Daniel 10

1Persia suyu rey Ciro kinsakaq watapi kamachikushaqtinmi Beltsasar sutichasqa Danielman Diosqa siminta willarqan: Simiqa cheqaqmi karqan ichaqa sinchi sasa entiendenan karqan. Chay simiqa rikhuriypin Danielman sut'inchasqa karqan. 2Chay p'unchaykunan ñoqa Danielqa kinsa semanantin llakipi kasharqani. 3Manan sumaq mikhunata mikhurqanichu, manan aychatapas vinotapas mallirqanichu, manan hawinawanpas hawikurqanichu kinsa semana hunt'akunankama. 4Ñawpaqkaq killaq iskay chunka tawayoq p'unchayninpin Tigris hatun mayu patapi kasharqani. 5Hinaspa qhawarispa rikurqani lino p'achawan p'achasqa runata, ch'uya qori chumpiwan chumpisqata. 6Cuerponmi q'ellu umiña hina k'ancharqan, uyanmi lliphllikiqman rikch'akurqan, ñawinkunan rawrashaq nina hina karqan, makinkunapas chakinkunapas llusk'achasqa bronce hinan k'ancharqan, rimarisqan simikunataq ancha askha runaq warararasqan hina karqan. 7Ñoqa Danielmi sapallay chay rikhuriyta rikurqani, manan ñoqawan kashaq runakunaqa chayta rikurqankuchu, aswanmi paykunaqa sinchita mancharikuspa pakakamuq ayqekurqanku. 8Sapallaymi qheparqani chay hatun rikhuriyta qhawarayaspa. Mana kallpayoqmi kapurqani, uyaypas q'elluyaykapurqanmi, kallpa wañuymi kapurqani. 9Rimasqankunata uyarispaytaq yuyay chinkasqa pampaman uyanpamanta wikch'ukurqani. 10Chayllamanmi huk maki hap'iykuwaspa aysariwarqan, khatatataspa makiywan tawnaykukuspa qonqoriykukunaykama. 11Hinaspan niwarqan: Daniel, Diosmi anchatapuni munakusunki, sayariy, makilla uyariway, qanman kachamusqan kani, nispa. Chayta rimaykuwaqtin hinataq khatatataspa sayarirqani. 12Hinan niwarqan: Daniel, ama manchakuychu. Diospa qayllanpi ñawpaqkaq p'unchaymantapacha mana entiendey atina kaqta yachayta munaspa k'umuykukunaykipaq yuyaykukurqanki, chay p'unchaymantapachan Diosqa mañakusqaykita uyarirqan, chaymi ñoqaqa hamurqani. 13Persia suyu kamachikuqmi ichaqa iskay chunka hukniyoq p'unchaynintin hark'awarqan, chaymi huknin umalli ángel Miguel sutiyoq yanapaykuqniy hamurqan, chaypin Persia suyu reykunaq qayllanpi qhepamurqani. 14Qhepa p'unchaykunapi llaqtaykipaq imachus chayamunanta qanman willaqmi hamuni, rikhuriyta rikusqaykiqa chay p'unchaykunapaqmi, nispa. 15Chayta niwashanankamaqa pampa qhawarisqan k'umuykukurqani, manataqmi rimarirqanichu. 16Chayllamanmi runaq churinman rikch'akuqqa simiyta llamiykuwarqan. Hinan ñawpaqeypi sayashaq runata nirqani: Wiraqocháy, chay rikhuriymi sinchita llakichiwan, mana kallpayoqmi kapuni. 17¿Imaynan kay kamachiykiqa qanwan rimanman mana kallpayoq kashaspa, manaña kuyuriytapas atishaspay? nispa. 18Chay, runaman rikch'akuqtaq huktawan llamiykuwaspa kallpachaykuwarqan, 19hinaspa niwarqan: Diosmi anchatapuni munakusunki, ama manchakuychu, ama llakipakuychu. Kallpata hap'iy, kallpachakuy, nispa. Pay rimapayashawaqtinmi kallpachakusharqani, hinaspan nirqani: Wiraqocháy, kallpachawasqaykirayku rimaykuway, nispa. 20Chaymi payqa niwarqan: ¿Yachankichu imaraykuchus qanman hamusqayta? Kunanqa kutipunaypunin Persia suyu kamachikuqwan maqanakunaypaq. Ñoqa kutipuqtiytaq Grecia suyu kamachikuq hamunqa. 21Ichaqa willasqaykiraqmi Cheqaq-kay Qelqapi imachus qelqasqa kashaqta. Manataqmi pipas paykuna contra yanapawanchu, aswanpas qankunata kamachiq Miguel sapallanmi.

will be added

X\