Daniel 1

1Kinsa kaq watapi Judá suyu rey Joacim kamachikushaqtinmi, Babilonia suyu rey Nabucodonosorqa Jerusalenman hamurqan, hinaspan llaqtata soldadonkunantin muyuykurqan. 2Señor Diosmi Nabucodonosorwan Judá rey Joacimta hap'ichirqan, hinallataq Diospa wasinpi serviciokunatapas wakinta apachirqan. Hinan chaykunata Babilonia suyuman apaspa diosninpa imaymanankunata waqaychana wasiman churarqan. 3Reymi oficialkunaq umallin Aspenazta kamachirqan Israel rey ayllumanta allichachaq runakunamanta wakin waynakunata akllamunanpaq. 4Chaykunan kanan qhali waynakuna, sumaq rikch'ayniyoqkuna, imaymana yachaqkuna, usqhaylla yachaqaqkuna, allin yuyayniyoqkuna, reypa wasinpi tukuy imapipas allin ruwaqkuna ima. Paykunamanmi umalli Aspenazqa Caldea runakunaq qelqaynintapas rimaynintapas yachachinan karqan. 5Reytaq chay waynakunaman sapa p'unchay mikhunan mikhuyta ukyanan vinota haywachirqan. Kamachillarqantaq kinsa watantin paykunata yachachinanpaq, hinamantataq reypa kamachin kapunankupaq. 6Chaykuna ukhupin kasharqan Judá ayllumanta waynakuna Daniel, Ananías, Misael, Azariaspiwan. 7Oficialkunaq umallinmi suticharqan Danielta Beltsasarta, Ananiasta Sadracta, Misaelta Mesacta, Azariastataq Abed-negota. 8Danielmi ichaqa yuyaykukurqan reypa mikhunanwanpas vinonwanpas mana qhellichakunanpaq. Chaymi Danielqa valekurqan oficialkunaq umallinta, ama chay mikhunakunata qonanpaq 9Diostaq umalli Aspenazwan Danielta khuyapayachispa sumaqta qhawarichirqan, 10Hinan payqa Danielta nirqan: –Wiraqochay reytan manchakuni, paymi mikhunaykichistapas ukyanaykichistapas t'aqapurqasunkichis. Wayna-masiykichiskunaq uyanmanta aswan q'elluta uyaykichista rikuspa hinan, reyqa qankuna hawa umayta qhoruchiwanqa, nispa. 11Aspenazmi Danielpaq, Ananiaspaq, Misaelpaq, Azariaspaqwan mayordomota churasqa. Paytan Danielqa nirqan: 12–Valekuykin kamachiykikunata probaykuwanaykikupaq. Chunka p'unchaynintin yuyukunata chaqallullatawan mikhuchiwayku, unullatataq ukyachiwaykupas. 13Hinaspayki uyaykuta tupachinki reypa mikhunan mikhuq waynakunaq uyantawan, hinaspa imaynatachá rikuwankiku chayman hina ruwawankiku, nispa. 14Hinan mayordomoqa uyakurqan, hinaspan paykunata chunka p'unchayta probaykurqan. 15Chunka p'unchaymantataq uyankuqa aswan allin, cuerponkupas aswan kallpachasqa rikhurirqan, reypa t'aqapusqan mikhunata mikhuq waynakunaq rikch'ayninmantaqa. 16Chaymi mayordomoqa paykunapaq t'aqasqa mikhunatapas ukyananku vinotapas mana qopuqñachu, aswanmi yuyukunatawan chaqallutawan paykunaman mikhuchiq. 17Chay tawa waynakunamanmi Diosqa qorqan yachayta, imaymana qelqakuna reqsiyta, imaymana entiendeytawan. Danieltaq imaymana rikhuriypa, mosqoypa imachus kasqanta sut'inchayta yachaq. 18Waynakunata pusananpaq reypa nisqan p'unchaykuna hunt'akuqtintaq, Aspenazqa paykunata Nabucodonosorman pusarqan. 19Reytaq paykunawan rimarqan, hinan llapanku ukhupi mana hukllapas karqanchu Daniel hina, Ananías hina, Misael hina, Azarías hina, chaymi paykunaqa reypa kamachin kapurqanku. 20Reyqa imatapas yachayta entiendeyta munaspa tapuykuspanmi, chunka kuti aswan allintaraq paykunata tarirqan suyuntinpi llapan layqakunamantapas watuqkunamantapas. 21Danieltaq reypa kamachin kapurqan rey Ciroq kamachikuyta qallarisqan watakama.

will be added

X\