Daniel 12

1Chay p'unchaykunapin llaqtaykita amachaq hatun kamachikuq Miguel sayarinqa. Khuyay llaki-phutiy p'unchaykunan kanqa, manan hayk'aqpas hatun suyukunaq kasqanmantapacha chay hinaqa chay p'unchaykama karqanchu. Ichaqa chay p'unchaykunapin llaqtayki qespichisqa kanqa, Diospa qelqanpi llapa qelqasqa kaqkuna. 2Askha wañusqakunan kawsarimpunqaku, wakinmi wiñaypaq kawsanankupaq, wakintaq wiñaypaq p'enqasqa pisichasqa kanankupaq. 3Hamawt'akunaqa hanaq pacha k'anchay hinan k'anchanqaku, askha runata chanin kawsayman kutirichiqkunapas ch'askakuna hinan wiñay-wiñaypaq k'anchanqaku. 4Qantaq Daniel, p'uchukay tiempokama qelqa k'uyuta k'uyuy, sellowanpas wisq'aykuy. Askha runan kayman chayman phawarinqaku aswan yachayniyoq kayta maskhaspa, nispa. 5Chaymantataq ñoqa Danielqa qhawarirqani, hinaspan iskay runata rikurqani, hukninta kayneq mayu patapi, huknintataq mayu chimpapi sayashaqta. 6Hukninmi mayu pata wichaypi sayashaq lino p'achayoq qharita tapurqan: ¿Hayk'aqtaq kay utirayanakunari p'uchukanqa? nispa. 7Hinan lino p'achayoq qhariqa iskaynin makinta hanaq pachaman haywarispa Wiñaypaq Kawsaq Diospa sutinpi jurarqan. Paytan uyarirqani: Kinsa wata kuskanmi kanqa. Diospa llaqtanpa atiynin chinkachisqaña kaqtinmi tukuy chaykuna hunt'akunqa, nispa nishaqta. 8Ñoqan rimasqanta uyarirqani, ichaqa manan entienderqanichu. Chaymi tapurqani: Wiraqocháy, ¿imaynatataq chaykunaqa tukukapunqa? nispa. 9Hinan payqa niwarqan: Ripuy, Daniel, chay simikunaqa p'uchukay tiempokaman pakasqa kashan, sellowan wisq'asqa kashan. 10Askhan probasqa kaspanku ch'uyanchasqapuni mana qhelliyoq kanqaku. Millay runakunaqa millayllatapunin ruwashanqaku, manan mayqenninkupas imachus kashasqanta entiendenqakuchu, hamawt'akunan ichaqa chayta entiendenqaku. 11Sapa p'unchay sacrificio haywanata qolluchispa millay-millay qhellichaqta churasqanku tiempomantapachaqa kanqa waranqa iskay pachak isqon chunka p'unchaymi. 12Kusisamiyoqmi waranqa kinsa pachak kinsa chunka phisqayoq p'unchay suyakuqqa. 13Qantaq p'uchukaykama hunt'aq kay. Qanqa wañukapunkin, herenciaykita chaskinaykipaqtaq p'uchukay p'unchaykunapi kawsarimpunki, nispa.

will be added

X\