurqan. 13Puñunaypi kashaspaymi rikhuriypi rikurqani hanaq pachamanta uraykamushaq ch'uya angelta, 14paymi kunkayoqta waqyakurqan: Chay sach'ata kumpaychis, k'allmankunatapas wit'uychis, raphinkunatapas raphinaychis, rurusqantapas t'akarpariychis. Chaypi llanthukuq uywakuna ayqechunku, k'allmankunapi tiyaq phalaq animalkunapas ripuchunku. 15Ichaqa pampapi k'ulluntapas saphinkunatapas saqeychis, fierro-bronce cadenawan chayta wataychis, hinaspa campo qora-qorapi saqeychis, chay pataman sulla sullamuchun, uywakunawan kuska campopi tiyachun. 16Yuyaynin t'ikrakuchun, hinaspa animalpa yuyaynin hina yuyayniyoq kapuchun, qanchis watantin chay hina kachun. 17Chay kamachikuytaqa angelkunan churan, chay yuyaykusqataqa ch'uya angelkunan rimarin, runakunaq kamachisqan suyukunata Ancha hatun Diospa kamachikusqanta llapa runa yachananpaq. Paymi pimanchus kamachikuyta qoyta munasqanman qon, chay suyukunapin k'umuykukuq runamanpas kamachikuyta qon, nispa. 18Chay hinatan ñoqa rey Nabucodonosorqa mosqokurqani. Qan Beltsasarmi chayta sut'inchapuwanki. Kamachisqay suyupiqa manan mayqen yachayniyoqpas chayta sut'inchapuwayta atinchu, qanmi ichaqa sut'inchayta atinki, ch'uya dioskunaq espiritun qanpi kashasqanrayku, nispa. 19Chaymi Beltsasar sutichasqanku Danielqa huk rato utirayarqan, yuyaykusqankunapas musphachirqan. Ñoqataq payta nirqani: –Beltsasar, ama mosqokusqaywanpas sut'inchayninwanpas utirayaychu, nispa. Hinan Beltsasarqa kutichiwarqan: –¡Ay, reyníy, mosqokusqaqa awqaykikunapaq kachun, sut'inchaynintaq mana allinta ruwayta munaqniykikunapaq kachun! 20Hatunkaray rakhu sach'atan rikurqanki, chaymi hanaq pachakama chayarqan, teqsimuyuntin runakunataq rikurqanpas. 21Munay raphiyoqmi rurusapataqmi karqanpas, llapataq chayta mikhurqanku. Chay sach'a llanthupin campo uywakunapas llanthukurqanku, k'allmankunapin phalaq animalkunapas q'esachakurqanku. 22Reyníy, qanmi chay sach'aqa kanki, wiñarqankin, atiyniyoqmi kapurqanki. Atiyniykin yapakurqan hinaspa hanaq pachakama chayarqan, kay pachantintataq kamachirqankipas. 23Rikullarqankitaqmi hanaq pachamanta uraykamushaq ch'uya angeltapas, paymi nirqan: Sach'ata kumpaychis, hinaspa ñut'uychis. K'ulluntawan saphinkunatawan ichaqa kaq pampapi saqenkichis, fierro-bronce cadenawan wataychis, hinaspa campo qora-qorapi saqeychis. Sullaq sullasqan kachun, qanchis watantin campopi uywakunawan tiyachun, nispa. 24Reyníy, kaymi mosqokusqaykiq sut'inchayninqa, kaytaqmi Ancha hatun Diospa qan contra kamachikusqanpas: 25Runakuna ukhumantan wikch'usunkiku, salqa uywakunawanmi tiyanki, waka hinan qorata mikhunki, sullan sullaykusunki. Qanchis watantinmi chay hina kanki, Ancha hatun Diospa kamachisqanta yachanaykikama, runakunaq kamachikusqan suyukunapi. Pitachus munasqanta kamachikuqpaq churaq kasqantapas yachanaykikama. 26Chay angelmi nillarqantaq k'ulluntawan saphinkunatawan kaq pampapi saqenapaq. Chayqa sut'inchan, Diosqa lliwpi kamachikuq kasqanta reqsikuqtiykiña yapamanta suyuykipi rey kapunaykitan. 27Chayrayku, reyníy, kay kunaykusqayta hap'ikuy: Chaninkaqta ruway, amaña huchallikuychu, mana chanin ruwayniykikunata saqepuspa wakcha runakunata khuyapayay, ichapaschá chaywan allillanraq kashawaq, nispa. 28Chaykunan rey Nabucodonosorman chayamurqan. 29Chunka iskayniyoq killaña kashaqtinmi, Babilonia llaqta palacio wasi patapi purishaspa, 30reyqa nirqan: ¡Ancha hatunmi Babilonia llaqtaqa! Ancha atiyniywanmi kay llaqtata suyu kamachinay llaqta kananpaq sayarichirqani, hinallataq ancha qhapaq kasqayta rikuchinaypaq, nispa. 31Hinan rimayta manaraq tukushaqtin hanaq pachamanta huk kunka nimurqan: Rey Nabucodonosor, uyariway. Kamachikusqayki suyupiqa manañan kamachikapunkichu. 32Runakuna ukhumantan wikch'usqa kanki, salqa uywakunawanmi tiyanki, waka hinan qorata mikhunki. Qanchis watantinmi chay hina kanki, runakunaq kamachisqan suyupi Ancha hatun Diospa kamachikusqanta yachanaykikama, pitachus munasqanta payqa kamachikuqpaq churaq kasqantapas yachanaykikama, nispa. 33Kaq ratopachan Nabucodonosorpaq simi hunt'akurqan, hinan runakuna ukhumanta wikch'usqa karqan. Waka hinan qorata mikhurqan, sullaq sullasqanmi karqan, chukchanpas anka phuru hinaraqmi wiñarqan, sillunkunapas phalaq animalkunaq sillun hinaraqmi wiñarqan. 34Chay unanchasqa tiempo hunt'akuqtintaq, ñoqa Nabucodonosorqa hanaq pachata qhawarirqani, hinan yuyayniyta hap'ikurqani. Hinaspaymi Ancha hatun Diosta yupaycharqani, Wiñaypaq Kawsaq Diosta qhapaqchaspa hatunchaspa: Diosqa wiñaypaqmi kamachikun, miray-miraykaman munaychakun. 35Qayllanpiqa manapas kankumanchu hinan kay pachapi llapa runakunaqa. Payqa ima munasqantan ruwan hanaq pachapi kaqkunawanpas kay pachapi kaqkunawanpas. Manan pipas atiynintaqa hark'ayta atinmanchu, manan tapullanmanpaschu: ¿Imanashankitaq? nispapas. 36Kaqratopachan yuyayniyta hap'ikurqani, qhapaqchasqa-kayniypas hatunchasqa-kayniypas kutimpuwarqanmi kamachisqay suyu atiyniyoq kananpaq. Kamachikuqniykunapas, yuyaychaqniykunapas maskhawarqankun, wakmantan hatun suyupi kamachikuqta churawarqanku, hinan ñawpaqmantapas aswan atiyniyoqraq kapurqani. 37Kunanqa, ñoqa Nabucodonosorqa yupaychanin, hatunchanin, qhapaqchanin Hanaq Pacha Reyta. Imapas ruwasqankunaqa cheqaqmi chaninmi, anchaykachaqkunatapas payqa k'umuykachinmi.

will be added

X\