Daniel 3

1Rey Nabucodonosormi qorimanta idolota ruwachirqan, chaypa sayayninmi kinsa chunka metro karqan, anchontaq kinsa metro. Chaytan Babilonia provinciapi Dura nisqa pampapi sayachirqan. 2Hinaspan rey Nabucodonosorqa waqyachimurqan suyupi kamachikuqkunata, prefectokunata, provinciapi kamachikuqkunata, yuyaychaqkunata, qolqe waqaychaqkunata, llapa juezkunata, llapa provinciapi oficialkunatawan, paypa sayarichisqan ídolo ch'allayman hamunankupaq. 3Hinaqtinmi chay llapa runakunaqa huñukamurqanku rey Nabucodonosorpa sayarichisqan idolota ch'allanapaq, chay idoloq ñawpaqenpitaq sayasharqanku. 4Willakuqtaq kunkayoqta nirqan: ¡Uyariychis, llaqtakuna, hatun suyukuna, ima rimaytaña rimaqkunapas! Reymi kamachisunkichis: 5Pututuq, qenaq, arpaq, tawtinkuq, zampoñaq, llapa tocanaq waqasqanta uyarispaykichismi qonqorikunkichis, yupaychankichis rey Nabucodonosorpa qorimanta ruwachisqan idolota. 6Pillapas mana qonqorikunqachu, manataq yupaychanqapaschu chayqa, rawrashaq horno ukhumanmi kaq rato wikch'uykusqa kanqa, nispa. 7Chaymi pututuq, qenaq, arpaq, tawtinkuq, zampoñaq, llapa tocanaq waqasqanta uyarispa, llapa llaqtakuna, hatun suyukuna, ima rimaytaña rimaqkunapas qonqorikurqanku, hinaspan rey Nabucodonosorpa sayarichisqan qorimanta ruwasqa idolota yupaycharqanku. 8Chaypachan Caldea wakin qharikunaqa rispa judío qharikunata ch'ataspa, 9rey Nabucodonosorta nirqanku: –¡Wiñaypaq reyqa kawsachun! 10Qanmi, reyniyku, kamachikurqanki pututuq, qenaq, arpaq, tawtinkuq, zampoñaq, llapa tocanaq waqasqanta uyarispa llapa runa qonqorikunanpaq, qorimanta ruwasqa idolota yupaychanankupaq. 11Kamachikullarqankitaqmi pipas mana qonqorikuqqa manataq yupaychaqqa rawrashaq horno ukhuman wikch'uykusqa kananpaq. 12Ichaqa wakin judío qharikunan mana manchakusunkikuchu, manan diosniykikunata yupaychankuchu, manataq qorimanta ruwaspa sayarichisqayki idolotapas adorankuchu, paykunatan churarqanki Babilonia provinciapi kamachikunankupaq: Sadracta, Mesacta, Abed-negotawan, nispa. 13Hinaqtinmi Nabucodonosorqa sinchi k'arak phiñasqa kamachikurqan Sadracta, Mesacta, Abed-negotawan apamunankupaq. Chaymi chay qharikunata reypa ñawpaqenman apamurqanku. 14Hinan Nabucodonosorqa paykunata tapuykurqan: –Sadrac, Mesac, Abed-nego, ¿cheqaqchu qankunaqa diosniykunata mana yupaychankichis, qorimanta ruwachisqay idolotapas mana yupaychankichis? 15Kunanqa pututuq, qenaq, arpaq, tawtinkuq, zampoñaq, llapa tocanaq waqasqanta uyarispa qonqorikuspaykichis, ruwachisqay idolota yupaychaychis. Mana chayqa, kunanpachan rawrashaq horno ukhuman wikch'uykusqa kankichis. Chhaynaqa, ¿ima diostaq qankunata kacharichisunkichisman ñoqaq atiyniymanta? nispa. 16Sadracwan Mesacwan Abed-negowantaq rey Nabucodonosorman kutichirqanku: –Manan kaymantaqa qanman kutichinaykuraqchu. 17Rawrashaq hornoman wikch'uykuwankiku chayqa, yupaychasqayku Diosniykuqa atiyniyoqmi chaymanta qespichiwanankupaq, paymi makiykimantapas qespichiwanqaku. 18Manaña qespichiwanqaku chaypas, yachay reyniyku, manan diosniykikunataqa yupaychasaqkuchu, manataqmi qorimanta ruwaspa sayarichisqayki idolomanpas qonqorikusaqkuchu, nispa. 19Hinaqtinmi Nabucodonosorqa sinchi k'arakta phiñakurqan, uyanpas kullimanraq tukurqan Sadrac, Mesac, Abed-nego contra, hinaspan kamachikurqan hornoqa parinanmantapas qanchis kutitawanraq aswanta parichinankupaq. 20Ejercitonpi allin kallpasapa wakin qharikunatataq kamachirqan Sadracta, Mesacta, Abed-negotawan t'eqespa rawrashaq hornoman wikch'uykunankupaq. 21Hinan chay qharikunaqa capantin, qoysu p'achantin, uma k'uyunantin, wakin p'achantin t'eqesqa nina rawrashaq hornoman wikch'uykusqa karqanku. 22Reyqa usqhaylla hunt'akunanpaqmi kamachikurqan, sinchita ruphachisqanku hawan nina rawray qallu Sadracta, Mesacta, Abed-negotawan wikch'uykuq runakunata rupharparirqan. 23Chay kinsantin qharikunataq rawrashaq horno ukhuman t'eqesqapacha chayarqanku. 24Hinamantataq rey Nabucodonosorqa utirayarqan, hinaspan qonqaylla sayarispa yuyaychaqnin runakunata tapurqan: –¿Manachu kinsa qharita t'eqesqatakama nina ukhuman wikch'uykurqanchis? nispa. Paykunataq kutichirqanku: –Arí, hinapunin, reyniyku, nispa. 25Reytaq nirqan: –¡Qhawariychis! Ñoqan rikushani paskasqa tawa qharikunata, nina ukhupi mana imanasqalla purishaqta, tawakaq runaqa dioskunaq churinmanmi rikch'akunpas, nispa. 26Hinaspanmi Nabucodonosorqa rawrashaq horno punkuman asuykuspa kunkayoqta waqyakurqan: –¡Sadrac, Mesac, Abed-nego, Ancha hatun Diospa kamachinkuna, lloqsimpuychis, hampuychis! nispa. Hinan kinsantinku nina ukhumanta lloqsimpurqanku. 27Chaymi suyupi kamachikuqkuna, prefectokuna, provinciapi kamachikuqkuna, reypa yuyaychaqninkunapas chay qharikunata qhawanankupaq huñukamurqanku. Ninaqa manan paykunaq cuerponta imanallasqapaschu, uma chukchankutapas manan chheqchirillasqapaschu, p'achankutapas manan qompirillasqapaschu, manan nina-ninallapas asnasqakuchu. 28Chaypachan Nabucodonosorqa kunkayoqta nirqan: –¡Yupaychasqa kachun Sadracpa, Mesacpa, Abed-negoqpa Diosnin! Paymi angelninta kachamurqan, hinaspan payman hap'ipaykukuq kamachinkunata qespichirqan. Manataq reypa kamachikusqanta hunt'arqankuchu, wañuymanpas qaraykukurqanku Diosninkumanta wak diosman manapuni qonqorikuyta yupaychayta munaspanku. 29Chaymi kamachikuni, pipas k'aminman Sadracpa, Mesacpa, Abed-negoqpas Diosninta chayqa, tawaman llik'isqa kachun, wasinpas thunisqa kachun, may llaqtamantaña, suyumantaña, rimaymantaña kachun chaypas. Manan wak diosqa kanchu kay Dios hina qespichiy atiqqa, nispa. 30Hinaspanmi reyqa Babilonia provinciapi hatuncharqan Sadracta, Mesacta, Abed-negotawan.

will be added

X\